¹ Jepsa kito lo Gilead orumu ara karemoni na i gol. Ara afa apa nenge Gilead, ati ara iyang nenge mulayani. ² Orumu ngorwani lo Gilead manyu o tomonohi inyi tee rei, manyu langun lo boroho icieng i fuhe icieng Jepsa oleng. O joo icieng diho inyi, "Ida isi i cam rumuno lobo lolunyot to kaji niyang tonyio ira isi kito lo lobo ngorwani ake." ³ Tona i fe Jepsa to kang na lo ngoni recera kunenge o loo manya kof lo Tob, o fwonu ilulung lo kasabitak o tubuno diho inyi o lotu inyi ara lahitok neicieng. ⁴ Lobo kari to kifwongi ka lo rem cio kulo Amon ko cio kulo Israel ⁵ o fwo lohitwaha kulo Gilead ki yamaru Jepsa to kof lo Tob. ⁶ O joo icieng diho inyi, "Ou to ara lahitok niyang, o jir ki remore ko cio kulo Amon." ⁷ O joo Jepsa diho icieng, "Ida afa ite ki beru nan many ki fuhe nan to kolo apa nei? Nyio i fwonuno ite diho nan jijia ka li ngoni ite iyo kidak?" ⁸ O joo lohitwaha kulo Gilead diho inyi, "I ngohi kuna, lohi fworo ohoi diho isi jijia, ou ko ohoi ki iti remo cio kulo Amon; ito cia isi ira kabolojoni diho ohoi fad kuna lohi manya kof lo Gilead. ⁹ I nyiahahi Jepsa o joo, "Adi ba ngohi yaru ite nan loro rem ko cio kulo Amon oto hati Lahitok i co icieng diho nan, nga lotu cia nan dede ahi bolorohi ite? ¹⁰ O nyiahahi lohitwaha kulo Gilead inyi o joo, "Lahitok lara saden niyang; dede ki tiyi cia ohoi iya na li tenyare Isi." ¹¹ Tona o loo Jepsa ko lohitwaha kulo Gilead, cio ko fiha inyi ara lahitok ko karyengani lo karemok. I nyiahatahi inyi tenyitenyi kunenge fad ketemoni lo Lahitok to Mizpa. ¹² Oto Jepsa ko cularu ifak diho kabu lo cio kulo Amon ki tifia inyi o joo, "Nyio i ngonore isi ken nei li co isi iti remore kof nei? ¹³ I nyiahahi kabu lo Amon ifak kulo Jepsa o joo, "Lafa lo fwonunore cio kulo Israel to kof lo Ijipt, o fwonu icieng o ruje kof nei to Arnon many Jabok many o goru Jordan. Jijia i nyiahu na kof to ki siliban." ¹⁴ I nyiahe ari Jepsa ifak diho kabu lo Amon ¹⁵ ara na lo joo, "Tohi na lo joo Jepsa inyi ene: Ida afa Israel o dumu kof lo Moab kode kof lo kode kof lo cio kulo Amon. ¹⁶ Ati ka lo fwonu afa icieng to kof lo Ijipt, o fwo cio kulo Israel to mwang many nam na i Do o ringari Kades. ¹⁷ To inyia o cule cio kulo Israel ifak diho kabu lo Edom o joo, "Ki co ohoi kiruk lo fworo ara kof nino, ati ida kabu lo Edom o ning. O cule manyu ifak diho kabu lo Moab, o beru manyu inyi. Tona i tongo cio kulo Israel Kades. ¹⁸ Lo are nenge o fwo icieng to mwang o giritati kofikofi kulo Edom ko Moab, i lori ara ngati lo okangere lo kof lo Moab. O fwori i tawati lu ngati lo Arnon. Ida afa icieng o rute kof lo Moab tonyio ara afa Amon lohikori nenge. ¹⁹ To inyia o cule cio kulo Israel ifak diho Sihon kabu lo cio kulo Amor na lo lanyu to Hesbon o jimi diho inyi, "Ki co ohoi ki fwo ara kof nino iya faji niyang." ²⁰ Oto hati ida afa Sihon i geno cio kulo Israel lo fworo ara kof nenge. I lolongu inyi karemok fad o lotu o gurohi kem jahaz o remiti ko Israel. ²¹ Oto Lahitok Lobanga lo Israel i co Sihon ko cio kunenge kac kulo cio kulo Israel manyu o lanyuni icieng. I yaru cio kulo Israel kof lo cio kulo Amor kuna lo ngoni na ngati fad, ²² i niefuni kof neicieng fad many to Arnon many Jobok, ko many to kuny many Jordan. ²³ Jijia iya na li fuharore Lahitok Lobanga lo Israel cio kulo Amor to ketemoni lo cio kunenge, tuman nyio i tehita isi lo dumuno na kof? ²⁴ Ngida isi i yaru tohi na lohi co lobanga nino Cemos isi? Iya na ki tek manyu ohoi tohi na lohi co Lahitok Lobanga niyang ohoi lo lunyo. ²⁵ I lany isi Balak kito lo Zipor kabu lo Moab? Lo ngolofa afa inyi ko Israel kode lo rem inyi ko icieng? ²⁶ To karihin mia uni lo many Israel Hesbon, Aroer, kangite kuna li rit ko kangite kuna lo par Arnon. Nyio afa ida isi i ruje icieng to kunu karihin? ²⁷ Ida nan a pal diho isi ati li pal isi diho nan to yeta jore ken nei. I ngohi Lahitok, Kangotoni lo tenya to de ene ngolofa elefar kiji lo cio kulo Israel ko cio kulo Amon. ²⁸ Oto hati, ida kabu lo Amon i buk na tenya lo culahi Jepsa inyi. ²⁹ Oto Okorif lo Lahitok o lotu iyo Jepsa. O rang inyi kof lo Gilead ko Manase, o ringe ara Mizpa lo Gilead oto hati to ijia ko ki wanyahino cio kulo Amon. ³⁰ Oto Jepsa ko ki butia diho Lahitok o joo, "Ka li co isi cio kulo Amon kac kunei, ³¹ tohi ketemoni na lo rutu to agwala lo kaji nei ki iti rico nan ka la yitu nan to lanyuno lo cio kulo Amon, o lotu cia ara lo Lahitok a fotohi cia nan ara kiciorita locurat. ³² Oto Jepsa o loo rem ko cio kulo Amon manyu i co Lahitok icieng kac kunenge. ³³ O keru inyi kangite keek are; many to Aroer many kalele lo Minis, o lorore many Abel Keramim. Tona o lanyu cio kulo Israel cio kulo Amon. ³⁴ Ka lo yitu Jepsa kalenge Mizpa, ngai lo lotu ki iti rico inyi ka lida ara kito nenge karioni na lo kyeuno o dingo tamburin to kac! Orumu kito nenge inyi na keken, lobito, na lo ru rece, o ru kanece. ³⁵ Ka lo deu apa nenge inyi oto ko cira kyelani kunenge ko ki cira o joo, "Ida jaa, kito nei lohi ture isi nan li sara tau nei. A buti nan diho Lahitok kibutia na lida nan a tum gila." ³⁶ O joo kito nenge diho inyi, "Apa nei, li co isi tenya nino diho Lahitok. I tiyo diho nan tohi na li cik isi iya ene li lenu Lahitok isi iyo merok kunino cio kulo Amon. ³⁷ Ati ki ruhohi nan ene ki lifa bito, ki co nan ofahin are a lor dongecio a cira ko morot kunei tonyio ida cia nan a yemaru." ³⁸ O joo apa nenge diho inyi, "I tum isi loro." Oto ko lahahino inyi o loo to ofahin are. O fwo inyi ko morot kunenge dongecio i cirati tonyio ida cia inyi o yemaru. ³⁹ To korwong lo ofahin are o yitu inyi diho apa nenge i tiyi inyi diho inyi iya na lo teny inyi. I wasihi inyi ara kito na lida o yen retoni. To ene tenya o detore koditi lo cio kulo Israel ⁴⁰ jimitan to karihin fad o fworita tee kariok kulo Israel to faritin ongon lo ki yiunita kito lo Jepsa Gileadani.