¹ To kifwongi lo faritin kulo Abimelek, o woju lobo tungani lo imanit lo Isakar lo bara Tola kito lo Pua, kito lo Dodo lwaha cio kulo Israel. O manya afa inyi Samir na lo ngon kof lo donge lo Epraim. ² O rik inyi Israel to karihin keek are ko uni ko weyaru o nuhahini Samir. ³ I jifahi Jair lo Gilead na lo lotu o rik Israel to keek are ko are. ⁴ O ngon afa inyi ko tee rei kunenge keek uni kuna manyu li feita to sigiriahin keek uni. O lanyu afa icieng kangite keek uni to Gilead. ⁵ Ka lo wei afa Jair, o nuhahini inyi Kamon. ⁶ O fwonu cio kulo Israel i tiyi tohi na i rohoi to ketemoni lo Lahitok ari. I rwaa icieng Baali ko Astorehin, ko lobangahin kulo Aram, lobangahin kulo Sidon, lobangahin kulo Moab, lobangahin kulo Amon ko lobangahin kulo Pelestina. Manyu tona lo ngerihinore cio kulo Israel Lahitok ida o rihe i worati inyi, ⁷ o lotu Inyi i longojihi icieng iti lotohi Inyi icieng kac kulo cio kulo Pelestina ko cio kulo Amon. ⁸ kuna la kari lo fwonu i dony icieng ko boraru icieng. To karihin tomon ko mietauni o fwonu icieng i dony cio kulo Israel kuna lo ngon ngati lo okangere lo Jordan to Gilead kof lo cio kulo Amor fad. ⁹ O rang manyu cio kulo Amor Jordan lo fworo ki iti remo cio kulo Juda, Benjamin ko Epraim; o ngon orumu Israel ko kidak na hitok. ¹⁰ Oto cio kulo Israel ko ki cira diho Lahitok o jimi, "Lohi pal ohoi diho isi, ki ngerihi Lobanga niyang ki rwaa Baali." ¹¹ I nyiahahi Lahitok icieng o joo, "Ka lohi dony afa cio kulo Ijipt, kulo Amor, kulo Amon, kulo Pelestina, ¹² kulo Sidon, kulo Amalek ko kulo Maon ite; i cira ite diho Nan to lwaha, ida afa lahi lwahu ite to kac kuneicieng? ¹³ Ati lohi ngohi ite Nan i rwaa lobangahin kude ake, tona ida cia Nan a rihe ahi lwak ite. ¹⁴ I fwo i cirati iyo lobangahin kuna li nyumu ite, i ngohi icieng ki lwak ite ka li ngoni ite iyo kidak." ¹⁵ Ati o joo cio kulo Israel diho Lahitok, "Lohi pal ohoi. I tiyo diho ohoi tohi na li deu Isi o jir, ati Lahitok ki lwahu ohoi jijia." ¹⁶ Tona i bire icieng lobangahin kulakude kuna lorumu o ngoni kiji neicieng, ko ki rwaa Lahitok. Manyu ida Inyi o rihe o dik mehino lo Israel. ¹⁷ Ka lo yetu cio kulo Amon jore o fwonu o fihahi kem neicieng Gilead, o tubuno Israel o fihahini kem neicieng Mizpa. ¹⁸ O joo cio kulahitoha kulo Gilead diho kenite kuneicieng ake ake, "Tungani na cia li ciak ene remun ko cio kulo Amon, inyi cia lo lanyu cio fad kuna lo manya Gilead."