¹ Oto Jakob ko kilolonguno tee kunenge, oto ojo, "Itotubunoti iyo nan ojir ahirihohi sangite kuna mute litiihino iyo ite faritin kuna mute lofwonuno. ² Itotubati ining, tee kulo Jakob. Itoning apa ningi Israel. ³ Reuben isi Okang nei, kilotir nei, ketemoni lo kitotori lo golun nei. Ilany iyo kwatun, ilany iyo golun. ⁴ Ilotir iya kifi, ida cia isi irihe ilany tonyio lirwok isi logetore lo apa nino, kai lo lohiyomare nei ilo itibot. ⁵ Ara Simeon ko Levi recera, ara ngalemo kuneicieng kiremita kulo kisasuo. ⁶ Kecio nan arutohi iyo kifura neicieng, kecio nan amorahino iyo lotubare neicieng. Tonyio lifad icieng cio iyo kilongo neicieng, manyu ogili kejuha kulo mangi iya na lowahare icieng. ⁷ Ificiori na kilongo neicieng igol ko awo neicieng na imoc. Akokorahi cia nan icieng iyo Jakob, atisarahi cia nan icieng katua lo Israel. ⁸ Juda, kimaj cia recera kunino isi. Ongon cia kana nino murut lo merok kunino. Ogung cia tee kulo apa nino ketemoni nino. ⁹ Ira isi kito lo ngatuny Juda: iitu isi to fada lo tyang kito nei, iya ngatuny ogeto inyi orada kof. Iya ngoto ngatuny, ngai lotum kitiwojuno inyi? ¹⁰ Ida cia iluk lo obolore ingad to Juda kode col lo kalanyunoni to kiji lo kejuha kunenge many olotu inyi na lara iluk nenge, manyu ara cia ningo lo misihi nenge. ¹¹ Otorahi mute inyi sigiria nenge iyo vino ko kito lo sigiria nenge iyo tanitani na lonyumu. Ilala mute inyi kyela nenge to vino, kanyi nenge to okoto lo ngak kulo vino. ¹² Irwohi cia konyeha kunenge ilany vino, ko kala kunenge okweri ilany lei. ¹³ Omanya mute Zebulun tode lo nam ara lohitaware lo tigoli, okaritaru cia lohikori nenge iya ngati lo Sidon. ¹⁴ Ara Isakar sigiria na ilotir na logeto kiji lo twoli kulo kera. ¹⁵ Kolodeu inyi jiran lo lohiyomare nenge, ko dwarujon lo kof nenge, olahahi cia inyi okokoho kunenge iyo ter manyu iruk kipanyar. ¹⁶ Dan mute kangotoni lo tenya to kiji lo cio kunenge iya imanit lobito to Israel. ¹⁷ Ara Dan munu lo kalele lo kikoi, lokuruba na longon kikoi na lotok tutunye lo lakweny icio karwohitani ouroro lohibate. ¹⁸ Atahita nan lwahuno nino, lahitok. ¹⁹ Itirem mute merok Gad ati onyion cia inyi icieng tutunyehin. ²⁰ Ofir mute daha lo Aser, iyauno mute inyi daha na ilem na locam to kabolorok. ²¹ Ara Naptali mirihica na lolaharu, na lotomon kacau kuna idwaruha. ²² Ara Josep ciani lo vino na ingi ijar, ciani kangijani na lonyiha ko ipulak na lirwohita tanitani kiwata lo lohitir. ²³ To dwarun lo taulo itiremo monyeri kulo kawona ongoroti inyi to kijoria lo taulo. ²⁴ Ati iwasihi kawo nenge ogulo, iwasihi kac kunenge golun to kana lo kagoloni lo Jakob, to katibalani, moru lo Israel. ²⁵ To Lobanga lo apa nino na lohilwaha isi, to kagoloni na lohigatahita isi gum; gum lo ilwe na longon kai, gum lo kiluko lo ipulak na longon kof, gum lo ikine ko kocehe. ²⁶ Ilany gum lo apa nino gum lo dongecio kulo lohitwaha, ilany lo dumi ongoro kulafa losio. Ingohi kuno pili iyoma kwe lo Josep, kai lo komom lo lahitok to kiji lo recera kunenge. ²⁷ Ara Benjamin lowoho na ingere okonya tyang na lifade inyi kiwanyi. Okora bara na lobelu inyi kurou.'' ²⁸ Ara kuno fad imaniti tomon ko are kulo Israel manyu ara kuno tenyitenyi kuna loteny apa neicieng na ligatahinore icieng gum, icio lobito lobito kigata lo gum na locam to inyi. ²⁹ Oto ocik icieng kuno tenyitenyi ojo, "Lolelek nan awei, alo iyo cio kunei. Kinuhahi nan ko monyeri kunei idi kunom mana lo Epron Hittitani, ³⁰ kunom na longon mana lo Makpela na lonyiha Mamre, kof lo Kanaan na linyiangu Abraham ko mana nenge ara lonuhare iyo Epron Hittitani. ³¹ Ijia onuhahini Abraham ko ngorwani nenge Sara, ijia onuhahini Isako ko ngorwani nenge Rebeka, manyu ijia anuhahi nan Lea. ³² Na mana ko kunom na longon katua inyianguni afa iyo cio kulo Hittit. ³³ Langun lokeru Jakob cihahino kuno tenyitenyi iyo tee kunenge, ko kinyiahuno kejuha kunenge kai lo lagere. Owiri wirita nenge lo lohicungi ko weyaru olo iyo cio kunenge.