¹ To kifwongi lo kude faritin, orihohi Josep ojimi, "Omwai apa nino.’’ Oto inyi iyaru tee kunenge Manasi ko Epraim ko inyi ara lobito. ² Kolorihohini Jakob ojo, "Lolotu kito nino Josep diho isi", itikwaru Israel golun nenge ko wojuno itongo iyo kigetit. ³ Ojo Jakob iyo Josep, "Lobanga kagoloni, oboto afa iyo nan to Luz to kof lo Kanaan kigatahi nan gum tijia, ⁴ manyu ojo diho nan, "Ahitipit cia nan manyu ahitiboreng isi. Ahitirak cia nan isi ara ilulung lo cio, manyu ahicio isi ene kof ara tohi lolunyot nino ko lotataha kunino to omot nino.' ⁵ Tona, kuno tee kunino are lotomonuni ten to Ijipt orihe nan ida lalotu ene diho isi, ikenihini cia ara kunei. ⁶ Kude tee cia lohitomohini isi to omot neicieng, icieng lara kunino. Iyo kof na lomanya icieng, ikenahini cia icieng iyo recera kuneicieng. ⁷ Kunu faritin laitunore nan to Padan Aram, to kitoyo na hitok owei Racel to kof lo Kanaan orihe kingoni kikoi lohinyiharu Epras. Nan ko nuhahino inyi kalele lo kikoi lo Epras'' ( na lara Betelehem). ⁸ Kolodeu Israel tee kulo Josep, itifi ojo, "Oho ngai kuno?" ⁹ Inyiahahi Josep apa nenge ojo, "Ara icieng tee kuna lohicio Lobanga nan ten." Oto Israel ojo, "Iyauno icieng diho nan ojir agatahi icieng gum." ¹⁰ To kuna faritin orumu Israel lofafari konyeha manyu lida otum deya. Oto Josep iyauno tee kunenge tang diho inyi, imaruk apa nenge icieng. ¹¹ Ojo Israel diho Josep, "Ida orumu nan ayen jimitan ade cia komom nino ari, ati jijia lohicio Lobanga nan adeu ko tee kunino." ¹² Tinya Josep ko tinguno icieng to kunga kulo Israel ko gungon many otir komom kof. ¹³ Oto Josep odumu icieng are fad otek Epraim to iteten nenge iya ikajong lo apa nenge ko Manasi to ikajong nenge iya iteten lo Israel oto iyauno icieng tang iyo Israel. ¹⁴ Ati ocule Israel kana nenge iteten ofik kue lo Epraim, kileng lara inyi lasidi ko kitibahasa kac kunenge ofik kana nenge ikajong kue lo Manasi kileng lara Manasi okang. ¹⁵ Oto inyi igatahi Josep gum ojo, "Ingohi Lobanga lafa litibala monyeri kunei Abraham ko Isako ijif icieng to kigenoro. Lobanga lafa lara katibalani nei iyo warun nei fad ko ene far. ¹⁶ Malaika na lohilwahu nan iyo rohojita fad, ingohi inyi igatahi kuno tee gum. Ingohi ilolongi icieng to karana nei ko to karana lo monyeri kunei Abraham ko Isako, manyu ingohi icieng opit osodoro oborengi bebe to kof." ¹⁷ Kolodeu Josep apa nenge ofik kana nenge iteten kue lo Epraim, ida tau nenge okwe. Oto inyi odumu kana lo apa nenge to kue lo Epraim ofik kue lo Manasi. ¹⁸ Ojo Josep iyo inyi, "Ida apa nei, ene lara kito okang, to fik kana nino iteten kue nenge." ¹⁹ Ati oberu apa nenge ojo, "Ayen nan kito nei, ayen nan. Ara manyu mute inyi ilulung manyu obolo manyu mute inyi. Ati obolo mute rece na sidi ilany inyi, manyu ara mute lotataha kunenge ilulung lo misihi." ²⁰ Igatahi inyi icieng gum la far ojo, "To karana nino igata mute Israel ene gum, ingohi Lobanga kitirak isi iya Epraim ko Manasi." Tona ofik inyi Epraim ketemoni lo Manasi. ²¹ Oto Israel ojo iyo Josep, "Lanyiha nan weyaru, ati kingon cia Lobanga ko ite manyu kinyiahe mute ite kof lo monyeri kuningi. ²² Manyu iyo isi asodohi nan ingutit lobito lo kof ilany na lacio nan recera kunino, ingutit lo kof lafa laruju nan iyo cio kulo Amor to ngalem ko kawo nei.''