¹ Tinyia ocik Josep kaririani lo kaji nenge ojo, “Itifuta okodoho kulo kuno cio iya na lotum icieng kiyuhita, manyu tofik robia kulo tungani Lobito Lobito kutuk lo okodo nenge. ² Itohati ifihahi kubaya nein a litongo ara rial kutuk lo okodo lo na sidi ilany, ara Lobito ko robia kunenge kulo ngamang.’’ Oto inyi itii iya na locihare Josep. ³ Kolowangu kiwanyi, iniemahini kuna cio ko sigiriahin kuneicieng. ⁴ Orihe orumu icieng ida lofwo to taya na lorihohinore Josep karwaani nenge ojo, “Ilo omot lo kuna cio deu manyu kalitihoru isi icieng, torihohi icieng tijio, “Nyio idum ite jiran to rohojun? ⁵ Ida inyi na kubaya omatitare lahitok nei manyu ilamare? ara ene tohi na irohoi litii ite.’’ ⁶ Kalitihoru inyi icieng inyiahat kuna tenyi tenyi iyo icieng. ⁷ Ati ojo icieng iyo inyi, “Nyio otenya lahitok tenyi tenyi kuna lori iya kuna? Ida ohoi karwaak kunino kitum kitiyo tohi na lori iya na. ⁸ Kinyiahu manyu afa ohoi many to kov lo Kanaan robia kulafa lohirumu ohoi kutuhe kulo okodoho kuniyang. Dong nyio ngohicio ohoi kikoko rial kode dah aba to kaji lo lahitok nino? ⁹ Kolorumuno ene kubaya iyo lobo to kiji lo karwaak kunino ojir inyi owei manyu ohoi kulakude kira karwaak kulo lahitok niyang.’’ ¹⁰ Ojo inyi iyo icieng, “Ojir bebe ingohi tori iya na lijo isi. Na lorumuni otehita inyi cia lara karwaani nei; ite kuna kude ilaharu iyo tenya.'' ¹¹ Itau icieng okodoho kuneicieng deu deu, ongaji manyu. ¹² iciak dong na karwaani tahita okodoho, iciak to lahitok manyu iyo lasidi. Oto orumahini kubaya iyo okodo lo Benjamin. ¹³ Deunoti jii ko cirati kyelani kuneicieng. Oto ko tingohino okodoho iyo sigiriahin oitori iya taya. ¹⁴ Orumu Josep orihe ongon kaji koloitu Juda ko recera, ko urohinoti kof ketemoni nenge. ¹⁵ Ojo Josep iyo icieng, “nyio ene litii ite? Ida ite iyen ijo otum tungani na lori iya nan heruno sangite to kilama?” ¹⁶ Inyiahahi Juda inyi ojo, “Nyio ha ngateny nan iyo lahitok nei? ngohitum ohoi peha aja? Litibotu Lobanga kipal lo karwaak kunino. Lohira dong ohoi opiihin kulo lahitok niyang- ohoi to kenite kuniyang ko ladi lorumuni otehita kubaya.’’ ¹⁷ Ati ojo Josep, “Ida nan atum kitiyo tohi na lori jii! inyi ladi tungani lorumuni otehita kubaya ake lara opii nei ite kuna kude ifwo iyo apa ningi to kisiliban.’’ ¹⁸ Oto Juda ko loro many iyo inyi ojo, “Tolau karwaani nino lahitok ingohi arihohi nan tenya iyo lahitok nei. Kelongojihi karwaani nino kileng liri isi ko Parao token. ¹⁹ Itifi afa lahitok nein karwaak kunenge ojo, “Ingon ite ko apa ningi kode ko rece? ²⁰ Kinyiahahi ohoi kijio, “kingon ohoi ko apa niyang na longoroyon manyu ongon kito nenge na lotomonohini to ongoroyone nenge. Lowei afa rece manyu inyi lara kito lo iyang nenge Lobito hilong manyu imaru apa nenge inyi.’’ ²¹ Tinyia isi ko jimitan iyo karwaak kunino, “Iyaunoti inyi ojir nan to ken nei adeu inyi.’’ ²² Manyu kijo ohoi iyo lahitok niyang, “Ida nu kito otum kingohino apa nenge. Kolongerihi inyi, owei cia apa niyang.' ²³ Ati irihohi isi karwaak kunino ijo, “Many kalilihu ite ko rece ningi na sidi koloru ida cia ite ide komom nei ari.’’ ²⁴ Langun lohiite ohoi iyo karwaani nino apa nei, kirihohi ohoi inyi tenya na litany isi lahitok nei. ²⁵ Tinyia ojo apa niyang, “Itoite ifwo inyiangunoti daha lobo sidi ari.’’ ²⁶ Ati kijo ohoi iyo inyi, “Ida ohoi kitum fworo. Manyu kolohilik ohoi ko rece niyang na sidi inyi ha ohoi kifwo. Ida ohoi kitum deya komom lo nu tungani many kolohingon ohoi ko rece niyang na sidi.' ²⁷ Ojo karwaani nino apa nei iyo ohoi, “iyen ite jimitan kitomonohi afa ngorwani nei nan tee rei are. ²⁸ Olo afa Lobito iyo nan, manyu ajo nan, “Lokonye itira inyi, manyu lida nan adeu inyi many to nu ²⁹ kaliyaru manyu ite ene to ketemoni nei oto hati lobo tohi itiihino ken nenge ito cia ite icio nan ayaru kwe nei na ikwe tula to kidak.’ ³⁰ Dong jijia ka lida ene kito kifwo ko nan kolohiitoro ohoi iyo karwaani nino apa nei manyu apa nein a lorifa warun nenge ara Lobito ko ene kito ³¹ kolodeu ojo oru kito, oto cia owei. ³² Locik afa karwaani nino rican lo warun lo ene kito iyo apa nei: ajo nan, “kalida nan anyahuno inyi iyo isi, ato cia nan ating mongiyo nenge to ketemoni nino apa nei karihin kulo warun nei fad.' ³³ Dong jijia lahitok, ingohi karwaani nino totong ene ara opii lo lahitok faji lo ene kito ojir ene kito oite ko recera kunenge. ³⁴ Aja cia nan aite iyo apa nei kalida ene kito kingon ko nan? Ida! Kecio nan ade mehino na cia ngolotu iyo apa nei.