¹ Tona orihe orumu kinga obolo bebe kov. ² Oto hati, langun lokeru icieng daha ngamang fad kuna lorumu liyauno icieng to Ijipt, ojo apa neicieng, “Itoite ifwo kinyiangahi ohoi ngamang kude kuting ari.’’ ³ Ati ojo Juda iyo inyi, “kicik nu tungani ohoi rik rik ojo, “ida cia ite ideu komom nei ari kalida ite ilihu ko rece ningi” ⁴ kalicule isi rece niyang ko ohoi kifwo ciao hoi kinyianguno daha iyo isi. ⁵ Ati kalida isi icule inyi ida ciao hoi kifwo tonyio ojo nu tungani iyo ohoi, “ida cia ite ideu komom nei kalida ite ilihu ko rece ningi.’’ ⁶ Itifi Israel ojo, “Nyio iyauno ite kidak iyo nan to rihohino nu tungani ijio ingon ite ko rece lobo?” ⁷ Inyiahahi icieng ojo, “Kitifi nu tungani ohoi bebe to kenite kuniyang ko kaji niyang ojo, “Orihe apa ningi owar? Ingon ite ko lobo rece?” Kinyiahahita orumu ohoi kitifita kunenge keken. Orumu ohoi kiyen aja jimitan ojo cia inyi iyo ohoi, “Iyaunoti rece ningi ene?” ⁸ Oto Juda ojo iyo apa nenge Israel, to cule kito ko nan ito ciao hoi kifwo deu, ojir ohoi ko isi ko tee kuniyang ida owei ati owar. ⁹ Nan token cia laricuno warun nenge. Itum isi kitifia nan to inyi. Kalida nan anyiahuno inyi iyo isi, atiwoitahi inyi ketemoni nino, ating cia nan mongiyo nenge to ketemoni nino to warun nei fad. ¹⁰ Jijia, ngida ohoi kiminingaru jii ohoi lohifwo kiitu kakeny are.’’ ¹¹ Oto apa neicieng Israel ojo, “Kolojir ori jii, ojir itii iya ene; itofik kude sangite ijiri tone kof iyo okodoho kuningi iyaru iyo nu tungani ara kiciorita, ngoroni na iur lobo sidi, otoro, soya ko iheru ko ngak kulo cianitok. ¹² Iyaroti robia kakeny are tonyio ojir ite inyiahe kulafa robia lofihahini kutuhe kulo okodoho kuningi. Ngai loyen itongo nyafa ara to ringaru. ¹³ Iyaroti manyu rece ningi ifwo deu iyo nu tungani. ¹⁴ Manyu ingohi Lobanga na lolanyu fad kicio ite irumu kisa to ketemoni lo nu tungani ojir kilahahi ite nu rece ningi ko Benjamin iitu ara Lobito. Kalara to nan, kolorohoi iyo nan, orohoi.’’ ¹⁵ Tona odumu kuna cio kiciorit, osodi robia ko Benjamin manyu. Oruharu icieng iya Ijipt itotorihini kenite iyo Josep. ¹⁶ Kolodeu Josep icieng ilihu ko Benjamin, oto ojo iyo karicani lo kaji nenge, “Yaru kuno cio kaji nei, tongot kine manyu ikukuma daha, tonyio ojir icieng kidaha ko nan cia far.’’ ¹⁷ Itii na tungani iya na lorihohinore Josep inyi manyu iyaru kuna cio iya kaji lo Josep. ¹⁸ Tinyia obang kuna cio kaliyaroti icieng kaji nenge. Ibuha icieng ojo, “Kiyaunoti ohoi ene to kulafa robia linyiahahini okodoho kuniyang afa ketemoni. Owak inyi kipusohino ko lanyuno ohoi kitirak ara opiihin kunenge ko kiyaru sigiriahin kuniyang.’’ ¹⁹ Oto icieng ofwo iyo katiyoni lo Josep otenyati ko inyi to agwala lo kaji. ²⁰ Ojo icieng, “kining ohoi lahitok niyang, kifwonu afa ohoi ene ketemoni kinyianga daha. ²¹ Ati nu faji lohigetore ohoi, kinga ohoi okodoho kuniyang ko rumuno robia kuniyang kutuhe kulo okodoho kuniyang fad robia to tuban. Dong lenyiahuno ohoi. ²² Kiyauno manyu ohoi robia kuna kude kinyiangare cia daha. Ida ohoi kiyen ngai lofik robia kuniyang iyo okodoho kuniyang.’’ ²³ Ojo na tungangi iyo icieng, “Ojir, kebangi, Lobanga ningi, Lobanga lo apa ningi licio ite robia kuningi.’’ Oto olo iyauno Simeon oleng iyo icieng. ²⁴ Iyaru na katiyoni kuna cio kaji lo Josep, icio icieng kifi kulo kilala lo kejuha manyu icio daha iyo Sigiriahin kuneicieng. ²⁵ Ikukumahi icieng kiciorita kuneicieng itilarihin lotunore lo Josep kil lo far tonyio orumu icieng loning ojo kidaha cia icieng ijia. ²⁶ Kololotu Josep kang icio icieng inyi kiciorita kuneicieng kuna liyauno icieng kaji hatwa manyu ogungiti kof ketemoni nenge. ²⁷ Itifi inyi icieng lo yenun kolongoni icieng ara na ijir manyu ojo, “Aja ngoroyoni, apa ningi lafa lohirihohi ite nan? Orihe inyi owar? ²⁸ Inyiahahi icieng inyi ojo, “Orihe karwaani nino apa niyang owar manyu ongon ara na ijir.’’ Manyu ogungiti many rubuhon ketemoni nenge. ²⁹ Koloher inyi icieng odeu rece nenge Benjamin kito lo iyang nenge token, itifi inyi ojo, “Inyi rece ningi lasidi ene lafa litany ite iyo nan? Ko jimitan iyo inyi, “Ingohi Lobanga kilwak kito nei.’’ ³⁰ To kwama lo deuno rece, oruharu Josep tinyia otaharu faji lohicirare. Olo inyi kudule lo kaji nenge olo kicira ijia. ³¹ Langun lilal inyi komom nenge, orutu oleng idony tau ko jimitan, “Iyaunoti daha.’’ ³² Okorahini inyi daha nenge ake, recera manyu ake ko cio kulo Ijipt kuna lodahita kalenge manyu ake, tonyio ida cio kulo Ijipt odahita ko cio kulo Ibru tonyio odua iyo cio kulo Ijipt. ³³ Opar orumu kuna cio ketemoni nenge ijifita karihin ko otomonehin kuneicien, kiciaha iyo lahitok many iyo lasidi: oto icieng ode kenite kuneicieng to kipany. ³⁴ Langun lokorati daha iyo icieng to meja lo Josep, ara ikorit lo Benjamin kakeny miet na lilany kulo kuna kude cio. Oto icieng odaha manyu omatati to kisiliban ko inyi.