¹ To kifwongi lo kude faritin, ipal kaniefitani lo kubaya ko kafunani lo mugatihin kulo kabu iyo lahitok neicieng, kabu lo Ijipt. ² Ilongo afa Parao iyo kuno kulahitoha kulo tic lo kalenge; lahitok lo katehitak kulo kubaya, ko lahitok lo kafunak kulo mugati ³ ko torahino icieng mabus kaji lo lahitok lo kaririak, iyo na mabus bito lotorare Josep. ⁴ Icio lahitok lo kaririak icieng iyo Josep oricahi dong inyi icieng. Langun litong icieng katua lo mabus iyaru kude faritin, ⁵ ofwonu icieng kuna cio are; lahitok lo katehitak kulo kubaya ko lahitok lo kafunak kulo mugati kulo Parao ongon ko kitirija iyo karue lobito manyu ongon kitirija kuneicieng ko fotiricio gelegele. ⁶ Kololotu Josep iyo icieng kiwanyi odeu icieng idisi komoma, ⁷ oto inyi itifi icieng kulahitoha kulo Parao kulorumu lo tora ko inyi kolo lahitok lenge ojo, "Nyio ipalaru komoma kuningi ele far jii?" ⁸ Inyiahahi icieng ojo, "kingoni adi ohoi are fad ko kitirija, ati oru lobo tungani ngohilahahi ohoi tenyitenyi kuneicieng." Oto Josep ojo diho icieng, "Ida re Lobanga lolaha kitirija? Kirihohiti nan kitirijiti kuningi." ⁹ Oto lahitok lo kaniefitak kulo kubaya ititimahi Josep kitirija nenge ojo, "Iyo kitirija nei adeu nan ciani lo vino ketemoni nei ¹⁰ manyu ocar na ciani tanitani uni. Deudeu okwerihi na ciani lo vino ko ngijuno ngak otohoro manyu. ¹¹ Orumu kubaya lo Parao ongon kana nei, nan ko dyeuno kuna ngak lotohoro ko kipiyahino iyo kubaya lo Parao acio manyu kubaya kana nenge." ¹² Ojo Josep diho inyi, "Fotiri lo na kitirija nino inyi ene. Kuna tanitani uni icieng faritin uni. ¹³ To faritin uni, kilak cia Parao isi kinyiahahi faji lo tic nino manyu ilo cia isi ifik kubaya kana lo Parao iya lafa litiititare isi lirahare katehitani lo kubaya nenge. ¹⁴ Ati kalojir cia diho isi, kiiu nan kitotorohi nan lwaha kiletohi nan diho Parao kilahe nan tone mabus. ¹⁵ kirosuni nan kiyauno to kof lo cio kulo Iburu, manyu kileng ten oru tohi na lapal nan acamare tora mabus." ¹⁶ Kolodeu lahitok lo kafunak kulo mugati jimitan lolahahini kaniefitani lo kubaya ara na ijir, ojo inyi diho Josep, "Kitirija manyu adi nan ojo ayuhita nan aduhuhin uni to kue kuna longoni mugati katua. ¹⁷ Iyo aduhu na licadoho to kai, ongoni koditihin kulo mugati fad kulo Parao ati okwara kweny kuna mugati to aduhu to kue nei." ¹⁸ Ojo Josep, "Fotiri nenge inyi ene, ara kuna aduhuhin uni faritin uni. ¹⁹ To faritin uni kilahu cia Parao isi kigore to ihahino iyo kete, manyu ofwonu cia kweny onyia tyang lo ken nino." ²⁰ Dong ara afa far lo uni far lo otomone lo Parao, manyu ofik inyi karama na lotubu kabolorok kulo kof nenge fad. Olak inyi lahitok lo kaniefitak kulo kubaya nenge ko lahitok lo kafunak kulo mugati nenge to ketemoni lo kabolorok kunenge. ²¹ Inyiahahi inyi lahitok lo kaniefitak kulo kubaya nenge faji nenge ojir inyi oitohi kicorihita kubaya lo Parao kana nenge, ²² ati ogore inyi lahitok lo kafunak kulo mugati iya na lolahahinore Josep icieng to mabus. ²³ Ida hati lahitok kaniefitani lo kubaya iiu Josep, oluluhi inyi.