1
Koloring karihin are, itirija Parao ojo, "Awoita nan tode lo nam Nail
2
ato adeu kicu mietare ofwonu to katua lo nam kuna ifiri onyuji odahati kiji lo odada to kutuk lo kare.
3
To kifwongi neicieng ofwonu manyu kicu kunakude mietare to katua lo nam kuna imotaha ikarami orohori owoitati kiji lo kuna adi kude kutuk lo kare.
4
Kuna kicu imotaha ikarami irohori ko daha kuladi ifiri inyuji. Tinyia Parao ko kwenyuno.
5
Ogetoro inyi ari oto itirij kitirija lo are: odeu kueci kulo ngamang mietare kuna ingiji many ifuti nyige kuna lowoju iyo bahalie lo ngamariti lobito.
6
To kifwongi neicieng ofwonu kueci kulo ngamang kunakude mietare kuna lifohe kuna lojurute kiyoma lo ngati lo okangere.
7
Odile kuna kueci kulo ngamang mietare kuladi ingiji lifuti. Parao ko kwenyuno, orumu ojo ara kitirijia.
8
Okwenyu inyi na kiwanyi ome tau oto ko cularu tenya ilolongu ibwonok ko kagenyak kulo kof lo Ijipt fad. Orihohi Parao icieng kitirijiti kunenge ati oru tungani lotum lahahino inyi.
9
Oto lahitok lo kaniefitak kulo kubaya ojo iyo Parao, "Ene far lohiti iiu nan lulworita lo kue nei.
10
Afa ka lilongo Parao iyo karwaak kunenge, kitorihi nan ko lahitok lo kafunak kulo mugati kaji lo lahitok lo kaririak.
11
Kitirija ohoi lobito karue manyu ongon kitirijiti kuniyang ko fotiricio gelegele.
12
Ongon afa lobo Iburuni lokilahaji ko ohoi ara lobito ijia, na lara karwaani lo lahitok lo asegere kaririak. Kirihohi ohoi inyi kitirijiti kuniyang, Kilahahi inyi ohoi; icio tungani lobito lobito fotiri lo kitirija nenge.
13
Itiihino iya na lotenyare inyi token; kinyiahahini nan faji lo tic nei, ogorori lafa kaletoni nei."
14
Tinyia ocule Parao cio iyamaru Josep, ko kiyaunoti inyi deudeu to mabus. Langun logit inyi kue ko musula ibel ko kyelani, olotu inyi ketemoni lo Parao.
15
Ojo Parao diho Josep, "Kitirija adi nan oto hati oru tungani lohilahahi nan, ati aning nan ojimi kalining isi kitirija itum isi laha fotiri nenge."
16
Ojo Josep diho inyi, "Ida nan atum laha, ati icio cia Lobanga Parao kinyiahit na lotahita inyi."
17
Oto Parao ojo diho Josep, "Iyo kitirija nei, awoita nan tode lo nam Nail
18
oto kicu mietare orutu to katua lo nam kuna ifiri inyuji odahati iyo odada kutuk lo nam.
19
To kifwongi neicieng ofwonu kunakude kicu mietare kuna imotaha ikarami orohori, ida nan ladeu kude kicu irohori iya kuna to kof lo Ijipt fad.
20
Onyia kuna kicu imotaha kuladi kicu ifiri litemu.
21
Ati kileng lonyia icieng kuna ifiri ida obotoho mejo lonyiai tonyio iwasihi icieng orohori omotaha jii. Nan ko kwenyuno.
22
Iyo kitirija nei adeu nan kueci kulo ngamang mietare kuna ijiri ongiji ifut iyo ilupeti lobito.
23
To omot neicieng ofwonu kunakude kueci kulo ngamang mietare kuna lifohe oweiha ojurute kiyoma lo ngati lo Okangere.
24
O fwonu kuna kueci kulo ngamang mietare lifohe odile kunadi ingiji ijiri. Arihohi nan ene tenya diho ibwonok ati oru lobo lohititimahi nan fotiri nenge.''
25
v 25 Oto Josep ojo diho Parao, "Ara kitirija kulo Parao lobito manyu oriworo. Litotorohi Lobanga Parao tohi na lo loro inyi kitiyo
26
Ara kuna kicu mietare ifiri karihin mietare, manyu kuna kueci kulo ngamang mietare ingiji ara karihin mietare. Ara kitirijit na iriworo manyu lobito.
27
Ara manyu kuna kicu imotaha mietare lo fwonu to katua lo nam to kifwongi karihin mietare, icieng manyu kuna kueci kulo ngamang mietare lifohe kuna lojurute kiyoma lo ngati lo Okangere ara karihin mietare kulo kinga.
28
Ori cie iya ladi larihohinore nan Parao, litotorohi Lobanga Parao tohi na lolo inyi kitiyo.
29
Ofwonuno karihin mietare kulo samun na hitok kof lo Ijipt fad.
30
ati ijifu cia karihin mietare kulo kinga icieng. Oto cia na samun hitok to kof lo Ijipt oluluhini manyu ipale mute kinga kof
31
Ida mute iiuni na samun hitok tonyio orohoi cia kinga na lolotu to kifwongi noo.
32
Tohi na licio inyiahati ene kitirija diho Parao kakeny are itotoro jimitan ogol ene tenya noo manyu lokeru Lobanga fiha iyo tic manyu itiihino cia to kuno faritin tang.
33
Dong jijia, ingohi Parao to tahu tungani na igeny ilefere ofik inyi olanyu kof lo Ijipt.
34
Ingohi Parao to nyumu cio kuna lobolorohi kof ojir osofuni lobito iyo miet lo daha na lodo kof lo Ijipt to kuno karihin mietare kulo samun.
35
Ojir icieng osofu daha lo kuno karihin mietare kulo samun oricahini kuno ngamang iyo twero lo Parao ojir ikumahini iyo tayahin ara kulo daha.
36
Ojir ene daha oricahini ara moto lo kof na lolwaharihin kof to kulo karihin mietare kulo kinga kuna lofwonuno kof lo Ijipt, ojir kinga ida ipale kof.
37
Ori na kikukuma mejo ojir iyo Parao ko kula hitoha kulenge fad.
38
Oto Parao itifi icieng ojo, "Kitum ohoi rumuno lobo tungani lori ko ele tungani na longon ko Okorif lo Lobanga?"
39
Oto Parao ojo diho Josep, "Iya na lohitotorohinore Lobanga isi kuno tenyitenyi, oru lobo tungani logeny ilefere iya isi.
40
Ilanyu cia isi kang lo okabwe nei manyu ojir cio fad oning tenya nino. Ara to seger lo okabwe jia ahilanyunore nan isi."
41
Oto Parao ojo diho Josep, "Tone ahifiha nan isi ara kalanyunoni lo kof lo Ijipt fad."
42
Tinyia opucu Parao iyenit kimadit nenge to kafiele nenge opucahi kafiele lo Josep. Iticef inyi kanyihin kulo kyela iribi ko pucahino tongos lo dahab murut nenge.
43
Icio inyi ifeita to gadigadi ara kajifitani nenge ko cio irienga to ketemoni nenge ojo, "Itigany kikoi" Tona ofik inyi ara kalanyunoni lo kof lo Ijipt.
44
Parao ko jimitan diho Josep, "Nan Parao ati ka lida ara to tenya nino, oru tungani loting kana kode keju to kof lo Ijipt fad."
45
Itibarahi Parao Josep ojo, Zapenas Panea, manyu iciorihi inyi Asenas kito lo Putifera, kadwarani lo On ara ngorwani nenge. Manyu ilor Josep kof lo Ijipt fad.
46
Orumu Josep lara karihin keek uni na lorutohinore inyi tic iyo Parao kabu lo Ijipt, manyu olo Josep to ketemoni lo Parao ilor kof lo Ijipt fad.
47
To kuna karihin mietare, odo kof racak.
48
Otubu Josep daha lo kuna karihin mietare kulo samun to kof lo Ijipt oricahi iyo derona kulo imiri to tayahin. To taya lobito lobito oricahi inyi daha iyo dero lo imiri na lodo iyo na kof lirit na taya.
49
Oricahi Josep samata - daha na hitok na lori iya singeti to tode lo nam. Obolo daha olanyuno ko kigero nenge tonyio ida otemuno.
50
Orihe karihin kulo kinga ida lofwonu, otomonu Josep tee rei are ko Asenas kito lo Putipera kadwarani lo On.
51
Itibarahi Josep okang nenge ojo Manasi, jimitan, "Tonyio lohicio Lobanga nan alulworo iyo kidak nei ko kolo apa nei fad."
52
Oboi nenge Itibarahi inyi ojo Epraim, jimitan, "Tonyio lohitipit Lobanga nan nan to kof lo kidak nei."
53
Ofwonu karihin kulo samun to kof lo Ijipt icung,
54
manyu iciak karihin mietare kulo kinga iya na afa lotenyare Josep. Ongon afa kinga kofikofi fad ati Ijipt ongon ko daha.
55
Langun liciak kof lo Ijipt kimanga kinga, iciak cio kicira iyo Parao to tenya lo daha. Oto Parao ko rihohino cio kulo kof lo Ijipt fad ojo, "Ifwo iyo Josep, manyu itiyoto tohi na lorihohi inyi ite."
56
Langun li sarahi kinga kof fad, onga josep derona kulo imiri iciak kitilotohino cio kulo Ijipt ngamang tonyio orumu kinga lolanyuno to kof lo Ijipt fad.
57
Manyu ofwonu cio to kofikofi fad Ijipt kinyianga ngamang iyo Josep, tonyio orumu kinga olanyuno kofikofi fad.