¹ Tinyia iyari Josep iya Ijipt. Olo Putifar Ijiptoni lahitok lo karemok kulo Parao, Kaboloroni lo kaririak kunenge inyiangu inyi iyo cio kulo Ismail kuna liyaru inyi ijia. ² Ongon orumu Lahitok ko Josep icio inyi otenu manya kolo lahitok nenge Ijiptoni. ³ 3 Kolodeu lahitok nenge ojo ongon Lobanga ko Josep manyu ititenu inyi sangite fad kuna litiyo inyi, ⁴ orumu Josep kisisio to ketemoni nenge ko kitiraha inyi ara kaririani nenge. Ofik Putifar inyi ara kalanyunoni lo kalenge ko fiha sangite kunenge fad kac kunenge. ⁵ Kiciaha to faritin kuna lofihahinore inyi Josep ara Kaboloroni lo kalenge ko kalanyunoni lo sangite kunenge fad, igatahi Lobanga gum kolo na Ijiptoni to Josep. Ongon orumu gum lo Lobanga iyo sangite kulo Putifar fad kuna longoni kaji ko mwang. ⁶ Tona ongerihi Putifar sangite kunenge fad kana lo Josep, to rica lo Josep ida inyi iudo lobo tohi ara na loyen inyi daha ko kutuk nenge keken. Naha, orumu Josep ara kito lokilahaji na ifufu odwaru manyu noo. ⁷ To kude faritin odam ngorwani lo lahitok nenge inyi ko jimitan iyo inyi, "Ou kigetore nan!" ⁸ ati oberu inyi orihohi inyi ojo, "To lanyuno nei ida lahitok nei ibuha lobo tohi to kaji nenge; sangite kunenge pili lofik iyo lanyuno ko rica nei. ⁹ Oru lobo tungani lobolo tone kaji kilany nan. Oru lobo tohi lomitere lahitok nei iyo nan, ara isi keken tonyio ira isi ngorwani nenge. Aja hati ngatii nan ene tohi ibot to ketemoni lo Lobanga?" ¹⁰ Kileng isufa inyi Josep faritin fad, oberu Josep geto ko inyi kode kileng nyiha faji na longon inyi. ¹¹ Lobo far bito, olo Josep kajihatua kitiyo tic nenge manyu oru lobo karwaani lo kang longon ijia kajihatua. ¹² Inyi ko kiniefa kyela lo Josep, ipihita inyi ojo, "Ou kigetore nan." Ati inyi ko kifejaru iya sita opucahi kyela nenge kac kunenge. ¹³ Kolodeu na ngorwani ojo lopucahi inyi kyela nenge kac kunenge, manyu life iya sita, ¹⁴ ilolongu inyi karwaak kulo kaji nenge ko jimitan iyo icieng, "Itode iyauni ele Iburuni ene iyo ohoi lo kisongare ohoi! Olotu ene kiwak getore nan, nan ko kiluluo. ¹⁵ Ojo oning nan aluluo ajo ojir kilwahi nan, ko kifejaru sita ingohi kyela nenge inyia iyo nan." ¹⁶ Otun inyi kyela lo Josep many olotu lahitok nenge kang. ¹⁷ Inyi korihohino retoni nenge ene tenya, ojo, "Na karwaani Iburuni linyiangu isi lolotu kisongare nan. ¹⁸ Ati ojo nan alulu ojir kilwahi ko ngerihino kyela nenge inyia Langonore nan, ife iya sita." ¹⁹ Koloning lahitok lenge tenya na lorihohi ngorwani nenge inyi, ojo, "Kitii karwaani nino nan jii?" ocuraru inyi ko kilongo noo. ²⁰ Iyaru lahitok lo Josep inyi olo ofik mabus na lotorarihin mabusi kulo kabu. Ati kolongon Josep ijia mabus. ²¹ Ongon orumu Lahitok ko inyi, itotorohi inyi jiran manyu icio inyi kisisio to ketemoni lo karicani lo mabus. ²² Tinyia ofik karicani lo mabus Josep obolorohi mabusi kuna lotora inyia fad. Manyu ara inyi lolanyu sangite fad kuna litiihino ijia. ²³ Ida karicani lo mabus ibuha tohi na longon iyo twero lo Josep, tonyio ongon Lahitok ko Josep manyu icio inyi tenuno iyo sangite kuna litiyo inyi fad.