¹ To kuna faritin, ongerihi Juda recera kunenge olo kitongo ko lobo tungani to Adulam lobara Hira. ² Tijia iric Juda ko kito ngorwani lo lobo Kanaanani lobara Sua. Oyem inyi na kito itongo ko inyi. ³ Ifonga inyi otomonu kito retoni la lobara Er. ⁴ Ifonga inyi ari otomonu kito retoni itibarahi karana nenge ojo Onan. ⁵ Otomonu inyi kito retoni lobo ari itibarahi ojo Sela. Otomonohi inyi lobo faji lobara Kezib. ⁶ Itiyemahi Juda kito nenge okang Er ngorwani la lobara karana nenge Tamar. ⁷ Ati Er okang lo Juda orumu ara tungani na irohoi to ketemoni lo Lobanga, Lobanga ko kifadaru inyi. ⁸ Oto Juda orihohi Onan ojo, "Tojung ngorwani lo rece nino ojir itomonu tee itihu kue lo rece nino." ⁹ Ati oyen Onan jimitan ida cia tee ara kunenge. Tona kologeto inyi ko ngorwani lo rece, ijuhohita inyi kula kunenge kof lo kitiho tomonohino rece tee. ¹⁰ Na tohi litii Onan, ibot to ketemoni lo Lahitok. Tona ifade Lahitok inyi manyu. ¹¹ Orihohi dong Juda kokwa nenge Tamar ojo, "Ilo itongo ara lafuserito kolo apa nino many obolo kito lei Sela." Tonyio orumu inyi iiyo ojo, 'Ngowei ha manyu cia ele iya recera'. Tona olo Tamar manya kolo apa nenge. ¹² To kifwongi lo faritin beciek, owei ngorwani lo Juda, kito lo Sua. Langun lokeru Juda kitoyo, olo inyi iya Timna iyo cio kulafa logita kera kunenge, manyu ilihe inyi ko morte lenge Hira lo Adulam. ¹³ Kolorihohini Tamar ojo, 'Oloro kokonyi nino iya Timna gita kera kunenge', ¹⁴ opuce inyi kyelani kulo kitoyo nenge, imuk ken to tirika lo kitirijoro komom nenge ko loro kitongo lokoli lo taya lo Enaim na longon kikoi na loloro Timna. Tonyio odeu inyi jimitan kileng lobolo Sela, orihe ida kiciori inyi ara retoni nenge. ¹⁵ Kolodeu Juda inyi, iiyo ojo ara ba mulayani tonyio imuk inyi komom nenge. ¹⁶ Ida inyi oheru jimitan ara ene kokwa nenge, ogere diho inyi kalele lo kikoi, ojo diho inyi, "Ou ngatigetoti." Itifi inyi ojo, "Nyio cia icio isi nan to geto ko isi?" ¹⁷ Inyiahahi inyi ojo, "Aculu cia nan purnoti lo kine to twol nei." Itifi inyi ojo, "Icio ca isi nan lobo tohi loterot many iculunore isi na kine?" ¹⁸ Itifi inyi ojo, "Nyio nu tohi loterot ngahicio nan isi?" Inyiahahi inyi ojo, "Iyenit nino ko kofite nenge ko na iluk to kana nino." Oto inyi icio kuna sangite diho inyi, ogeto ko inyi, itifong inyi. ¹⁹ Langun loite inyi olo odume tirika kimuhi ko kiciefo kyelani kulo kitoyo ari. ²⁰ Tinyia oculu Juda na purnoti lo kine iyauno morte nenge na Adulamani ojir inyiahe kuna sangite loterot iyo na ngorwani, ati ida orumu inyi. ²¹ Itifi inyi cio kuna lomanya ijia ojo, "Aji ongon lobo ngorwani mulayani ngun litongita kalele lo kikoi lo Enaim?" Inyiahahi icieng ojo, "Oru ngun lobo mulayani longon ene." ²² Inyi ko itoro diho Juda orihohi inyi ojo, "Ida nan larumu inyi, cie manyu ojo cio kuna lomanya ijia, 'oru ngun lobo mulayani ten'." ²³ Ojo Juda diho inyi, "Ingohi inyi totek kuna longoni iyo inyi, tolobo kikwenitare cia cio ohoi. Tonyio lacule manyu nan ene purnoti lo kine ida isi irumu inyi." ²⁴ Koloring ofahin uni, orihohini Juda, 'Limulaya kokwa nino Tamar, tona, lifonga manyu'. Ojo Juda, "Iyaunoti inyi oleng ojir ocurari owei." ²⁵ Kaliyaunoti inyi oleng, ocule inyi tenya iyo kokonyi nenge ojo, "Afonga nan ko monye lo kuno sangite." Osodoro inyi ojo, "Tode ba kalitum isi heruno ngai ene iyenit ko kofite ko iluk?" ²⁶ Oheru Juda kuna sangite ko jimitan, "Obir inyi kilany nan tona lida nan acwarare inyi iyo kito lei Sela." Manyu ida inyi oitohi geto ko inyi. ²⁷ Kolotumohino faritin kulo tomonun nenge, oboto jimitan ongoni tee rei turot kocehe nenge. ²⁸ Kolongon inyi tomonun, oculu lobito kito kana. Oto katitomononi ko dumuno kofite na ifurang otorihi murut lo kana ojo, "Ene litemu.’’ ²⁹ Ati kalinyiahe inyi kana nenge, orutu rece oleng, ojo katitomononi, "Koditi na lipusunore isi ene!" Itibarahini inyi ojo Perez. ³⁰ To kifwongi, olotu rece ladi ko kofite na ifurang to murut lo kana. Itibarahini inyi ojimi Zera."