¹ Olotu Abraham orumu lobo ngorwani lobara Ketura. ² Olotu inyi otomonohi Abraham tee: Zimran, Joksan, Medan, Midian, Isbak ko Suah. ³ Ara afa Joksan monye lo Seba ko Dedan; ara afa lotataha kulo Dedan cio kulo Asur, cio kulo Letus ko cio kulo Leumm. ⁴ Ara afa tee kulo Midian oho Epa, Eper, Hanok, Abida, ko Eldaa. Ara afa kuno fad lotataha kulo Ketura. ⁵ Ingohi Abraham sangite kunenge pili iyo Isako. ⁶ Ati orihe inyi owar, icio inyi kiciorita iyo tee kulo na ngorwani nenge ko cularu icieng ingadari to lohitongore lo kito nenge Isako, ofwo iya kofikofi kulo ngati lo okangere. ⁷ Omany Abraham karihin mia lobito ko keek mietare ko miet. ⁸ Oto Abraham ko wiriaru wirita nenge lo lohicungi ko weyaru longoroyon bebe, tungani na lomany loborengi karihin. ⁹ Onuhahi tee kunenge; Isako ko Ismael inyi kunom lo Makpela na lonyiha ko Mamre mana lo Epron kito lo Zohar Hittitani, ¹⁰ mana lafa linyiangu Abraham iyo cio kulo Hittit. Onuhahini Abraham ijia ko ngorwani nenge Sarah. ¹¹ To korwong lo wei lo Abraham, igatahi Lobanga kito nenge Isako gum na lomanya Beer Lahai Roi tona. ¹² Ara ene irejit lo kaji lo kito lo Abraham na lobara Ismail, na lotomonohi Hagar na lara Ijiptoni, opii lo Sarah inyi. ¹³ Ara kuno karanacio kulo tee rei kulo Ismail ijifita otomone necieng: Nabios, okang lo Ismail, Kedar, Adbeel, Mibsam, ¹⁴ Misma, Duma, Massa, ¹⁵ Hadad, Tema, Jetur, Napis, ko Kedma. ¹⁶ Ara kuno karanacio kulo tee rei kulo Ismail manyu icieng lara kulahitoha kulo imaniti tomon ko are iya na longonore to kofikofi kulo lomanyarihin ko kemahin kuneicieng. ¹⁷ Omany Ismail kof karihin mia lobito ko keek uni ko mietare. Owiri inyi wirita nenge lo lohicungi ko weyaru. ¹⁸ Omanya lotataha kunenge kof kiciaha to Havila many Sur onyiha ko lohikori lo ngati lo okangere lo Ijipt, kaliloro iya ngati lo Asur. Ati omanya icieng ijoriati ko imaniti fad kuna likajio ko icieng. ¹⁹ Ara ene irejit lo kaji lo Isako, kito lo Abraham. Olotu Abraham ara monye lo Isako, ²⁰ manyu olotu Isako langun lara karihin kunenge keek ongon, oyem Rebeka kito lo Betuel lo kof lo Aram lona faji lojimi Padan Aram, kanece lo Laban Aramani. ²¹ Ilifa Isako Lobanga to ngorwani nenge tonyio ida inyi otomonu tee. Ifotu Lobanga kilifa nenge, manyu olotu ngorwani nenge ifonga. ²² Ifufulinga tee to kocehe nenge, oto inyi ojo, "Nyio itiyo ene ken nei?" Tona olo inyi kitifia Lobanga. ²³ Ojo Lobanga diho inyi, "Ongoni misihi are katua nino, manyu okoraru mute cio are to kocehe nino, manyu ogol mute cio kuna kude ilany kude, manyu irwa mute lahitok iyo Lasidi." ²⁴ Langun logoru far lo tomonun nenge, oturu inyi tee rei. ²⁵ La litem rutuno, odo oto oju ken fad iya kyela na iju. Tona itibarahini inyi ojimi Isau. ²⁶ To kifwongi olotu rece, omuruhuta tutunye lo Isau, tona itibarahini inyi ojimi Jakob. Orumu monye neicieng Isako logoru karihin keek ile tona lotomonunore Rebeka icieng. ²⁷ Oboroho tee, olotu Isau ara kamejani na iteten, retoni lo mwang, ati ara Jakob kito na ibuho na lowak kitongo kalele lo kemahin. ²⁸ Olotu Isako imaru Isau tonyio limang inyi jijiman lo tyang lo mwang, ati imaru Rebeka Jakob. ²⁹ Lobo far koloyer Jakob jati na idik, olotu Isau to mwang ara na lonyia kinga noo. ³⁰ Oto ko jimitan iyo rece, "kicio nan jati ido lobo, deu, kinyia kinga nan noo! Inyi licio inyi obara tolobo Edom. ³¹ Inyiahahi Jakob inyi ojo, "Kitilotohi re nan obolore nino." ³² Ojo Isau, "Tode anyiha nan weyaru. Nyio ha jiran lona obolore diho nan?" ³³ Ati ojo Jakob diho inyi, "Ibutia re diho nan." Oto inyi ibuti diho Jakob itilotohi inyi obolore nenge. ³⁴ Oto Jakob ko kicwara Isau mugati ko agira lo ades. Oto inyi ko daha, omatahi kifi ko wojuno olo. Tona itikaj Isau obolore nenge.