¹ Tinyia olotu kinga ongon kof to kifwongi lo kinga lafa longon to faritin kulo Abraham, olotu Isako olo iyo Abimelek kabu lo cio kulo Palestina to Gerar. ² Oboto Lobanga iyo Isako orihohi inyi ojo, "kelo iya Ijipt, itongo kof na lajo nan ojir isi itongo. ³ Itongo ene kof to kude faritin, manyu ahingon cia nan ko isi, manyu ahigatahi isi gum. Tonyio ahicorihino nan isi ko lotataha kunino ene kof fad lo kitifuta kibutia na lacio nan diho apa nino Abraham. ⁴ Atiboreng cia nan lotataha kunino iya kanger kulo kai manyu acio ca nan icieng kuno kofikofi fad, manyu to lotata nino, misiok fad to kof orumu mute gum, ⁵ tonyio oningo afa Abraham tenya nei manyu itii sangite dot kuna latifak nan inyi kitiyo, oric manyu cihicihi kunei, tenyitenyi ko kisingita kunei" ⁶ Oto Isako ko manya Gerar. ⁷ Kalitifia cio kulo na kof inyi to ngorwani nenge, ojo inyi, "Ara inyi kanece nei" tonyio orumu inyi obang tulohino icieng jimitan 'ara inyi ngorwani nei'. Ii inyi ojo, 'kitum cio kulo ene kof kifadaru nan to Rebeka tonyio odwaru inyi.' ⁸ Langun lomany Isako ijia faritin kuna iborengi, odeu Abimelek kabu lo Palestina to lotupulec Isako itisonga ngorwani nenge Rebeka. ⁹ Oto Abimelek ilolongu Isako ojo diho inyi, "Ara inyi ngorwani nino dede, nyio licio isi ijo, 'Ara inyi kanece nei'?" Inyiahahi Isako inyi ojo, "Tonyio orumu nan aiiyo ajo, ngatum nan kitiririoro warun nei to inyi." ¹⁰ Ojo Abimelek diho inyi, "Nyio ene litii isi iyo ohoi? Otum lobo tungani to kiji niyang getore ngorwani nino, itum isi kiyauno kipal lo lomuna kenite kuniyang." ¹¹ Oto Abimelek ko ciha cio fad ojo, "Tungani lobo na litii lobo rohojun iyo ene tungani kode iyo ngorwani nenge ojir ifadari." ¹² Orem Isako mana na kof to na kari bito ko denguno samatati na lotum kakeny mia lobito, tonyio igatahi Lobanga inyi gum. ¹³ Obara Isako noo, manyu osodoro bara ko samun nenge many olotu obara ogal. ¹⁴ Obar inyi kera ko kicu olohe ko karwaak many itikaino cio kulo Palestina inyi. ¹⁵ Oto cio kulo Palestina konuha karecio kulafa lobok karwaak to faritin kulo apa nenge Abraham fad. ¹⁶ Tinyia Abimelek ko jimitan iyo Isako, "Ingade to kiji niyang tonyio lilany golun nino niyang." ¹⁷ Oto Isako ko johoro tijia olotu manya ridat lo Gerar, faji na lolotu inyi itongohinore. ¹⁸ Olotu Isako itingejuk kuto kulafa karecio itimihin lobok monye Abraham kuna lofwonu cio kulo Palestina onuk icio icieng kulafa karanecio litibar monye. ¹⁹ Obok karwaak kulo Isako katua lo gura otuluni kifi kuna inyuji to katua. ²⁰ Ati itingolof katibalak kulo Gerar katibalak kulo Isako ojo, "Ara kuno kifi kuniyang! Itibarahi Isako na itibi ojo Esek, tonyio itingolofi inyi. ²¹ Tinyia ofwo icieng obok lobo itibi ake, itingolofi manyu icieng tona, itibarahi na itibi ojo Sitnah. ²² Isiol icieng tijia ofwo obok lobo itibi ake, oru lobo tungani litingolof icieng tona. Itibarahi inyi na ojo Rehobot, ojo, "Jijia lohicio Lobanga ohoi faji na licio ca ohoi kitenu manya ene kof." ²³ Tinyia owoju inyi olo iya Beerseba. ²⁴ Na karue oboto Lobanga iyo inyi ojo, " Nan Lobanga lo apa nino Abraham, kebang tonyio angon nan ko isi. Ahigatahi cia nan isi gum manyu atipit lotataha kunino iborengi to giglo lo karwaani nei Abraham ²⁵ Oduhohi Isako ciali ijia ko kilolongohino karana lo Lahitok Lobanga. Ogurohi inyi kema nenge ijia manyu obok karwaak kunenge itibi lo kifi. ²⁶ Manyu tinyia olotu Abimelek diho inyi to Gerar ilihuni ko Ahusat kasingani nenge ko Pikol lahitok lo asegere kunenge. ²⁷ Itifi Isako icieng ojo, "Nyio ifwonu ite diho nan ati afa ite itiswa nan manyu ifuhe nan oleng to kiji ningi?" ²⁸ Inyiahahi icieng ojo, "Lohideu ohoi otoc jimitan ongon Lobanga ko isi, tona kiiu ohoi kijo ojir lobuti lo yomo ongon kiji niyang - kiji niyang ko isi, ngatifik yomo ko isi ²⁹ jimitan ida cia isi itii diho ohoi rohojun, iya na afa lida ohoi kitiyore rohojun diho isi ati kitong ko isi ara na ijir manyu kicio isi ilotu to kisiliban. Manyu jijia lohigatahi Lobanga isi gum. ³⁰ Oto Isako ikukum karama to icieng odahati manyu omati imatiti. ³¹ Kiwanyi berien ibuti icieng lobuti lo yomo kiji neicieng. Isako ko kiniamahino icieng kikoi, icieng ko fworo to kisiliban iya kof neicieng. ³² Lafar ofwonu karwaak kulo Isako orihohi inyi kare itibi na lobok icieng, ojimi iyo inyi, "lohirumu ohoi kifi!" ³³ Itibarahi inyi na itibi ojo, "Seba" obarare na kang 'Beerseba' ko jijia. ³⁴ Kologoru karihin kulo Isau keek ongon, olotu inyi oyem Judit kito lo Beeri Hittitani, manyu oyem Besimat kito lo Elon Hittitani. ³⁵ Icio afa kuna ngorwo kidak iyo Rebeka ko Isako.