¹ Orumu dong Abraham longoroyon noo manyu ligatahi Lobanga inyi gum iyo sangite fad. ² Ojo inyi iyo karwaani na lolanyu karwaak fad to kalenge, na lolanyu sangite fad, “Tofik kana nino fotiri lo bongbong nei. ³ Awak nan isi ibuti to karana lo Lahitok Lobanga lo kai ko kof jimitan ida cia isi itahahi kito nei ngorwani to kiji lo kariok kulo ene kof lo Kanaan ene lamanyare nan ⁴ ati ilo many kof nei many iyo cio kulo kaliyang ilo iyauno ngorwani lo kito nei Isako tijia. ⁵ Itifi karwaani inyi ojo, “Adi ba ngoberu nu ngorwani kilihuno ko nan iya ene kof, ojir nan anyiaharu kito nino nu kof lilotunore isi? ⁶ Ojo Abraham tode jimitan ojir isi ida inyiahe kito nei ijia. ⁷ Lobanga lo kai na lohiyauno nan to kolo apa nei ko to kof lotomonunore nei na loteny iyo nan manyu ocik iyo nan to kibutia ojo, ‘acio mute nan ene kof iyo lotataha kunino’ ocule cia inyi malaika nenge ketemoni nino kicio isi irumu ngorwani iyo kito nei tijia. ⁸ Koloberu nu ngorwani kilihuno ko isi iya ene ito cia isi ilaharu tone lobuti nei. Ati kenyiaharu kito nei ijia.” ⁹ Tinyia ofik la karwaani kana fotiri lo bongbong lo lahitok nenge Abraham ko kitbutia iyo inyi tone tenya. ¹⁰ Oto la karwaani owoju iyaru lonagahin kulo lahitok nenge tomon kuna locuna sangite kuna ijiri to kolo lahitok nenge. Oto inyi ko kicaha owele iya Aram Naharim ko loro iya kang lo Nahor. ¹¹ Itibalohi inyi lonagahin kalele lo itibi lo kifi na longon oleng to kanghatua, orumu lara kurou langun tik lofwonunitare ngorwo yoho kifi. ¹² Oto hati inyi ko kilifa ojo, “Lahitok Lobanga lo lahitok nei Abraham, kicio nan tenuno elefar manyu itotoru jiran nino iyo lahitok nei Abraham. ¹³ Tode awoita nan kalele lone itibi lo kifi na lofwonuno tee kariok kulo cio kulo ene kang yoho. ¹⁴ ingohi ja tara kalajo nan iyo kito karioni, ‘Itau ja moti lo kifi nino kitimat nan’ oto ojo diho nan, ‘Tomat, ayohohi manyu cia nan lonagahin kunino kifi.’ – ingohi tara inyi na linyumohi isi karwaani nino Isako. Tone ato cia nan ayen ajo litotor isi jiran iyo lahitok nei. ¹⁵ Orihe inyi ida lokeru kilifa, ogoru Rebeka oriongita moti lo kifi nenge. Ara orumu inyi kito lo Betuel kito lo Milka na lara ngorwani lo rece lo Abraham na lobara Nahor. ¹⁶ Odwaru orumu na kito karioni noo, kito karioni na lorihe oricaru na lorihe ida oyen lobo retoni . Iculoro inyi katua lo itibi itifut moti nenge to kifi ko kirwohuno oleng. ¹⁷ Oruharu na karwaani kitiricio inyi ko jimitan diho inyi, “kitimat ja kude kifi to moti nino.” ¹⁸ Inyi ko kitauno moti otek to kac ojo, “Tomat Lahitok nei” Icio inyi omat kifi. ¹⁹ Langun lokeru kitimata inyi, ko jimitan, “Ayohohi manyu cia nan lonagahin kunino kifi many okeru icieng fad mata. ²⁰ Tinyia deu deu ijuhohi inyi kifi to moti katua lo tigol oite ari katua lo kare, ilielieng inyi kifi otum lonagahin kunenge fad. ²¹ Iriangaru lerok deya inyi na loru ko tenya, loyenun kalicio ba Lobanga owele nenge otenuno. ²² Langun lokeru lonagahin mata, odumu lerok geloti lo kume na lara dahab na lotum kiricio nenge beka Lobito ko oguli kulo dahab kuna lotum kirioci neicieng ratili tomon. ²³ Ko kitifia inyi ojo, “Isi kito lo ngai? kirihohi ja nan ongoni kajihit kolo apa nino na ngotum kitigeto ohoi?” ²⁴ Inyiahahi inyi ojo, “Nan kito lo Betuel kito na lotomonohi Milka Nahor.” ²⁵ osod inyi ojo, “Kingon ohoi ko daha lo sang nyari ko dwani na itou manyu ko kajihit kuna ngitum ite geto.” ²⁶ Oto lerok ko cumo iwor Lobanga, ²⁷ ojo, “ingohi kwatun tongon iyo Lobanga lo lahitok nei Abraham na lida ingohi jiran ko kigenoro nenge iyo lahitok nei. Ka lara to nan lohirihu Lobanga nan iyo ene owele many kaji lo cio kulo lahitok nei. ²⁸ Ife na kito karioni olo orihohi kolo ngotenge kuna tenyitenyi. ²⁹ Tinyia orumu Rebeka ongon ko rece la lobara Laban oto inyi oruharu imuri iyo nu tungani idi kare. ³⁰ Inyi deuno geloti lo kume ko oguli to okokoho kulo kanece manyu oning Rebeka ititima kuna tenyitenyi lorihohi na tungani inyi, imuri inyi iyo na tungani. Olo orumu inyi owoita iyo lonagahin kunenge kalele lo itibi. ³¹ Ko jimitan iyo inyi, “Ou isi na lohigatahi Lobanga gum. Nyio iwoita isi ene oleng? Lakukumahi nan kaji ko faji iyo lonagahin. ³² Na tungani ko loro kanghatua, itauni sangite to lonagahin oto iciori nyiari ko dwani na itou iyo lonagahin, ko kifi kuna lilalare inyi ko cio kuna lilihita ko inyi kejuha ³³ Tinyia iyauni daha ketemoni neicieng ati ojo na tungani, “Ida nan adaha many kalakeru rihohino ite tenya na lawak nan rihohino ite.” Ojo Laban diho inyi, “Kirihohi bo ohoi” ³⁴ Oto inyi ko jimitan, “Ara nan karwaani lo Abraham ³⁵ Licio Lobanga lahitok nei gum lahitok, manyu lobara inyi noo. Licio Lobanga inyi kera ko kicu, rial ko dahab, karwaak beciek rei ko ngorwo ko lonagahin ko sigiriahin. ³⁶ Lotomonohi ngorwani lo lahitok nei Sarah inyi kito retoni to ongoroyone nenge, manyu licio lahitok nei inyi sangite fad kuna lotehita inyi. ³⁷ Manyu kico lahitok nei nan abuti ajo, ‘Ke tahahi kito nei ngorwani to kiji lo tee kulo kof lo Kanaan kuna lamanya nan kof neicieng. ³⁸ Ati ilo kaji lo apa nei manyu iyo imanit nei ilo torumahi kito nei ngorwani tijia.’ ³⁹ Ato nan atifi lahitok nei ajo, “Adi ba ngoberu nu ngorwani kilihuno ko nan?” ⁴⁰ Kinyiahahi inyi nan ojo, ‘Lahitok Lobanga na lalot nan to kiruk ko kigenoro ketemoni nenge, ocule cia malaika nenge ketemoni nino icio cia inyi owele nino otenuno, icio cia isi irumu ngorwani iyo kito nei to imanit nei manyu to kaji lo apa nei. ⁴¹ Ilaharu cia isi iyo lobuti nei kalilo isi iyo imanit nei oberuni hati kicwara inyi diho isi, ito cia isi ilaharu iyo lobuti nei. ⁴² Ojo adi lalotu nan iyo itibi, ajo nan, ‘Lahitok Lobanga lo lahitok nei Abraham, ngicio ja isi nan tenuno iyo ene owele lalotu nan. ⁴³ Tode awoita nan kalele lone itibi lo kifi kololotu kito karioni yoho, ajo hati nan iyo inyi ‘kitimat hati nan kude kifi kuting to moti nino’, ⁴⁴ oto hati inyi ojo diho nan, ‘Tomat, ayohohi manyu cia nan lonagahin kunino kifi.’ ingohi tara inyi lonyumu Lobanga ara ngorwani lo kito lo lahitok nei’. ⁴⁵ Orihe nan ida lakeru kilifa to tau nei, olotu Rebeka oriongita moti lo kifi nenge. Iculoro inyi katua lo itibi oyohu kifi, ato nan ko jimitan diho inyi, ‘kicio hati amat.’ ⁴⁶ Itau inyi moti nenge deu deu otad to kac ko jimitan iyo nan, ‘Tomat, ayohohi manyu cia nan lonagahin kunino kifi’. Dede nan ko mata, oyohohi manyu kifi lonagahin. ⁴⁷ Atifi nan inyi ajo, ‘kito longai isi?’ ojo inyi, ‘Nan kito lo Betuel, kito lo Nahor na lotomonohi Milka inyi.’ Ato nan ko fiha geloti kume nenge ko oguli okokoho Kunenge, ⁴⁸ ato nan ko cumo awor Lahitok. Aciharu nan iyo Lahitok Lobanga lo lahitok nei Abraham na lohirihu nan to kikoi na ibehi lo rumuno lotata lo rece lo lahitok nei ara ngorwani lo kito nenge. ⁴⁹ Jijia kalitum ite kitotorohino jiran ko kigenoro iyo lahitok nei, kirihohiti nan ojir ayenare aji na ngai ngolo.” ⁵⁰ Inyiahahi Laban ko Betuel ojo, “Ara ene tenya lo Lahitok, oru lobo tohi na ngohirihohi ohoi isi ngati ko ngati. ⁵¹ Rebeka ene yaru ingohi tolo ara ngorwani lo kito lo lahitok nino iya na likukumare Lobanga. ⁵² Koloning karwaani lo Abraham tenya na loteny icieng oto ogung otir komom kof ketemoni lo Lobanga. ⁵³ Oto karwaani odumu sangite kulo rial ko dahab ko kyelani icio Rebeka, icio manyu inyi sangite kulo wel iyo rece lo Rebeka ko ngotenge. ⁵⁴ Oto inyi ko cio kuna lorumu ilihu ko inyi odahati, omati manyu ogeti ijia. Kolokwenyu icieng kiwanyi, ojo inyi, “Kiniamahiti nan alo iyo lahitok nei.” ⁵⁵ Ati ojo rece ko ngotenge, “Ingohi re kito kitong ko ohoi faritin tomon, koloru, ite hati ifwo.” ⁵⁶ Ati ojo inyi diho icieng, “Kehitik nan iya na licio Lobanga tenuno iyo owele nei, kiniemahiti nan kikoi ojir alo iyo lahitok nei.” ⁵⁷ Tinyia ojo icieng, “Ngalolonguti re kito, kitifi inyi.” ⁵⁸ Icieng ko kilolonguno Rebeka itifi inyi ojo, “Iloro isi kole tungani?” Inyiahahi inyi ojo, “Aloro nan.” ⁵⁹ Oto icieng ko lahahino kanece neicieng Rebeka olo ko karwaani nenge ko karwaani lo Abraham ko cio kunenge. ⁶⁰ Manyu igatahi icieng Rebeka gum ojo diho inyi, “Icwara lotataha kunino oruju lokoliho kulo merok kuneicieng.” ⁶¹ Rebeka ko karicani nenge ko kikukumahino irwohi lonagahin ko kiliharoti ko karwaani lo Abraham. Odumu karwaani Rebeka ko lotita. ⁶² Tinyia olotu Isako to Beer Lahai Roi tonyio orumu inyi omanya Negev. ⁶³ Isabe inyi iya mana lobo kurou ki gigilo tinyia, ojo inyi iyol komom odeu lonagahin ofwonuno. ⁶⁴ Iyol manyu Rebeka konyeha ko deuno Isako, ko kiculuno to kai lo lonaga ⁶⁵ ko kitifia karwaani ojo, “ngai nu tungani to mana lolotuno kitirico ohoi?” Inyiahahi karwaani ojo, “Inyi lahitok nei.” Oto inyi ko dumuno kimuhi nenge ko buburaru. Oto karwaani ko rihohino Isako sangite fad kuna litii inyi. ⁶⁶ Iyauno Isako inyi katua lo kema lo iyang nenge Sarah, ko yema Rebeka. Oto Rebeka ko rahun ngorwani nenge, imaru inyi inyi bebe. ⁶⁷ Oto itirobi tau lo Isako to wei lo iyang nenge Sarah