¹ Omany Sarah ogoru karihin kulo warun nenge mia lobito ko keek are ko mietare. ² Oweihi inyi Kiriat Arba na lara Hebron iyo kof lo Kanaan oto Abraham olo kicira ngorwani nenge Sarah orubuk ken nenge icira. ³ Tinyia owoju Abraham tinyia loweihinore ngorwani nenge ko tenya ko cio kulo Hittit ojo, ⁴ "Ara nan misiohoni ko kamanyani kiji ningi, kitilotohiti nan lobo faji ara lonuhare ene ojir nan anuhahinore kaweyani nei.'' ⁵ Inyiahahi cio kulo Hittit Abraham ojo, ⁶ "lahitok, kining ohoi. Ira isi kabu na hitok to kiji niyang. Tonuhahi kaweyani nino iyo kwecere na idwaru ten iyo ohoi. Ida cia lobo ten to kiji niyang kimitere isi kwecere nenge na nginuhahinore isi kaweyani nino." ⁷ Oto Abraham owoju ko cohun ketemoni lo cio kulo Hittit. ⁸ Oto ojo iyo icieng, "kaliruhunore ite nan nuha kaweyani nei dong kiningoto nan ileliati iyo Epron kito lo Zohar to nan ⁹ ojir kitilotohi nan kunom lo Makpela na lara nenge na longon lohicungi lo mana nenge. Itifiata inyi ingohi kitilotohi nan to wel na ituba ara lonuhare to kiji ningi.'' ¹⁰ Orumu Epron Hittitani itongo kiji lo cio kunenge, oto inyi inyiahahi Abraham na loningo cio kulo Hittit fad kuna lorumu otuba lokoli lo na kang ojo, ¹¹ "Ida lahitok nei, kining nan. Ahicio nan isi mana ko kunom na longon ijia, acio nan iyo isi to ketemoni lo cio kunei fad. Tonuk kaweyani nino." ¹² Ocok Abraham ketemoni lo cio kulo na kof ari ¹³ manyu ojo iyo Epron oningo icieng, "Kining nan kaliruk isi, ahidumahi nan isi wel lo mana. Iruho kilifuno kidumi ojir anuhahi kaweyani nei.'' ¹⁴ Inyiahahi Epron Abraham ojo, ¹⁵ "Kining nan lahitok nei, ara na mana ratili mia ongon kulo rial ati ara ha kuna nyio kiji nei ko isi? Tonuk kaweyani nino." ¹⁶ Iruk Abraham tenya lo Epron ko kipimo na wel loteny inyi oningo cio kulo Hittit; ratili mia ongon kulo rial lo kipimo na litiyorihin iyo katilotok to kuna karihin. ¹⁷ Dong mana lo Epron na longon Makpela na lonyiha ko Mamre, mana ko kunom ara lobito ko cianitok kuna longoni katua lo lohikorihin kulo na mana olotu ibelohino ¹⁸ iyo Abraham ara nenge to ketemoni lo cio kulo Hittit fad kuna lotuba lokoli lo kang. ¹⁹ To kifwongi, onuhahi Abraham ngorwani nenge Sarah katua lo kunom mana lo Makpela na lonyiha ko Mamre (na lara Hebron) to kof lo Kanaan. ²⁰ Tinyia na mana ko kunom na longon katua ibelohino iyo Abraham to kac kulo cio kulo Hittit ara lonuhare.