¹ To kifwongi lo kude faritin otem Lobanga Abraham ojo diho inyi, "Abraham" Inyiahahi Abraham ojo, "Nan ene." ² Tinyia ojo Lobanga, "Todumu kito nino, kito nino lobito hilong, na limaru isi - Isako - yaru kof lo Moria. Tofejohi inyi iyo nan ara kicorita locurat kai lo donge na lahitotorohi cia nan isi. ³ Kiwanyi berien far na lijifita, owoju Abraham ko kitinafa sigiria nenge. Ilihe inyi ko karwaak kunenge are ko kito nenge Isako. Langun longutu inyi keyek kuna lotum cura kiciorita, ko lotita iya nu faji lorihohi Lobanga inyi. ⁴ To far lo uni nenge Abraham ko deuno nu faji orihe oloma gaa. ⁵ Ojo inyi iyo karwaak kunenge, "Itongoti ene ko sigiria kifwo re ohoi ko ene lokilahaji idi. Kifwo ohoi kiwor Lobanga kiitu ene diho ite. ⁶ Odumu Abraham keek itahi iyo kito nenge Isako, otek hati inyi kima ko ngalem. Ka liliharu icieng ara lobito. ⁷ Oto Isako ko tenya itifi apa nenge ojo, "Apa" Inyiahahi Abraham ojo, "Ee kito nei.’’ Ojo Isako, "kima ko keyek kuno ati ani hati ker lo kiciorita locurat?" ⁸ Inyiahahi Abraham ojo, "Lobanga token cia licio ker lo kiciorita locurat kito nei." Oto icieng are ilik ara lobito. ⁹ Kologoru icieng faji na lorihohi Lobanga Abraham, oto Abraham ko kikukuma ciali ijia ko kicianahino keyek kai nenge. Otor inyi kito nenge Isako ko kitigetohino kue lo ciali kai lo keyek. ¹⁰ Inyi ko cularu kana odumu ngalem ara na lowak kifadaru kito nenge. ¹¹ Ati ilolong malaika lo Lahitok inyi to kai ojo, "Abraham! Abraham!" Inyiahahi inyi ojo, "nan ene." ¹² Ojo malaika diho inyi, "kefik kana iyo kito. Ketii lobotohi keken ken nenge. Jijia layen nan jimitan ibang isi Lobanga tonyio ida isi lohingony nan kito nino, kito nino lobito hilong." ¹³ Ongolo Abraham ko deuno mongo lo ker to katua lo tim inief muriaha iyo tel - guma. Ko loro olahu na mongo lo ker ko fejohino ara kiciorita locurat faji lo kito nenge Isako. ¹⁴ Inyi na itibarahi Abraham na faji ojo, "Icio cia Lobanga" ojimitarehin ko jijia ojo, "Kai lo donge lo Lahitok iciori cia." ¹⁵ Ilolong malaika lo Lahitok Abraham to kai ari ¹⁶ ko jimitan, "Abutia nan to ken nei, oteny Lahitok jimitan, tonyio itii isi jii manyu ida kingony nan kito nino, kito nino lobito hilong. ¹⁷ Dede ahigatahi cia nan isi gum atiboreng lotataha kunino iya kanger kulo kai, manyu iya singeti lo kalele lo nam. Oruju mute lotataha kunino kangite kulo merok kuneicieng. ¹⁸ Manyu to lotata nino orumu mute misihi fad gum to ningo na liningore isi nan. ¹⁹ Tona Abraham ko itoro iyo karwaak kunenge ko kiliharoti ara lobito oitori Beerseba. Manyu Abraham ko manya Beerseba. ²⁰ To kifwongi lo kude faritin, orihohini Abraham jimitan lara manyu Milkah ngoto tee; lotomonohi inyi rece nino Nahor tee. ²¹ Ara tee kunenge; Uz, okang nenge, rece Buz, Kemuel monye lo Aram ²² Kesed, Hazo, Pildas, Jidlap ko Betuel. ²³ Olotu Betuel ara monye lo Rebeka. Otomonohi Milka kulo tee rei mietauni iyo Nahor rece lo Abraham. ²⁴ Ngorwani manyu nenge lobo na lobara Ruma otomonu manyu tee rei: Teba, Gaham, Tahas, ko Maaka.