¹ Tona, inief kisa Lobanga to Sarah iya lafa lotenyare inyi, manyu itii Lobanga iyo Sarah tohi lafa locik inyi. ² O lotu Sarah ifonga otomonohi Abraham kito to ongoroyone nenge to kulafa faritin locik Lobanga inyi to ken. ³ Itibarahi Abraham la kito lotomonohi Sarah inyi ojo Isako. ⁴ Kologoru faritin kulo Isako mietauni, ilir Abraham inyi iya lafa locihare Lobanga. ⁵ Orumu karihin kulo Abraham lara mia lobito na lotomonunorehin Isako. ⁶ Ojo Sarah, 'Liyauno Lobanga kwenita diho nan, manyu cio pili kuna loning ene tenya, kikweni cia ko nan'. ⁷ Manyu osod inyi ojo, 'Ngai afa ngorihohi Abraham ojo itinak mute Sarah tee, ati latomonohi nan inyi kito retoni to ongoroyone nenge!'' ⁸ Obolo kito ongerihi ikine, to far na longerihinore Isako ikine, ofik Abraham karama na hitok. ⁹ Ati odeu Sarah ojo itidara na kito retoni lotomonohi Hagar na Ijiptoni Abraham. ¹⁰ Oto ojo iyo Abraham, "Ifuhe na ngorwani opiini ko kito nenge tonyio ida cia na kito lona ngorwani opiini ongar lunyo sangite ko kito nei Isako. ¹¹ Iyauno na tenya kiudo bebe iyo Abraham tonyio ara tenya lo ken lo kito nenge. ¹² Ati ojo Lobanga diho inyi, "Keudo to kito lo ngorwani opii nino. Toning tohi na lohirihohi Sarah isi tonyio ara iyo Isako ikenare Lobanga lotataha kunino. ¹³ Acio cia nan kito lona opiini ara misi tonyio ara inyi kito nino. ¹⁴ Kiwanyi berien lobito far nenge, odumu Abraham lobo daha ko okodo lo kifi icio Hagar. Itahi inyi kuna sangite ko lahahino olo ko kito. Olo inyi loro nenge olo kibunyita kuny lo Beerseba. ¹⁵ Langun loru kifi to okodo lo kifi, oto inyi ofik kito iyo lobo tim tonyio obuk inyi ojo, "ida nan awak deya weyaru lo kito nei. ¹⁶ Oto inyi ingade faji na ngotum ngone na longorori to kawo dohino, ko kiciaha kicira tinyia litongore inyi. ¹⁷ Oning Lobanga kicira lo kito oto malaika lo Lobanga ko kilolongo Hagar to kai ko jimitan diho inyi, 'Nyio tenya Hagar? Kebang; Loning Lobanga kicira lo kito to nu faji logetore. ¹⁸ Itiwoju kito, torik inyi to kana tonyio atirak mute nan inyi ara misi na hitok''. ¹⁹ Tinyia onga Lobanga konyeha kunenge itideu inyi itibi lo kifi. Oto inyi ko loro itifut okodo to kifi icio manyu kito omat. ²⁰ Ongon orumu Lobanga ko na kito olotu inyi obolo. Omanya inyi kuny ko lotuno rahun katetenani to kawo. ²¹ Kolomanya inyi kuny lo Paran, olotu ngotenge isufahi inyi ngorwani to ijipt. ²² To kuna faritin ojo Abimelek ko Pikol lahitok lo karemok kunenge iyo Abraham, "Ongon Lobanga ko isi iyo sangite fad kuna litiyo isi. ²³ Jijia ibutia iyo nan ene ketemoni lo Lobanga jimitan ida cia isi itiyo to kitinononga iyo nan ko tee kunei ko lotataha kunei. Kitotorohi nan ko ene kof limanyare isi ara missiohoni jiran na lori kona lahitotorohi nan isi. ²⁴ Ojo Abraham, "Abuti nan." ²⁵ Tinyia imomodohi Abraham Abimelek tenya lo itibi lo kifi na loruje karwaak kulo Abimelek diho inyi. ²⁶ Ati ojo Abimelek, "Ida nan ayen ngai litii ene. Ida manyu isi kirihohi nan, ninguno ene elefar." ²⁷ Oto Abraham iyauno kera ko kicu icio Abimelek, tona oyomo kula cio are. ²⁸ Onyumu Abraham kera purno mietare itingade to kiji lo kaletok, ²⁹ manyu itifi Abimelek Abraham ojo, "Nyio fotiri lo kuno purno kulo kera mietare litingade isi to kiji lo kaletok?" ³⁰ Inyiahahi inyi ojo, "Ilifu kuno purno kulo kera mietare to kac kunei lo kitotoro jimitan nan labok na itibi lo kifi.'' ³¹ Tona itibarahini na faji ojo Beerseba to nyio oyomo afa kuna cio are itibutiati ija. ³² To kifwongi lona yomo to Beerseba, oite Abimelek ko Pikol lahitok lo karemok kunenge kof lo Palestina. ³³ Itibulahi Abraham kwai Beerseba ko kilolongo karana lo Lahitok Lobanga na losio tur. ³⁴ Oto Abraham omany kof lo Palestina faritin kuna iborengi.