¹ Tinyia ojo Lahitok iyo Moses, “Ilo iyo Parao irihohi inyi, ‘ara ene tohi na loteny Lahitok Lobanga lo cio kulo Ibru; Ingohi cio kunei ofwo ojir kiwori nan. ² Kaliberu isi lahahino icieng irihe igoritare icieng, ³ iyauno cia kana lo Lahitok jiok na irohoi iyo sang kuningi kuna longoni oleng iyo lakwenyi kuningi, sigiriahin ko lonagahin ko iyo kicu, kiri ko kera kuningi. ⁴ Ati okor cia Lahitok sang kulo Israel ko kulo cio kulo Ijipt ojir lobo tyang to Israel ida owei. ⁵ Ofik Lahitok tik ojo, kiwanyi itii cia Lahitok ene tenya kov. ⁶ Manyu kiwanyi nenge itii Lahitok jii: Owei sang kulo cio kulo Ijipt fad ati oru lobo tyang bito lo cio kulo Israel lowei. ⁷ Ingingij Parao na tenya orumahi ojo oru kolobo tyang bito lo cio kulo Israel lowei. Ati orihe tau nenge oberu kiruk manyu ida olahahi cio ofwo. ⁸ Tinyia orihohi Lahitok Moses ko Aaron ojo, “Itongonyu kirike to kaka lo ciali ifut kana icio Moses orwace kai iyo kiyoma to ketemoni lo Parao. ⁹ Olulworo cia na kirike ara fur na itinya kwe lo kov lo Ijipt fad manyu iciak cia lofunoho kuna hitoha kiniefa cio ko sang to kov lo Ijipt fad. ¹⁰ Oto icieng ongonyu kirike lo kaka lo ciali ko fwonuno woita ketemoni lo Parao. Orwace Moses na kirike iyo kiyoma, iciak lofunoho kuna hitoha kiniefa cio ko sang. ¹¹ Ida ibwonok otum woita ketemoni lo Moses to lofunoho kuna lodaha icieng ko cio kulo Ijipt fad. ¹² Ati itigol Lahitok tau lo Parao oberu ningo oho Moses ko Aaron, iya na lotenyare Lahitok iyo Moses to ken. ¹³ Tinyia ojo Lahitok iyo Moses, “Towoju kiwanyi berien ilo torumu Parao irihohi inyi ijio, “Tohi na loteny Lahitok Lobanga lo cio kulo Ibru ene: tolahahi cio kunei ofwo kiwor nan, ¹⁴ kalida tone kakeny, aculu cia nan johi johi kuna igoli iyo isi, iyo kulahitoha kunino ko iyo cio kunino, ojir isi iyenare jimitan oru lobo lori ko nan to kov fad. ¹⁵ Tonyio ko jijia ji nan laculu kana nei ahibok isi ko cio kunino to jiok ite na ngohikeru ite to kwe lo kov fad. ¹⁶ Ati ahitiboloru nan isi tone tenya bito ojir ahitotorohi isi golun ko kilotir nei ojir karana nei oyeniti iric kov fad. ¹⁷ Orihe cie isi igoritare manyu itiliwa cio kunei iberu lahahino icieng ofwo. ¹⁸ Tone dong, kiwanyi tone tik aculu cia nan igewa na irohoi ilany fad na lorihe afa ida litiihino kov lo Ijipt many to lohiciahi nenge ko ene far. ¹⁹ Icwara tenya jijia lo kiyauno sang ko sangite fad kuna longoni mwang faji loracare, tonyio odou cia lofalanga iyo cio ko sang fad kuna lorihe ongoni oleng ida oraca ifade icieng. ²⁰ Kula kude kuna hitoha kulo Parao kuna lobang tenya lo Lahitok orocoro kiyauno opiihin ko sang kuneicieng kajihit. ²¹ Ati kuna litikaj tenya lo Lahitok, ingohi opiihin ko sang kuneicieng manatak. ²² Tinyia ojo Lahitok iyo Moses, “Toting kac kunino iya kai ojir lofalanga obok kov lo Ijipt fad, iyo cio ko iyo sang ko iyo sangite pili kuna lobu ene kov lo Ijipt.” ²³ Langun loting Moses iluk nenge iya kai, oculu Lahitok kigurita ko lofalanga, manyu imedek hila ogoru many kof, tona oculu Lobanga hila obok kov lo Ijipt; ²⁴ ocia lofalanga manyu imedek hila ketemoni ko kifwongi. Ara orumu na igewa na irohoi ilany to kov lo Ijipt many to lohicahi lo na kov rahun imiri. ²⁵ To kov lo Ijipt fad obok lofalanga sangite fad kuna longon manatak ifade cio ko sang; ilieny sangite fad kuna lobu to kov manyu igwere cianitok fad. ²⁶ Faji Lobito keken na lida lofalanga obok inyi kov lo Gosen faji na lomanyare cio kulo Israel. ²⁷ Oto Parao ilolongu Moses ko Aaron ojo iyo icieng, “Ene far lapal nan. Otenu Lahitok ati apal nan ko cio kunei. ²⁸ Ilifa iyo Lahitok, tonyio lohitum kigurita lo hila ko lofalanga ohoi. Ahilahahi cia nan ite ifwo; ida owak ite irihe itongo.” ²⁹ Inyiahahi Moses ojo, “Kalalo nan oleng to katwa lo taya ating cia nan kac kai lo kilifa iyo Lahitok. Icung cia kigurita lo hila manyu oru cia lofalanga losodoro ojir isi iyen ijo ara kov lo Lahitok. ³⁰ Ati ayen nan jimitan orihe isi ko kulahitoha kunino ida ibang Lahitok Lobanga.” ³¹ Ipale lofalanga Obira ko Sayiri tonyio orumu Sayiri loturo ko Obira lokwerihi. ³² Ida ngano ko geme ipalaru tonyio odorita icieng to kifwongi. ³³ Oto Moses ongerihi Parao ko loro oleng to Taya. Oting inyi kac iyo Lahitok; icung kigurita lo hila ko lofalanga obienge manyu kuju ida orihe oca kov. ³⁴ Kolodeu Parao ojo loru kuju ko lofalanga ko kigurita lo hila, olotu ipal ari. Itigol inyi tau ko kulahitoha kunenge fad. ³⁵ Dong ogol tau lo Parao manyu ida olahahi Israel ofwo, iya na lotenyare Lahitok iyo Moses to ken.