¹ Ojo Lahitok iyo Moses, “ilo iyo Parao tijo iyo inyi, ‘tohi na loteny lahitok inyi ene, Ingohi cio kunei to fwo ojir ofwori kiwori nan. ² Kalimitere isi icieng fworo aculu cia nan jiok lo ikordohi kof nino fad. ³ Ifut cia Nail ko ikordohi. Ofwonuni cia kang hatwa lo obolore nino many logetore nino ko kai lo lagere nino, katwa lo kajihit kulo kulahitoha kunino, ko iyo cio kunino many katwa lo cialito kuningi ko lohingolare lo ibuneha. ⁴ Ofwonu cia ikordohi iyo isi ko cio kunino ko kulahitoha kunino fad.” ⁵ Tinyia ojo Lahitok iyo Moses, “Torihohi Aaron tijio, itifete kana nino ko iluk nino kai lo karecio, ocerihin, ko tafara, icwara ikordohi tojuhu kov lo Ijipt.” ⁶ Tinyia ofetehi Aaron kana nenge kai lo kifi kulo Ijipt, oto ikordohi ko fwonuno ipude kov. ⁷ Ati itii manyu ibwonok iya na to genyita kuneicieng icio manyu icieng ikordohi ofwonu kov lo Ijipt. ⁸ Ilolonge Parao Moses ko Aaron ojo iyo icieng, “Ilifati iyo Lahitok odume ikordohi iyo nan ko cio kunei ato cia nan alahi cio kunino ofwo ifotohi kiciorita iyo Lahitok.” ⁹ Ojo Moses iyo Parao, “Angerihi nan tenya lo ciha lo far iyo isi na ngalifahinore isi ko kulahitoha ko cio kunino ojir ikordohi okerorore ojir otong kuna longoni katwa lo kare lo Nail keken.” ¹⁰ Ojo Parao iyo Moses, “Kiwanyi.” Inyiahahi Moses inyi ojo, “Ori cia iya na litany isi ojir isi iyenare jimitan oru lobo lori ko Lahitok Lobanga niyang. ¹¹ kingerihi cia ikordohi ite ko kajihit kuningi, kuna hitoha kuningi ko cio kuningi, otongiti cia katwa lo Nail keken.” ¹² Langun longerihi Moses ko Aaron Parao, ilelia Moses iyo Lahitok to ikordohi kuna liyauno inyi iyo Parao. ¹³ Manyu itii Lahitok tohi na litifi Moses oweiha ikordohi to kajihit, to sitana ko to manatak. ¹⁴ Ifuri icieng iyo ifuriti kuna hitoha many omura kof ara icieng. ¹⁵ Ati kolodeu Parao ojo loru ikordohi, itigol inyi tau nenge ida owak ningo tenya lo Moses ko Aaron iya na afa lotenyare Lahitok to ken. ¹⁶ Tinyia ojo Lahitok iyo Moses, “torihohi Aaron tijio, todong kana nino tobok fur lo kof to iluk. manyu to kov lo Ijipt fad olulworo cia fur ara ilakye.” ¹⁷ Itii icieng jii, manyu ojo Aaron odong kana nenge ko iluk ko boho fur lo kof, ofwonu ilakye iyo cio ko sang. Ara fur to kov lo Ijipt fad ilakye. ¹⁸ Ati ojo ibwonok otem kiyauno ilakye to genyita kuneicieng, ida itweruni. Tonyio ongon afa ilakye kenite kulo cio ko sang fajihit fad, ¹⁹ ojo ibwonok iyo Parao, “ara ene kafiele lo Lobanga.” Ati ogol tau lo Parao ida oningo, iya na loteny Lahitok to ken. ²⁰ Oto Lahitok ojo iyo Moses, “Towoju kiwanyi berien itiric Parao langun loloro inyi kare ilo ijo iyo inyi, “Tohi na loteny Lahitok ene: ojo, Ingohi cio kunei ofwo kiwor nan. ²¹ Kalida isi ilahahi cio kunei ofwo ahijuhohi cia nan isi kujanga ilwahuno iyo isi ko kulahitoha kunino, iyo cio kunino ko katwa lo kajihit kuningi. Ifut cia kujanga kajihit kulo cio kulo Ijipt imuhe cia kujanga ko kof. ²² Ati na far akore cia nan kov lo Gosen faji na lomanya cio kunei; oru cia kujanga lojuk ijia, ojir isi iyen ijo nan Lahitok langon ene kov. ²³ Akor cia nan cio kunei ko cio kunino. Itihino cia ene kitotori kiwanyi.” ²⁴ Manyu itii Lahitok jii. Ilwahuno kujanga kaji lo Parao ko kajihit kulo kulahitoha kunenge. Ipale kujanga kov lo Ijipt fad. ²⁵ Oto Parao ilolongu Moses ko Aaron ko jimitan iyo icieng, “Ifwo ifotohiti kiciorita iyo Lobanga ningi ene kov.” ²⁶ Ati ojo Moses, “Ida cia na obir. Kiciorita kuna lohifotohino ohoi iyo Lahitok Lobanga niyang odwa iyo cio kulo Ijipt. Manyu kolohifotohi ohoi kiciorita kuna litidwara iyo cio kulo Ijipt ida cia icieng kicak ohoi to morutok?” ²⁷ Owak ohoi kifwo owele lo faritin uni mwangatare ifotohino kicioriti iyo Lahitok Lobanga niyang iya na lohicihare inyi ohoi.” ²⁸ Ojo Parao, “Ahilahahi cia nan ite ifwo ifotohi kiciorita iyo Lahitok Lobanga ningi mwangatare ati kefwo ilomaha noo. Jijia kilifahi nan. ²⁹ Inyiahahi Moses ojo, “Deu jijia kalahingerihi nan isi ahilifahi cia nan isi Lahitok, manyu kiwanyi ingohi cia kujanga Parao, kulahitoha kunenge ko cio kunenge. Ati owak Parao oyen jimitan ojir ida kitinonong ohoi to mitere cio fworo kifotohino kiciorita iyo Lahitok. ³⁰ Oto Moses ko ngerihino Parao olo ilifa iyo Lahitok. ³¹ Manyu itii Lahitok tohi na lilifa Moses. Ongerihi kujanga Parao ko kulahitoha kunenge ko cio kunenge, oru kujangati lotong. ³² Ati ene tik manyu itigol Parao tau nenge, ida olahahi cio ofwo.