¹ Tinyia ojo LAHITOK iyo Moses, “Tode lafik nan isi iya Lobanga iyo Parao manyu rece nino Aaron cia litongo ara kamocani nino. ² Ojir iteny sangite fad kuna larihohi nan isi, ojir rece nino Aaron orihohi Parao olahahi cio kulo Israel ofwo to kov nenge. ³ Ati atigol cia nan tau lo Parao na kokileng ngatii nan ticitici ko tanguhin ko kitotorita kunei kov lo Ijipt, ⁴ ida cia inyi kining isi. Ato hati cia nan afik kana nei kov lo Ijipt manyu to ticitici kuna hitoha kulo ngoto lo tenya ayauno cia nan kajihit kunei, cio kunei Israel. ⁵ Oto cia cio kulo Ijipt oyen ojo nan Lahitok kalacule cia nan kana nei Ijipt manyu ayauno Israel oleng tijia.” ⁶ Itii oho Moses ko Aaron iya na lotenyare LAHITOK iyo icieng. ⁷ Orumu karihin kulo Moses lara keek mietauni kulo Aaron keek mietauni ko uni na lotenyare icieng iyo Parao. ⁸ Tinyia ojo LAHITOK iyo Moses ko Aaron, ⁹ “Kolojo Parao iyo ite, ‘itiyoto tangu’, tijio iyo Aaron, ‘todumu iluk nino ibirohi ketemoni lo Parao oto cia ko lulworo ara munu’. ¹⁰ Dong ofwo oho Moses ko Aaron iyo Parao itii iya idi lotenyare LAHITOK. Ibirohi Aaron iluk nenge ketemoni lo Parao ko kulahitoha kunenge oto iluk ko lulworo ara munu. ¹¹ Parao ko kilolonguno kangenyak ko kalam ko ibwonok kulo Ijipt itii manyu icieng iya na to genyita kuneicieng: ¹² icieng tolobito tolobito ibirohini iluhi kof olulworo ara muniok. Ati odile iluk lo Aaron iluhi kuneicieng fad. ¹³ Ati orihe tau ko Parao ogol ida inyi oning tenya neicieng, iya na lotenyare Lahitok to ken. ¹⁴ Ojo LAHITOK iyo Moses, “Ida tau lo Parao olaha, oberu inyi lahahino cio ofwo. ¹⁵ Ifwo iyo Parao kiwanyi kuru langun loloro inyi kare. Itiricoto inyi kutuk lo Nail manyu itotek na iluk ngole lo lulworo ara munu. ¹⁶ Tinyia tijo iyo inyi, “kiculu Lahitok Lobanga lo cio kulo Ibru nan iyo isi lo rihohino isi ojo; ‘Ingohi cio kunei ofwo, ojir ofwori kiwori nan to mwang. Ati ko jijia irihe isi ida ining. ¹⁷ Tohi na loteny Lahitok ene, tone iyen cia isi jimitan ara nan Lahitok: to iluk na longon kana nino abok cia nan kifi kulo Nail ofwonu olulworo ara okoto. ¹⁸ Owei cia kayam to katwa lo Nail many ongwo kifi kulo kare many ida cio kulo Ijipt otum mata.” ¹⁹ Tona Lahitok ko jimitan iyo Moses, “torihohi Aaron, todumu iluk nino manyu to fetahi kac kunino kai lo kifi kulo kov lo Ijipt, kai ocerihin, ko kareco, kai lo itibihin ko tafara ko fajihit kuna longon kifi fad- oto cia ibelo ara okoto. Ongon cia okoto fajihit fad to kov lo Ijipt many katwa lo motiongo kulo morutok ko keyek.'' ²⁰ Itii oho Moses ko Aaron iya na lotenyare Lobanga to ken. Oting inyi iluk nenge to ketemoni lo Parao ko kunahitoha kunenge ko boho kifi kulo Nail kifi fad ko lulworo ara okoto. ²¹ Owei kayam to katwa lo Nail kare ko ngwojun bebe many ida cio kulo Ijipt otum mata kifi kunenge ongon afa okoto fajihit fad to kov lo Ijipt. ²² Ati itii manyu ibwonok jii to genyita kuneicieng dong ogol tau lo Parao, ida inyi owak ningo Moses ko Aaron iya na lojo Lahitok. ²³ Ibelo honyi orute kang lo okabwe nenge ida manyu kileng ibuha ene tenya. ²⁴ Oto cio kulo Ijipt fad obok kalelehin kulo kare Nail lo rumuno kifi kulo mata kifi kulo kare. ²⁵ Oring farihin mietare tona lobohore Lahitok Nail.