¹ Tinyia ojo Lahitok iyo Moses, Ilo iyo Parao tonyio latigol nan tau nenge ko taulo kulo kulahitoha kunenge ojir atiyore kuno kitotoriti kunei to kaji neicieng ² Ojir ite irihohi tee kuningi ko lotataha kuningi koditi na latiyore nan cio kulo Ijipt to ngere ko koditi na latiyore nan kitotorita kunei to kiji neicieng manyu ojir ite iyen jimitan nan Lahitok.” ³ Dong ofwo oho Moses ko Aaron iyo Parao ko jimitan iyo inyi, “Tohi na loteny Lahitok Lobanga lo cio kulo Ibru inyi ene ojo, “many anu cia iberu isi kitirieja ken to ketemoni nei? Tolahahi cio kunei ofwo ojir kiwori nan. ⁴ Kalimitere isi icieng fworo, aculu cia nan iterebuk kov nino kiwanyi. ⁵ Imuhe cia icieng kov many ida oboto. Okeru cia icieng na daha sidi lititongu igewa ara Lobito ko cianitok kuna longoni mana nino. ⁶ Ifutihi cia kajihit kunino ko kulo kulahitoha kunino ko kulo cio kulo Ijipt fad, tohi lafa lida apaico kode lohitwaha kuningi odeu many to fwonuno neicieng manya ene kov ko jijia.” Oto Moses ko kibelo olo ongerihi Parao. ⁷ Ojo kulahitoha kulo Parao iyo inyi, “Many anu cia itongo ene tungani ara owic iyo ohoi? Ingohi kuno cio tofwo ojir ofwo iwori Lahitok Lobanga neicieng. Orihe isi ida iyen jimitan lipalaru kov lo Ijipt?” ⁸ Tinyia inyiahahuni Moses ko Aaron iyo Parao ojo inyi iyo icieng, “Ifwo iworata Lahitok Lobanga ningi. Ati kirihohi nan oho ngai lofworo.” ⁹ Inyiahahi Moses inyi ojo, “kifworo ohoi ko tee ko ngoroyok ko tee kilahaji ko tee kariok kuniyang ko sang, kiri, kera ko kicu tonyio kifworo ohoi daha karama iyo Lahitok.” ¹⁰ Ojo Parao, “Ingohi Lahitok kingon ko ite kalahilahahi nan ite ifwo ko ngorwo ko tee! Oboto jimitan itongo ene fworo ningi ara lo rohojun. ¹¹ Ida! Ingohi rei keken tofwo kiwora Lahitok, ara tohi na litifia ite inyi na.” Oto ko kifuharoti Moses ko Aaron to ketemoni lo Parao. ¹² Oto Lahitok ojo iyo Moses, “Todong kana nino kai lo kof lo Ijipt ojir iterebuk ibuluno ene kof okeru sangite fad kuna lobu to manatak, sangite fad kuna lititongu lofalanga.” ¹³ Oto Moses ko fetaru iluk nenge kai lo kov lo Ijipt, oto Lahitok icio kiyoma lo ngati lo okangere okuta na far doony ko karwe mwaa kai lo kov. Kiwanyi liyauno na kiyoma iterebuk. ¹⁴ Ipude kov lo Ijipt fad manyu odohini fajihit kulo kov fad, oborengi ilany. Ida orumu lobo jiok lo iterebuk na lori iya na litiihino kov lo Ijipt oru manyu lobo to kifwongi. ¹⁵ Imuhori kov fad many irwok kov ara icieng. Okeruni sangite pili kuna litotongu lofalanga- sangite pili kuna lobu manatak ko ngak kuna to kai lo cianitok. Oru lobo tohi inyiori lotong kai lo cianitok kode manatak to kov lo Ijipt fad. ¹⁶ Ilolongu Parao Moses ko Aaron deu deu ko jimitan iyo icieng, “Lapal nan ketemoni lo Lahitok Lobanga ningi ko ketemoni ningi. ¹⁷ Jijia itolau kipal nitole ari manyu ilifa iyo Lahitok Lobanga ningi odume ene jiok litibanga to ken nei.” ¹⁸ Ingohi dong Moses Parao ko kilifa iyo Lahitok. ¹⁹ Manyu ibel Lahitok na kiyoma ara kiyoma lo ngati lo lodoyore lo kolong na igol ko tingoro iterebuk fad ijuhohi katwa lo nam na ido, oru lobo iterebuhiti bito lotong kov lo Ijipt. ²⁰ Ati itigol Lahitok tau lo Parao ida iruk lahahino Israel ofwo. ²¹ Oto Lahitok ojo iyo Moses, “Toting kac kunino iya kai ojir mutohun olotu kov lo Ijipt- mutohun lokimuyuk na irioci. ²² Oto Moses lo tingo kac kunenge iya kai, oto lokimuyuk ipude kof lo Ijipt fad to faritin uni. ²³ Oru lobo tungani lodeu kaletoni kode olo lobo faji to faritin uni. Adi hony cio kulo Israel ongon ko wangun fajihit kuna longoni icieng. ²⁴ Tinyia ilolongu Parao Moses oto ojo, “Ifwo iworata Lahitok. Otum ngorwo ko tee kuningi fworo ko ite, itongerihiti sang keken otong kifwongi. ²⁵ Ati ojo Moses, “Ojir isi iruk ohoi kiyaru kiciorita kuna lohifworo fejohino iyo Lahitok Lobanga niyang. ²⁶ Ojir sang kuniyang manyu kilik ko ohoi ida lobo otong kifwongi. Kifwo ohoi kitiyore kude to kiji neicieng kiworare Lahitok Lobanga niyang many kigoru ohoi ijia, ida ohoi kitum yenun nyio kiworare ohoi Lahitok Lobanga niyang.” ²⁷ Ati itigol Lahitok tau lo Parao, manyu ida inyi owak lahahino icieng ofwo. ²⁸ Ojo Parao iyo Moses, “Ilo to ketemoni nei. Tode jimitan ida isi inyiahat boto ketemoni nei ari! Far na lideunore isi komom nei iwei cia isi.” ²⁹ Inyiahahi Moses iyi ojo, “Iya na litany isi. Ida cia nan anyiahat lotuno ketemoni nino ari.”