¹ Inyiahahi Moses ojo, "Adi ba ngida iruhi tenya nei kode ida oningi nan, manyu ojimi, "Ida Lahitok loboto diho isi?" ² Oto Lahitok ojo diho inyi, "Nyio na kana nino?" Inyiahahi inyi ojo, "Iluk" ³ Ojo Lahitok diho inyi, "Ibirohi kof." Ibirohi Moses iluk kof, oluluoro ara munu. Ife inyi iyo iluk. ⁴ Ojo Lahitok diho inyi, "Yaru kana iniefa kalicik." Dong ocule Moses kana inief munu, oto ko luluoro ara iluk ari to kana nenge. ⁵ Ojo Lahitok, "Ara ene ojir icieng iruk jimitan Lahitok Lobanga lo apaicio kuneicieng, Lobanga lo Abraham, Lobanga lo Isako ko Lobanga lo Jakob loboto diho isi. ⁶ Ojo Lahitok, "Tofik kana katua lo kyela nino." Oto Moses ko fiha kana katua lo kyela nenge, ojo odumu oleng, ongon talulu kana. Okwe kana iya lofalanga. ⁷ Ojo Lahitok iyo inyi, "Inyiahahi katua lo kyela." Inyiahahi Moses kana nenge katua lo kyela, ojo odumu, orumu loitu oriworo ko ken nenge fad. ⁸ Tinyia ojo Lahitok, "Kalida icieng iruk tenya nino kode itibasari na kitotori lo lobito, otum cia icieng iruk lo are. ⁹ Ati kalida icieng iruk kuno kitotorihin are fad kode ida oningi tenya nino, toyohu kude kifi to nam lo Nail, ijuhohi kof na itou. kuna kifi liyohu isi to kare, ibelo cia ara okoto kalijuhohi isi kof." ¹⁰ Ojo Moses diho Lahitok, "Tolau karwaani nino Lahitok. Ida nan ara katenyani otoc many to okisidi ko jijia litenyare isi ko karwaani nino. Ara nan tungani na loyeta tenya caafi manyu itola ngadief." ¹¹ Ojo Lahitok diho inyi, "Ngai licio cio kutuhe? Ngai lofik icieng otuhoho kode otulaha? Ngai licio icieng konyeha kode ofik icieng ongodoho? Ida nan Lahitok? ¹² Jijia ilo alwak cia nan isi to tenya manyu ahiteyen isi tohi na ngiteny isi." ¹³ Ati ojo Moses, "Tolau karwaani nino Lahitok, tocule ja lobo tungani ake." ¹⁴ Oto Lahitok ilongojihi Moses many ojo, "Adi rece nino Aaron Levini? Ayen nan ajo otum inyi tenya otoc. Longon manyu inyi kikoi lolotuno kitiricio isi, manyu okwama cia inyi deuno isi. ¹⁵ itenya cia isi ko inyi ifik tenyitenyi kutuk nenge, ahilwak cia nan ite are fad to tenya manyu ahitiyen ite tohi na ngitii ite. ¹⁶ Otenya cia inyi ko cio to isi, manyu ori cia inyi iya kutuk nino. Manyu iri cia isi mejo Lobanga diho inyi. ¹⁷ Ati yaru ene iluk to kana nino ojir itiyore kitotorita." ¹⁸ Tinyia oite Moses iyo komoni nenge Jetro, olo ojo diho inyi, "Ingohi ba aite nan iyo cio kunei idi Ijipt alo ade kolorihe ba lobo owar." Ojo Jetro diho inyi, "Ilo ara na ijir." ¹⁹ Tinyia orumu Lahitok lojo iyo Moses to kof lo Midian, "Toite iya Ijipt tonyio loweiha kulafa cio lohitahita kifadaru isi." ²⁰ Dong odumu Moses ngorwani nenge ko tee kunenge ofik kai lo sigiria ko kiciaha iitoro iya Ijipt. Manyu iyaru inyi iluk lo Lobanga to kana nenge. ²¹ Ojo Lahitok iyo Moses, "Kaliite isi Ijipt, itiyo ketemoni lo Parao kuna kitotorita fad lahicio nan isi golun lo kitiyo. Ati atigol cia nan tau nenge ida iruhunore cio fworo. ²² Tinyia toteny diho Parao ijo, "Tohi na loteny Lahitok inyi ene, 'Ara Israel kito nei okang ²³ manyu ahirihohi isi ajo ingohi kito nei tolo, ojir olo kiwor nan. Ati iberu isi ngerihino inyi olo, tona afade cia nan kito nino okang." ²⁴ To laperit to kikoi, itiric Lahitok Moses manyu omana kifadaru inyi. ²⁵ Ati odumu Zipora ngalem na iko ko ngutuno belelie lo ketemoni lo kito nenge otirore kejuha kulo Moses. Ojo inyi iyo Moses, "Dede ira isi iyo nan lateran lo okoto", ²⁶ oto Lahitok ko ngerihino inyi tona tik lojo inyi, 'lateran lo okoto' to tenya lo kiliraru. ²⁷ Ojo Lahitok diho Aaron, "Ilo mwangatare kitiricio Moses." Dong itiric inyi Moses gum lo donge lo Lobanga ko kimaruha inyi. ²⁸ Tinyia orihohi Moses Aaron sangite fad kuna loculahi Lahitok inyi tenya manyu ko kitotorita fad kuna lojo ojir inyi itii. ²⁹ Otubu oho Moses ko Aaron lohitwaha kulo Israel fad, ³⁰ manyu orihohi Aaron icieng sangite fad kuna loteny Lahitok diho Moses. Itii manyu inyi kitotorita to ketemoni lo cio, ³¹ manyu iruk icieng. Manyu koloning icieng ojo ibuha Lahitok to icieng manyu lodeu mehino neicieng, ogungiti iwori Lobanga.