¹ Dong orumu Moses itibala kera kulo komoni nenge Jesro, kadwarani lo Median, oto inyi itibalaru many faji na iloma to mwang ko lotuno many Horeb, donge lo Lobanga. ² Tijia oboto Malaika lo Lobanga iyo inyi iirangi lo kima iyo tim. Odeu Moses jimitan kileng locura kima ida tim ocuraru. ³ Dong ii Moses ojo, “Alo ja nan ade ene tohi ……, nyio ida tim ocuraru. ⁴ Kalodeu Lobanga jimitan logere inyi olo deya, ilolong Lobanga inyi to katwa lo tim ojo, “Moses! Moses! Oto Moses ojo, “Nan ene”. ⁵ Ojo Lobanga iyo inyi, “Kerihe inyihu, to puce kamuha to kejuha kunino tonyio onyu ene kof liwoitare isi”. ⁶ Oto ojo iyo inyi, “Nan Lobanga lo apa nino, Lobanga lo Abraham, Lobanga lo Isako ko Lobanga lo Jakob”. To ningo jii, iduhahi Moses komom nenge tonyio orumu obang deya Lobanga. ⁷ Ojo Lahitok, “Ladeu nan dede mehino lo cio kunei to kov lo Ijipt. Laning nan icieng icira to kulahitoha kuna lititiyo icieng, manyu abuha bab to kidak neicieng. ⁸ Dong laculuno nan lwahuno icieng to kac kulo cio kulo Ijipt ko kiyauno icieng oleng tona kov iyo kov na ijir ilalat, kov na litihita lei ko otoro, kov lo cio kulo Kanaan, Hitit, Amor, Periz, Hivit ko Jebus. ⁹ Dong jijia logoru kicira lo cio kulo Israel iyo nan manyu ladeu nan koditi na litigimare cio kulo Ijipt icieng. ¹⁰ Jijia dong ilo acularu nan isi iyo Parao lo kiyauno cio kunei kulo Israel oleng to Ijipt.” ¹¹ Ati ojo Moses iyo Lobanga, “Ngai nan na lojir alo iyo Parao lo kiyauno Israel to katwa lo Ijipt?” ¹² Manyu ojo Lobanga, “Angon cia nan ko isi manyu ara cia ene kitotorita jimitan nan lacularu isi: Kaliyauno cia isi cio to katwa lo Ijipt, ifwonu cia ite iwor Lobanga kai lo ene donge. ¹³ Ojo Moses iyo Lobanga, “Adi ba ngalo nan iyo cio kulo Israel ajo, “lohiculu Lobanga lo apa ningi nan iyo ite”, oto icieng kitifi nan ojo, “Ngai karana nenge? Dong ojir nan arihohi icieng ajo aja?” ¹⁴ Ojo Lobanga iyo Moses, “NAN INYI NAN”. Tohi na ngirihohi isi cio kulo Israel inyi ene, “lohiculu NAN nan iyo ite”. ¹⁵ Orihohi manyu Lobanga Moses ojo, “Tijio iyo cio kulo Israel, “Lahitok Lobanga lo apaico kuningi, Lobanga lo Abraham, Lobanga lo Isako ko Lobanga lo Jakob, lohiculu nan iyo ite”. Karana nei ene tur, Karana na lohilolongore ite nan to kofiangiti many kofiangiti. ¹⁶ Ilo to tubahi lohitwaha kulo Israel manyu irihohi icieng ijo, “Lahitok Lobanga lo apaico kuningi, Lobanga lo Abraham, Isako ko Jakob loboto iyo nan manyu ojo; laning nan ite manyu ladeu tohi na litiyoti iyo ite to kov lo Ijipt, ¹⁷ manyu lacik nan lo kiyauno ite iyo mehino na lingonore ite kov lo Ijipt ko kiyaru ite kov lo cio kulo Kanaan, Hivit, Amor, Perez, Hitit ko Jebus kov na litihita lei ko otoro”. ¹⁸ Oning cia lohitwaha kulo Israel kutuk nino. Oto hati isi ko lohitwaha kulo Israel ifwo iyo kabu lo Ijipt ifwo ijo iyo inyi, “Lohiric Lahitok Lobanga lo cio kulo Ibru ko ohoi. Kingohi ohoi kifwo owele lo faritin uni katwa lo mwang kifwo kifotohi kicorita iyo Lahitok Lobanga niyang.” ¹⁹ Ati ayen nan jimitan ida cia kabu lo Ijipt kingohi ite ifwo manyu kalifudahi kana na igol inyi. ²⁰ Dong adong cia nan kana nei abok Ijipt to tanguhin fad kuna cia latii nan kiji neicieng. To kifwongi lo na, kilahahi cia ite ifwo. ²¹ Manyu acio cia nan cio kulo Ijipt imoroti iyo iyo kuno cio ojir kaliwoju ite, ida ifwo otowi kac. ²² Ojir ngorwo fad ilifu iyo loryehati kuneicieng sangite kuna cia liticiefohi ite iyo tee kuningi rei ko kariok. Dong tona kikoi ibel cia ite cio kulo Ijipt.