¹ Tinyia oyem lobo tungani lo imanit lo Levi ngorwani nenge Levini ² manyu olotu inyi ifonga ko tomonuno kito retoni. Kolodeu inyi ojo ara kito retoni na idwaru, iduk inyi to ofahin uni. ³ Ati langun lodeu inyi ojo lida inyi atum kiduha inyi, oto odumu aduhu na loduho to farakaka ko dwanya katwa ko oleng to odok. Oto inyi ko kitigetohino kito katwa ko kiyaru otirohi katwa lo farakakare kutuk lo kare. ⁴ Owoita kanece lolomaje lo deya tohi na ngitiihino iyo inyi. ⁵ Oto kito karioni lo Parao olo kare kilala, oto kalihitak ko inyi olotitati, itolitati kutuk lo kare. Odeu inyi aduhu to kiji lo farakaka ko cularu opiini nenge karioni loro tinguno. ⁶ Onga inyi ko deuno kito, icira kito oto omehino diho inyi. Ojo inyi, “Ara ene Lobito to kiji lo tee kulo Ibru.” ⁷ Oto kanece ko kitifa kito lo Parao ojo, “Ngalo ha nan ayauno lobo ngorwani Iburuni kitinahahi isi ene kito?” ⁸ Ojo inyi, “Ibo ilo”. Oto na kito olo iyauno ngoto kito. ⁹ Ojo kito lo Parao iyo inyi, “Yaru ene kito ilo kiricahi nan, manyu ahidum cia nan isi. Dong iyaru na ngorwani kito olo itinak. ¹⁰ Langun lobolo kito iyaru ngotenge inyi iyo kito lo Parao olo ara kito nenge. Itibarahi inyi ojo Moses jimitan “awadu nan inyi to katwa lo kifi.” ¹¹ Lobo far, langun lobolo Moses, isabe inyi iya faji lo cio kunenge deya icieng iyo tic lo igim neicieng. Odeu inyi Ijiptoni oluno Ibruni Lobito to kiji lo cio kunenge. ¹² Ongolo angati ko angati kolodeu ojo oru tungani lodeya, ifade inyi na Ijiptoni ko nuhahino singetare. ¹³ Kiwanyi nenge olo inyi orumahi Ibru are obaha. Itifi inyi Lobito na lipal ojo, “Nyio ilumo isi Ibruni kaletoni?” ¹⁴ Ojo na tungani iyo inyi, “Ngai lofik isi ara kalanyunoni ko kangotoni lo tenya iyo ohoi? Ibuha isi kifadaru nan iya na langole lifadarore Ijiptoni?” Oto Moses ko bangun ibuha ojo, “Ojir loyeniti langole tohi latii nan.” ¹⁵ Koloning Parao ene tenya, oto otem kifadaru Moses ati ifiri Moses iyo Parao ko loro kitongo Midian, olo itongohino kalele lo itibi ¹⁶ Na ha orumu lobo kadwarani lo Median ongon ko tee kariok mietare, manyu ofwonu icieng yohohino kifi iyo tigol omatare kera kulo apa neicieng. ¹⁷ Ofwonu kude katibalak ifuhe icieng ati owoju Moses olwahu icieng ko yohohino kera kulo apa neicieng kifi. ¹⁸ Koloite kuna tee kariok iyo apa neicieng Revel, itifi inyi icieng ojo, “Nyio iitu ite berien elefar?” ¹⁹ Inyiahahi icieng inyi ojo, “Lobo Ijiptoni lohilwahu ohoi iyo katibalak, oyok manyu kifi itimat kera kuniyang. ²⁰ Itifi Revel tee kunenge ojo, “Ongon hati inyi aji? Nyio ingohi ite inyi? ilolongutu inyi olotu onyia lobo tohi.” ²¹ Iruk Moses kitongo kolo na tungani icio inyi kito nenge Zipora iyo inyi ara ngorwani. ²² Otomonu Zipora kito retoni itibarahi Moses inyi ojo Geresom jimitan lara nan misiohoni to kof lo misiok. ²³ To kuna faritin iborengi, olotu kabu lo Ijipt owei. Itudita cio kulo Israel iyo na ticitici lo opii neicieng icirati oto na kicira neicieng to lwaha to na tic lo opii neicieng olo kai iyo Lobanga. ²⁴ Oning Lobanga kitudita neicieng oto iiu ciharu nenge ko Abraham, Isako ko Jakob. ²⁵ Oto Lobanga ode cio kulo Israel manyu ibuha to icieng.