¹ To kifwongi ofwo oho Moses ko Aaron iyo Parao orihohi inyi ojo, “Tohi na loteny Lahitok Lobanga lo Israel inyi ene: “Ingohi cio kunei to fwo, ojir ofwori onyia karama iyo nan to mwang”. ² Ojo Parao, “Lahitok inyi ngai na nganing nan inyi acio Israel ofwo? Ida nan ayen Lahitok manyu ida nan angerihi Israel ofwo.” ³ Tinyia ojo icieng, “Lohiric Lobanga lo cio kulo Ibru ko ohoi. Jijia ingohi kifwo ohoi owele lo faritin uni mwangatare kifwo kifotohi kiciorita iyo Lahitok Lobanga niyang koloru, kikeru ciao hoi to jiok kode to fere.” ⁴ Ati ojo kabu lo Ijipt, “Moses ko Aaron nyio idumaru ite cio to tic neicieng? Itoite tic ningi!” ⁵ Oto parao ojo, “tode loborengi jijia cio kulo kov manyu itiho ite icieng to tic neicieng.” ⁶ Lafar bito Parao ko kicwara ene cik iyo katitiyok ko kaririak kulo tic kuna lolanyu cio: ⁷ Kerihe icio kuno cio nyiari kulo doho matafali; ingohi icieng tofwo ongeru nyiari kuneicieng to kenite kuneicieng. ⁸ Ati ingohi tobohi langun wel lo atafali lo tik tik, ketingor na wel. Okaruha icieng inyi licio otenyati ojo, “ingohi kifwo kifotohi kiciorita iyo Lobanga niyang.” ⁹ Itofik tic ogol iyo cio ojir itiyoti ida ongoti tenyi tenyi kulo talerun.” ¹⁰ Oto katitiyok ko kaririak kulo tic ofwo orihohi cio ojo, “tenya na loteny Parao ene: “Ida nan arihe ahicio ite nyiari.” ¹¹ Ifwo itotak nyiari to kenite kuningi faji na litum ite rumahino ati ida cia itingori tic ningi ko lobo sidi.” ¹² Dong isarihi cio kov lo Ijipt fad gara tanyanya ara faji lo nyiari. ¹³ Oruha katiyok icieng ojo, “itifutata tic na lowahiti iyo ite to faritin fad iya langun licioritarihin ite nyiari.” ¹⁴ Manyu olumo katitiyok kulo Parao kaririak kuna lara Israel kuna lofik icieng olanyu cio itifiati ojo, “Nyio ida ite itifut wel lo matafali kuningi ngole ko enefar iya langun lo tik tik?” ¹⁵ Tona ofwo kaririak kulo tic kuna lara Israel kitifia Parao: Nyio itiyo isi karwaak kunino jii? ¹⁶ Ida iciori karwaak kunino nyiari, ati ojimi iyo ohoi, “itibok matafali!” Olumoti karwaak kunino ati kipal ara lo cio kunino. ¹⁷ Ojo Parao, “Kakarwak, icieng ira ite, kakarwak! Inyi licio ite itiringa tenya ijio, “Ingohi ohoi kifwo kifotohi kiciorita iyo Lobanga.” ¹⁸ Jijia ifwo kitiyo. Ida cio kiciori ite nyiari, ati ojir ibok matafali ifut wel. ¹⁹ Ofwonu Israel kaririak oyen ojo kingon icieng iyo kidak tona lorihohinorehin icieng ojo, “Ojir ida itong wel lo matafali kuna lowahiti ite ibok to far Lobito. ²⁰ Kolongerihi icieng Parao, orumuni Moses ko Aaron itila kirico ko icieng, ²¹ icieng ko jimitan, “Ingohi Lahitok kide ite manyu ongot tenya ningi! Licio isi ohoi kingwoji iyo Parao ko kulahitoha kunenge manyu lifik ite ngalem kana nenge lo kifada ohoi.” ²² Oite Moses iyo Lobanga olo ojo, “Nyio Lahitok, nyio iyauno isi kidak iyo kuno cio? Inyi ene tenya liculunore isi nan ene? ²³ Manyu to loro nan iyo Parao tenya to karana nino, liyauno inyi kidak iyo kuno cio ida manyu isi ilwahu cio kunino tur.”