¹ Ikukuma kema lomanyare to cukahin tomon kulo kyela iribi kuna litibibili kuna ifurangi, imalangi ko kuna lodoriari kuna loduhohini kitiririta kulo cerubihin ijia na litii katibibilani na igeny. ² Ojir kuna cukahin oriworo, karitun yadihin tomon ko ongon, lalatun yadihin are. ³ Totubahi cukahin miet ara lobito kunakude miet manyu ara lobito. ⁴ Tofihahi fajihit kulo jarara kutuhe kulo cukahin iyo itubit lobito to usi na ifurang, itiyo many ori iyo na itubit bito manyu jii. ⁵ Tofihahi fajihit kulo jarara keek miet iyo cukahin kulo itubit lobito ifik manyu fajihit kulo jarara keek miet iyo itubit lo are ingohi fajihit kulo jarara isirani ko kuna longon to lobito ngati. ⁶ Ito hati ikukumu jarara to dahab kuna kuna limorunore kuna cukahin ara lobito ojir kema olotu ara lobito. ⁷ Ikukumu cukahin kulo fofi kulo kiri ara kimuhi lo kema lo lomanyare, ojir kuna cukahin ara tomon ko lobito. ⁸ Ojir karitun kuneicieng ara yadihin tomon ko miet ko lalatun kuneicieng ara yadihin are. Ojir kuna cukahin tomon ko lobito oriworoho. ⁹ Imorahi cukahin miet ake, imorahi manyu kunakude ile ake. Itulo cuka kiti ile are ketemoni lo kema. ¹⁰ Tofihahi fajihit kulo jarara keek miet lohicungi lo cukahin kulo ketemoni manyu ifik fajihit kulo jarara keek miet lohicungi lo kuna cukahin kude. ¹¹ Ito hati ikukumu jarara to mwala kuna limorunore kuna cukahin ojir kema ara lobito. ¹² Ojo na cuka lotong, ojir na cuka bito lotong imuk kifwongi lo kema. ¹³ Otong cia karitun lo cuka futi lobito ko nusu fajihit fad, inyi cia limuk marihin kulo kema. ¹⁴ Ikukumu kimuhi lo kema to fofi kulo mongi kulo kera na libuyi to renge na ido manyu icadohohi kiyene na isisik kai nenge. ¹⁵ Togatu bauhin kuna ibiri kulo ciani lyerati ara guri kitiwoitita kulo kema. ¹⁶ Ingohi karitun lo kuna bauhin guri ara futi tomon ko miet ko lalatun futi are to guriti lobito lobito. ¹⁷ Ingohi guriti lobito lobito tongon ko kejuha are ara tedohin imorahinorihin icieng. Ikukuma guri kulo kema fad oriworo iya na. ¹⁸ Ikukuma guri kulo kema kulo ngati lo orof keek are. ¹⁹ Manyu ikukumu tedohin keek ongon to rial kuna litiricorehin icieng tedohin are to guriti lobito lobito to keju lobito. ²⁰ To lobito ngati, ngati lo kai lo kema ikukumahi guri keek are ²¹ ko tedohin kulo rial keek ongon, are to guriti lobito lobito. ²² Ikukumahi guri ile ifik ngati lo lodoyorore lo kolong lo kema ²³ manyu ikukumahi guri are kulo rukun lo ngati lo lohicungi. ²⁴ Iyo kuno rukuni are ojir icieng irwata many to kof many kai many opucahino iyo oguliti lobito ojir icieng are fad ori jii. ²⁵ Tona ara cia guri mietauni ko tedohin kulo rial tomon ko ile, are iyo guriti lobito. ²⁶ Manyu togatu riho iyo bau lo ciani lyerati, icieng miet to lobito ngati lo kema, ²⁷ miet manyu kulo lobito ngati, miet manyu kulo ngati lo lodoyorore lo kolong, lohicungi lo kema. ²⁸ Ojir riho ongon kijihin kulo guri to lohiciahi many lohicungi lo kema. ²⁹ Todwany guri to dahab manyu tofik oguli kulo dahab opucahinorehin riho. Todwany manyu riho to dahab. ³⁰ Itiwoitahi kema ori iya kitotori na lohitibotohini isi to donge. ³¹ Torifu kyela kiyenit to usi na ifurang, na imalang ko na ido, kyela iribi na lorifahini kitiririt lo cerubihin ken na litii katibibilani na igeny. ³² Toihahi to oguli kulo dahab iyo guri ongon kulo bau lo ciani lyerati kuna lodwanyi to dahab owoita to tedohin kulo rial ongon. ³³ Toihahi kyela kiyenit to oguli iyo riho kai lo guri ifik sanduk lo cihicihi korwong nenge. Okor cia kyela kiyenit faji na Inyu ko faji na Inyu Ogal. ³⁴ Tofik kimuhi lo kisa kai lo sanduk lo cihicihi iyo faji na Inyu Ogal. ³⁵ Tofik meja ele ngati lo kyela to ngati lo kai lo kema ifik hati lomo isiran ko inyi to ngati lo orof. ³⁶ Torifu manyu kyela kigenit lo agwala lo kema to usi na ifurang, na imalang ko na ido, kyela iribi na likukum katibibilani na igeny. ³⁷ Ikukuma kigolihin kulo dahab ko guri miet kuna logatuni iyo ciani lyerati idwany to dahab ito hati ikukumu tedohin kulo mwala miet iihahinore na kyela kigenit.