¹ Ojo Lahitokdiho Moses, ² "Torihohi cio kulo Israel iyauno kiciorita diho nan. Ojir isi ilifu kiciorita kunei iyo tungani na lorihohi tau nenge inyi kicwara. ³ Ara kuno kiciorita kuna lojir isi ilifu diho icieng: dahab, rial ko mwala; ⁴ usi na ifurang, na imalang ko na idorie ko kyela iribi; Ko fofi kulo kiri ⁵ kyelani kulo mongi kulo kera ko koditi lo lobo kiyeni isisik, bau lo ciani lyerati; ⁶ ngoroni lo lomo, ko cianitok kuna iuri kuna likarutorihin ngoroni kitweita ko longorlehin ko iheru: ⁷ ko moru oniks ko morutok kuna imedehi kunakude kuna lojir odwanyahini iyo kyela epod ko ogogor lo locolo. ⁸ Ingohi manyu icieng ikukumahi lohitongore nei na inyu kiji neicieng ato cia nan amanya kiji neicieng. ⁹ Ikukumata na lomanyare inyu ko sangite kuna longoni katua itiririhi ko na lahitotorohino nan isi token. ¹⁰ Ingohi togatuni sanduk iyo bau lo ciani lyerati na lara karitun nenge futi ongon, lalatun nenge futi are ko woita nenge futi are. ¹¹ Itodwany katua ko oleng fad to dahab na locoli manyu ifik lohileleri lo dahab kutuk nenge iric. ¹² Itoculu oguli ongon itiryehahi ko kejuha kunenge, oguli are lobito ngati are manyu lobito ngati. ¹³ Itogatu keyek kitingihin are iyo ciani lyerati idwany kenite kuneicieng to dahab. ¹⁴ Itirutohiti kuna keyek kitingihin iyo oguli kuna loryeha ko kejuha otingororehin sanduk. ¹⁵ Ojir kuna keyek kitingihin iwasihi iyo oguli ida outoritati oleng. ¹⁶ Ito hati ifik morutok kulo cihicihi kuna cia lahicwara nan isi katua lona sanduk. ¹⁷ Ikukumata kimuhi lo kisa to dahab na ilihinya na lara karitan nenge futi ongon ko lalatun nenge futi are. ¹⁸ Manyu ikukuma cerubihin are to dahab na lidonguni ifihahi lohicungihin kulo na kimuhi. ¹⁹ Tofik lobito cerubi lohicungi lobito lo kimuhi, lobito manyu lohicungi lobito. Ingohi kuna cerubihin ikukumuni ara lobito ko kimuhi iyo lohicungihin. ²⁰ Ojir fuho kulo cerubihin otingo ofeta iya kai imuk kimuhi. Ojir cerubihin odeya kenite otany iyo kimuhi. ²¹ Tofik na kimuhi kue lo sanduk orumu lifik katua lo sanduk morutok kuna ligero cihicihi ijia kuna cia lahicio nan isi. ²² Inyia kue lona kimuhi kiji lo cerubihin kuna longon kai lo sanduk lo cik, kiric cia nan ko isi manyu ahicio isi cihicihi kunei fad to cio kulo Israel. ²³ Ikukumuti meja to bau lo ciani lyerati na lara karitun nenge futi uni, lalatun nenge futi lobito ko nusu ko woita nenge futi are. ²⁴ Itodwany ken nenge to dahab na locoli manyu ifik lohileleri kalele nenge iric. ²⁵ Tofik itadit nenge na lotum rijon ko tadati lo kana manyu ifik lohileleri lo dahab iyo itadit nenge. ²⁶ Ikukumu ogulihin kulo dahab ongon kulo meja manyu iticurahiti iyo rukuni kunenge kuna longoni kejuha kulo meja. ²⁷ Ingohi oguli tongon tang ko lohileleri ojir itirutohinorihin keyek kitingihin kulo meja. ²⁸ Itigatu keyek are iyo bau lo ciani lyerati idwany kenite kuneicieng to dahab itingore meja. ²⁹ Manyu ikukumu ikoriti ko sahani kunenge to dahab ara lobito ko motiongo ko ilebuha kunenge kuna lijuhorihin kiciorita. ³⁰ Itofik mugati ketemoni nei kai lona meja faritin fad, tiktik. ³¹ Ikukumu lomo to dahab; idongu fotiri, kiniefi, tanitani, bene ko lohimosi ko katurahak kunenge ara lobito. ³² Ojir tanitani ile ocaru to kiniefi lo lomo uni angati ko uni lobito angati. ³³ Iyo kuna tanitani kunenge angati ojir ongoni kubayahin uni kuna lori iya katurahak kulo iyau ojir lobito lobito ongon ko lohimos nenge ko katurahiti manyu, ojir iyo tanitanihin kulo angati manyu ongoni kubayahin uni kuna lori iya katurahak kulo iyau na longon lobito lobito ko lohimos ko katurahiti nenge na lopar tanitanihin ile fad irit kiniefi lo lomo iya na. ³⁴ Ojir iyo kiniefi lo lomo token ongon kubayahin ongon kuna lori iya katurahak kulo iyau. ³⁵ Ongon cia kubaya lobito locarare lo tanitanihin ketemok, kubaya lo are iyo locarare lo tanitanihin kulo are ko kubaya lo uni locarare lo tanitanihin kulo uni - tanitanihin ile fad. ³⁶ Ojir kuna kubayahin ko kiniefi lo lomo ara na lidonguni lobito iyo dahab na ilihinya. ³⁷ Tinyia ikukumu lomohin kunenge mietare itedohi kai lo kuna tanitanihin kulo kalele ko lo kiji, ojir inwaha faji na longon ketemoni nenge. ³⁸ Ojir kingutita kulo kofi kunenge ko sahani kunenge idonguni iyo dahab na ilihinya. ³⁹ Ojir dahab na lotum kirioci nenge ratili mia lobito ikukumarihin lomo ko sangite kunenge kunakude fad. ⁴⁰ Ojir iric jimitan ikukumi kuna sangite dot itiririhi ko kitotori na lohitibotohini isi to donge.