¹ Tinyia ojo Lahitokdiho Moses, "Ou diho Lahitok, isi ko Aaron, Nadab ko Abiu ko lohitwaha kulo Israel keek mietare. Ojir ite iwora lolomaje ² ati Moses ake loringu diho Lahitokojir kulakude cio ida ofwonu onyihu. Manyu ojir cio ida ilihu ko inyi." ³ Ko lolo Moses orihohi cio tenyitenyi kulo Lahitokfad ko cihicihi kunenge, inyiahahi icieng to ogoro lobito ojo, "Sangite fad kuna loteny Lahitok, kitii cia ohoi." ⁴ Oto Moses ko kigero sangite fad kuna loteny Lahitok. Owoju inyi berien kiwanyi nenge ko duhohino ciali fotiri lo donge ko kicidohino morutok tomon ko are kuna lowoita to imaniti tomon ko are kulo Israel. ⁵ Oto inyi ko cularu tee kilahaji kulo Israel ofwo icieng ifotohi kiciorita locurati ko kicwara mongi kuna lorihe ongarihi ara kiciorita kulo kimora diho Lahitok. ⁶ Odumu Moses nusu lo okoto ofik iyo ilebuha, odumu nusu na lotong orwacahi iyo ciali. ⁷ Oto inyi ko dumuno buk lo ciharu ikenahi diho cio. Inyiahahi icieng ojo, "Kitii cia ohoi sangite fad kuna loteny Lahitok, kining cia ohoi." ⁸ Oto Moses ko dumuno okoto orwacare cio ko jimitan, "Ara ene okoto lo ciharu na lofik Lahitokko ite iya na longonore iyo kuno tenyitenyi fad." ⁹ Oto Moses, Aaron, Nadab, Abiu, ko kuna lohitwaha kulo Israel keek mietare ofwo kai ¹⁰ ko deya Lobanga lo Israel. To lonyonare lo kejuha kunenge ongon lobo tohi lofeta iyo tabak lo moru na imedek ifurang iya kai to ken. ¹¹ Ati ida Lobanga oting kana lo kifada kuno lohitwaha kulo Israel, odeu icieng Lobanga odahati manyu omatati. ¹² Ojo Lahitokdiho Moses, "Ou ene diho nan kai lo donge manyu itongo ene ato cia nan ahicio isi morutok kuna ligero cik ko cihicihi ara kulo kiteyena icieng." ¹³ Tinyia olo moses ko kajifitani nenge Joshua, oto Moses irwok kai lo donge lo Lobanga. ¹⁴ Ojo inyi iyo lohitwaha, "Itongoti ene kitila ohoi many kiitu ohoi diho ite. Ongon Aaron ko Hur ko ite, kolongon lobo tungani ko tenya otum olo diho icieng. ¹⁵ Ko lolo Moses kai lo donge, imuhe idis donge. ¹⁶ oto kimedek lo Lahitokko kitongo kai lo donge lo Sinai. To faritin ile imuhe idis donge ojo far lo mietare ilolong LahitokMoses to katua lo idis. ¹⁷ Diho cio kulo Israel oboto kimedek lo Lahitokori mejo kima na locura okeru to kai lo donge. ¹⁸ Oto Moses orute iyo idis kololoro inyi kai lo donge, manyu itong inyi kai lo donge faritin keek ongon ko karuehin keek ongon.