¹ Ketikwat tenyitenyi kulo talerun. Kesisi tungani kapalani to kisaden to tenyitenyi loguliati. ² Kejif ilulung iyo kitiyo tohi na irohoi. Kalicwara isi tenya lo kisaden to lokiho kejif ilulung iyo kudo lo tenya na ibir ³ manyu kesisi tungani na ikidak to lokiho. ⁴ Kalilufu isi mongo kode sigiria lo meroni nino orijoro, tode jimitan inyiahe iyo monye. ⁵ Kalideu isi sigiria lo tungani na lohiberu isi ourohino orubuk ko ter, kengohi jii, tode jimitan ojir ilwak kitiwojuno inyi. ⁶ Kengony cio kunino to tenya lo dede iyo lokiho neicieng. ⁷ Ketiyore kidoro lo talerun manyu kecio ifadari tungani na lida ipal kode na ligenoro, tonyio ida cia nan alahahi kapalani. ⁸ Keruk kidumi lokof lokof tonyio itingodo na kidumi kadeyak manyu itihaluto tenya lo tungani na lida ipal. ⁹ Ketigema misiok, iyen ite to kenite kuningi mejun lo rahun misiohoni tonyio ira afa ite misiok to kof lo Ijipt. ¹⁰ To karihin ile ojir ite iremo manatak kuningi idengo manyu daha, ¹¹ ati iyo kari lo mietare, ingohiti kof toget ida oremi ida manyu itiyorihin. Ojir kakidahak to kiji lo cio kuningi orumu daha iyo cefat ojir manyu tyangi kulo mwang onyia otonge. Itiyoto manyu jii to manatak kulo vino ko cianitok kulo ngoroni. ¹² Itiyoti ticitici kuningi to faritin ile ati to far lo mietare ketii lobo tic, ojir manyu mongo nino ko sigiria iyoma, manyu ojir opii na lotomonohini kaji nino ko misiohoni na lomanya kiji ningi orumunore golun lo kenite kuneicieng. ¹³ Iniefata kuno tenyitenyi lateny nan diho ite fad. Keleleto karanacio kulo kude lobangahin , kecio icieng oninguno to kutuhe kuningi. ¹⁴ Kakeny uni iyo kari ojir itii kikwera iyo nan. ¹⁵ Itonyia kwer lo mugati kuna loru ibula. To faritin mietare itinyia mugati kuna loru ibula iya na afa lacihare nan ite. Itiyoti ene iyo far na ibehi iyo ofa lo Aviv, tonyio iyo na ofa afa ifwonunore ite to kof lo Ijipt. Kecio lobo tungani olotu ketemoni nei to kac. ¹⁶ Itinyia kwer lo dengo to ketemok kulo dahidahi kuna liihi ite manatak kuningi. Itinyia manyu kwer lo tubuno daha derona kuningi to lohicungi lo kari langun litubu ite to manahatua fad. ¹⁷ Kakeny uni iyo kari ojir cio rei pili otubuno ketemoni lo Lahitokna lolanyu. ¹⁸ Kefotohiti nan okoto lo kikumi na limora ko tohi na litii to ibula. Ojir ida ingohini somia lo kikumi na liyauni iyo nan oget many kiwanyi. ¹⁹ Iyaunoti sangite kuna longiju to kof ningi kuna ifiri ilany katua lo kaji lo Lobanga. Keyer kilelo to lei kulo ngotenge. ²⁰ Tode acularu nan Malaika ketemoni ningi lo kitotoro ite kikoi lo kiyauno ite faji na lakukumahi nan. ²¹ Itoric tenya nenge manyu itoning tohi na loteny inyi. Kesil diho inyi, ida cia inyi olau silan ningi tonyio ongon karana nei ken nenge. ²² Kalining ite tohi na loteny inyi otoc manyu itii sangite fad kuna lateny nan, ara cia nan meroni lo merok kuningi manyu atirem cia nan katiremok kuningi. ²³ Olo cia Malaika nei ketemoni ningi many kiyauno ite kof lo cio kulo Amor, Hitit, Perez, Kanaan, Hivi ko Jebus, manyu afie cia nan icieng oleng. ²⁴ Kegung ketemoni lo lobangahin kuneicieng kode iwor icieng kode ijif ticitici kuneicieng. Ojir ite igil icieng manyu ibor kuna morutok liwora icieng tinytiny. ²⁵ Iworati LahitokLobanga ningi oto cia icio gum iyo daha ko kifi kuningi. Adume cia nan mwaita to kiji ningi. ²⁶ Manyu oru cia ngorwo kuna lobuta tee kode ikorifi to kof ningi. Ahicio cia nan ite warun na ifut. ²⁷ Acule cia nan irode nei ketemoni ningi itibahas kueci kulo misiok fad kuna lirumu ite. Acio cia nan merok kuningi fad ife kibelihi ite korwonga. ²⁸ Acule cia nan lokafikafi ketemoni ningi ifuhe cio kulo Hivi, Kanaan ko Hitit to kikoi ningi. ²⁹ Ati ida cia nan afuk icieng to kari lobito, tonyio oto cia kof imura manyu ofwonu tyangi kulo mwang kiborengohi ite. ³⁰ Afuk cia nan icieng to ketemoni ningi to lobo sidi to lobo sidi many ifwonu ite iborengi itum kiniefa kof fad. ³¹ Afik cia nan lohikorihin kuningi many to nam na Ido many nam lo Mediterenian, ko many to kuny many kare lo Euparets. Acio cia nan cio kuna lomanya na kof kac kuningi manyu ifuhe cia ite icieng to ketemoni ningi. ³² Kefik yomo ko icieng kode ko lobangahin kuneicieng. ³³ Kengerihi icieng omanya kof ningi tonyio kicio cia icieng ite ipal diho nan, tonyio itongo cia kiwora lo lobangahin kuneicieng ara owic diho ite.''