¹ Ikukumu ciali to bau lo ciani lyerati, na lara karitun nenge futi mietare ko nusu ko lalatun nenge manyu futi mietare ko nusu. Ojir karitun lo ciali ko lalatun nenge oriri, woita nenge kai ara futi ongon ko nusu. ² Tofik muriaha rukuni kulo ciali, ojir ciali ko muriaha kunenge ogatuno ara lobito ito hati idwany ciali to mwalati. ³ Ikukumu sangite kunenge fad to mwalati; motiong, kiworiti kulo ingula, kikuriti kulo kima, ilebuha kulo rwaca, kiculuta kulo tyang ko kitehita kulo kima. ⁴ Ikukumu keikei nenge, bwai lo mwalati, manyu ikukumahi oguli kulo mwala ifik rukuni kulo ciali ongon fad kulo bwai. ⁵ Tofihahi lociolo lo ciali ojir okor ciali to kiji. ⁶ Togatu keyek kitingihin to bau lo ciani lyerati idwany kenite kuneicieng to mwalati. ⁷ Ojir kuno keyek kitingihin iturutohini iyo oguli ojir ongoni marihin kulo ciali otingorehin. ⁸ Ikukumu ciali owat to bauhin, ojir ikukumuni iya na lohitotorohinorehin isi to donge. ⁹ Ikukumahi sita lo kema lo lomanyare, ojir orof nenge ara karitan yadihin keek miet ojir iticemi to kyela kigenit iribi na loiro, ¹⁰ ko gurihin keek are ko tedohin kuna lara mwala keek are ko kigolihin kulo rial oguli iyo gurihin. ¹¹ Ojir manyu ngati lo kai ara yadihin keek miet iyo karitun nenge manyu ojir ongon ko gurihin keek are ko kyela iribi kiticemita ojir kuna gurihin owoita to tedohin kuna lara mwala ko kigolihin ko oguli kuna lara rial. ¹² Ojir ngati lo lodoyorore lo kolong ara sita yadihin keek are ko miet ko kyela kiticemi ko gurihin tomon ko tedohin manyu tomon. ¹³ Iya ngati lo okangere ojir manyu sita ara lalatun yadihin keek are ko miet. ¹⁴ Ojir kyela kigenit na lara karitun yadihin mietare ko nusu ojir ofihi na ngati itiwoitahini to gurihin uni iyo tedohin manyu uni, ¹⁵ ojir manyu kyela kigenit na lara karitun yadihin mietare ko nusu ko gurihin uni iyo tedohin manyu uni ongon manyu nu ngati bito. ¹⁶ Lo lokoli lo sita, torifu kyela kigenit na lara karitun nenge yadihin tomon na litididila to na ifurang, na imalang ko na ido. Usi kunenge kyela iribi na litii katibibilani na igeny, ko gurihin ongon ko tedohin manyu kuneicieng ongon. ¹⁷ Gurihin kulo sita fad ojir ongon ko oguli ko kigolihin kuna lara rial ko tedohin kulo mwala. ¹⁸ Ojir karitun lo sita ara yadihin keek miet, lalatun nenge ara yadihin keek are ko miet. Ko kyelani kigeniti kuna liticemarihin, kyela iribi na loiri na lara woita nenge yadihin are ko nusu ko gurihin kuna lara tedohin kuneicieng mwala. ¹⁹ Bilieta ko sangite pili kuna litiyorehin sita lo kema lomanyare ojir ara mwala ko kigurita kulo kema fad. ²⁰ Tocik cio kulo Israel ingohi tocoluni ngoroni lo kirja kulo ciani oliv na litiituni otoc ara lo kima ojir lomohin iwasihi kinwaha. ²¹ Katua lo kema lo kirico korwong lo kyela kigenit, na lokor kiji lo faji na Inyu ko faji na Inyu Ogal, ojir Aaron ko tee kunenge icio lomohin iwasihi nohun many to kurou owang. Ojir ene ara cik na lojir cio kulo Israel ijif to kofiang kuna lofwonuno fad.