¹ To far lo Lobito iyo ofa lo uni lo fwonuno lo cio kulo Israel to kov lo Ijipt, iyo inyi la far bito ofwonu icieng iyo kung lo Sinai. ² Langun lowgu icieng to Repidim, orutohi icieng kuny lo Sinai ete cio kulo Israel ko gurohino kema ijia kuny gum lo donge lo Sinai. ³ Oto Moses irwok diho Lobanga manyu ilolong Lahitok inyi to kai lo donge ko jimitan, “Tohi na lojir isi iteny iyo lotataha kulo Jakob inyi ene, na lojir isi irihohi cio kulo Israel. ⁴ Lideu ite to kenite kuningi tohi na latii nan iyo kov lo Ijipt ko koditi na lahitingunore nan ite to fuho kulo logiga ahiyauno ite diho nan. ⁵ Dong kaliningo ite nan otoc manyu iric ciha nei ito cia ite to misihi dot ira bara lo tau nei. Kileng lara kov fad nei ⁶ ito cia ite ira diho nan okabwe lo kadwarak manyu misi na inyu. “Tenyi tenyi kuno kuna lojir isi irihohi cio kulo Israel.” ⁷ Oite Moses olo otubahi lohitwaha kulo cio ko rihohino ketemoni neicieng tenyi tenyi pili kuna locik Lahitok inyi ojo ojir oteny. ⁸ inyiahahi cio ara Lobito ojo, “kitii cia ohoi sangite fad kuna loteny Lahitok. Dong iyauno Moses tenya na linyaiahu icieng diho Lahitok. ⁹ Ojo Lahitok diho Moses, “Alotunoi nan diho ite iya idis na hitok, ojir cio oning nan ahititenya isi ojir ofihi kigeno neicieng ken nino tiktik. “Tinyia orihohi Moses Lahitok tohi na loteny cio. ¹⁰ Manyu ojo Lahitok iyo Moses, Ilo diho cio itinyujo icieng ele far ko kiwanyi. Ingohi ilali kyelani kuneicieng ¹¹ manyu ikukumahinoti to far lo uni tonyio la far olotu cia Lahitok iculuno kai lo donge lo Sinai odeya cio fad. ¹² Tofik lohikorihin gum lo donge to cio manyu torihohi icieng ijo, “Itogeny ida lobo olo onyiha ko donge kode otir fotiri nenge. Tungani na lotir donge ojir ifadari. ¹³ Ojir ocahi to morutok kode ongori to ngonecio kulo kawo; ojir ida otiri to kana. Oru lobo tungani kode tyang longerihini owar.” Many kolokuti muriak lo ker icir tektek inyiha cio ofwo onyiha ko donge.'' ¹⁴ Longun licuhuno Moses to kai lo donge ko iyo cio, itinyu inyi icieng manyu ilal icieng kiyelani kuneicieng. ¹⁵ Oto inyi ko jimitan iyo cio, “Ikukumahinoti to far lo uni. Ingohiti kilihita ko ngorwo iyo geto. ¹⁶ To kiwanyi lo far lo uni itirita manyu imedek hila ko idis na imutok kai lo donge ko ture na ikwat noo. Ihihirita cio dot to katwa lo kem. ¹⁷ Oto Moses orihoro cio to katwa lo kem lo fworo kirico ko Lobanga, manyu ofwo icieng owoitati fotiri lo donge. ¹⁸ Ipude furo donge lo Sinai tonyio icuhino Lobanga kai nenge to kima. Ofuru kima to kai lo donge iya furo lo furnuk manyu itinienienga donge fad noo. ¹⁹ Kolosodoro kwatun lo ture bebe, otenya Moses manyu itifot ogoro lo Lobanga tenya nenge. ²⁰ Iculuno Lahitok kai lo donge lo Sinai manyu ilolonge Moses iya kai lo donge. Dong olo Moses kai ²¹ manyu ojo Lahitok diho inyi, “Iculoro kof ilo to cik cio jimitan kefuduno iya ene longonore Lahitok ida beciek kuneicieng okeroro, ²² Kileng kadwarak kuna lonyihahi Lahitok ojir re itinyuji kenite kde otum Lahitok kiburahino icieng.” ²³ 23 Ojo Moses diho Lahitok, “Ida cio otum fwonuno kai lo donge lo Sinai tonyio isi token nino licik ohoi ijio, “Itifik lolukorihin irit donge, ikore inyi ake ara na inyu.” ²⁴ Inyiahahi Lahitokinyi ojo, “Iculoro ifwo ilihutu ko Aaron kai. Ati kecio kadwarak ko cio ifuduno kai diho Lahitok tenyio ojir inyi ida iburahino icieng. ²⁵ Dong iculoro Moses diho cio olo orihohi icieng.