¹ Tona oning Jesero kadwarani lo Midian ara manyu komoni lo Moses sangite pili kuna litii Lobanga to Moses ko to cio kunenge Israel ko koditi na liyaunore Lahitok cio kulo Israel to kov lo Ijipt. ² Orumu afa Jesro komoni lo Moses ifotu kito nenge Zipora ngorwani lo Moses tona linyiaharore Moses inyi iyo apa nenge ³ ko tee kunenge rei are. Obara orumu Lobito kito Geresom tonyio orumu Moses ojo, “Lara nan misiohoni to kof lo misiok.” ⁴ manyu itibarahini lobito ojo, Eliezer tonyio ojo inyi, “Ara orumu Lobanga lo apa nei kalwahani nei, Kilwahu inyi nan iyo ngalau latubot lo Parao.'' ⁵ Olotu Jesro komoni lo Moses ko tee kulo Moses ko ngorwani nenge iyo Moses mwangatare faji na lorumu inyi ogurohi kenra onyiha ko donge lo Lobanga. ⁶ Orumu Jesro locule tenya diho inyi ojo, “Nan komoni lilo Jesro alotuno nan diho isi ko ngorwani nino ko tee rei kunenge are.” ⁷ Tona, olo Moses kitiricio komoni lenge, ogung kof ketemoni nenge, owoju imaruk inyi. Ofony icieng kenite ko rutoroti katwa lo kema. ⁸ Itifimahi Lahitok dilio Parao ko cio kulo Ijipt to cio kulo Israel ko kidak pili na lorumu icieng to kikoi ko koditi na lolwahumore Lahitok icieng. ⁹ Okwama Jesro ningo sangite kuna ijiri fad kuna titii Lahitok iyo cio kulo Israel to lwahuno icieng to kac kulo cio kulo Ijipt. ¹⁰ Ojo inyi, “Kwafun ongon diho Lahitok na lolilwahu isi to kana lo cio kulo Ijipt ko Parao ko lwahuno cio to kac kulo cio kulo Ijipt. ¹¹ Iyia layen nan ajo ogal Lahitok ilany lobangahin kulakude fad tonyio itii inyi ene tic diho cio kuna litiyore cio kudo Israel to kitidara. ¹² Tinyia iyaun Jesro komoni lo Moses kikumi locurat ko icoriti kunakude diho Lobanga manyu ofwonu oho Aaron ko lohitwaha kulo Israel fad ngara daha ko komoni lo Moses ketemoni lo Lobanga. ¹³ Kiwanyi nenge itongohino Moses iyo lokiho lo ngoto lo tenya lo cio, owoita icieng irit inyi many to kiwanyi many kurou. ¹⁴ ''Kolodeu komoni lenge tohi litiyo isi iyo kuno cio? Nyo arahare isi ake lira kangotoni lo tenya owoita cio kirit isi many to kiasanyi many kurou?'' ¹⁵ Inyiahahi Moses inyi ojo, “Tonyio ofwonunita cio diho nan tahita wahun lo Lobanga. ¹⁶ Kolongon ngolofa kiji neicieng angot nan tenya neicieng manyu asingahi icieng cihi cichi kulo Lobanga ko tenyi tenyi kunenge. ¹⁷ Inyiahahi komoni lo Moses ojo, “Ida na tohi litiyo isi ojir.” ¹⁸ Kitiniama ene tic isi ko kuno cio lofwanunita iyo isis irioci ene tic noo iyo isi ida isi itumtehita ake. ¹⁹ Toning dong tenya nei ahici isis lobo kisinga manyu ingohi Lobanga kingon ko isi. Ojir isi ira kawoitahinoni lo kuno cio iyo Lobanga na liyaunita tenyi tenyi kuneicieng diho inyi. ²⁰ Itiye na icieng cihi cihi kunenge ko isingiti manyu itotorohi icieng koditi na ngowarare icieng ko manya neicieng. ²¹ Ati tonyumu cio kuna igoli to kiji lo cio fad, cio kuna Lobanga Lobanga, cio kuna ligenoro kuna lida otahita bara to kitumumuna, tofik icieng ara cio karihitak kulo cio cilif Lobito mia Lobito, keek miet ko tomon. ²² Ingohi icieng tara kangotok kulo tenyi tenyi kiji lo cio faritin fad ati ingohi icieng iyaunita tenyi tenyi kuna igoli diho isi, kuna itatwahi icieng okeru to kenite kuneicieng. Icio cia na tic nino otawak tonyio kingar cia icieng tic ko isi. ²³ Kalitii isi jii manyu iya na lowahare Lobanga, ito cia isi ilanyu cuna manyu ofwo cia kuno cio fad kangite to kwama.'' ²⁴ Oning Moses tenya lo komoni lenge manyu iti sangite fad iya na lotenyare inyi. ²⁵ Onyum inyi cio kuna igoli to kiji lo cio kulo Israel fad ofik icieng ara kulahitoha kula lolanyu cio alif Lobito, mia Lobito, keek miet ko cio tomon. ²⁶ Itiyo icieng ara kongotok kulo tenyi tenyi kiji lo cio to faritirifad tenyi tenyi kuna igoli iyauno icieng iyo Moses ati kuna itawahi okeru icieng to kenite kuneicieng. ²⁷ Dong iniamahi Moses komoni lenge, manyu oite Jesro iya kov nenge.