¹ Manyu oteny Lobanga kuno tenyi tenyi fad: ² Nan Lahitok Lobanga nino na lohiyauno isi to kov lo Ijipt, to kov lo lahun opii. ³ Ketek Lobanga lobo na lake ko nan. ⁴ Ojir ida igat kode iduk lopidinga lo lobo lohi to kai kode to kov kode to katwa lo kifi. ⁵ Kegung kov ketemoki kuneicieng kewor icieng tonyio nan Lahitok Lobanga nino, Lobanga na likaino, afiha kidak iyo tee to kipalpali kulo fafaicio kuneicieng many iyo koficingiti lo uni ko lo ongon lo cio kuna lohiberu nan, ⁶ ati atotoro kumaruno nei iyo kofiang alif lo cio kuna lohimaru nan kuna lorica cihi chihi kunei. ⁷ Kelet karana lo Lahitok Lobanga nino arus, tonyio ida cia tungani na lisongare karana lo Lahitok ingohi. ⁸ Iiunita far lo sabit to rica inyi ara na inyu. ⁹ To faritin ile itiyo tici tici kunino fad ¹⁰ ati ara far lo mietare sabit lo Lahitok Lobanga nino. Iyo na far ketii lobo tic, kode isi kode kito nino retoni, kode kito karioni nino, kode karwaani nino retoni kode ngorwani, kode mongo kode sigiria kode misiohoni na lomanya taya ningi. ¹¹ Tonyio to faritin ile ofik Lahitok kai ko kov, nam ko sangite fad kuno longoni katwa ati iyoma iyo far lo mietare. Tona igatahi Lahitok far lo mietare itinyu inyi. ¹² Tobang apa nino ko iyang nino ojir irung manya ko na lohicwara Lahitok Lobanga nino isi. ¹³ Kefade tungani. ¹⁴ Ketii lomuna. ¹⁵ Kekoko. ¹⁶ Kegulihi tenya lo talerun ken lo loryehat nino. ¹⁷ Kedam kaji lo loryehat nino, kedam ngorwani lo loryehat nino kode karwaani nenge retoni kode ngorwani, kode mongo, sigiria kode lobotohi lara lo loryehat nino.” ¹⁸ Kolodeu cio kigurita ko kimedek lo hila, manyu oningi kwatun lo ture manyu odeuni furita lo donge, ihihiritati to bangun. Owoitati to faji na iloma ¹⁹ manyu ojimi iyo moses, “Kitenya isi to ken nino ko ohoi kining cia ohoi. Ait kecio Lobanga kitenya ko ohoi kode kiwei cia ohoi. ²⁰ Ojo Moses iyo cio, “Kebang Olotu Lobanga tema ite ojir bangun lo Lobanga iwasihi taulo kuningi ojir kitik ite kipal. ²¹ Iwasihi cio woita lolomaje ko loloro Moses iyo mutohun na lorumu Lobanga ongon ijia. ²² Tinyia ojo Lahitok dilio Moses, “Torihohi cio kulo Israel ene tenya ijio, “Lideu ite to kenite kuningi jimita latenya nan ko ite to kai: ²³ keduk lobo lobanga kitisiranahi ko nan; kekukum lobangahin kulo rial kode lobangahin kulo dahab. ²⁴ “Ikukumahiti ciali to lokulufi iyo nan ifejohi kicioriti kuningi ko kiciorit kulo Kimora, kiri, kera ko kicu. Faji na mute lafik nan obangarihin karana nei alotu cia nan diho ite ahigatahi ite gum. ²⁵ Kalikukuma ciali nei to moruto, kekukum to moruto kuna likefi tonyio ipale cia ite kuna Moruto kalikef ite to sangite kulo tic kuna lara bilieta. ²⁶ Manyu kefwo iyo ciali nei to lohirwohi tonyio itiboro kenite kuningi iyo nan.''