¹ Oto Moses ko cio kulo Israel owol ene wole diho Lahitok. “Awol cia nan diho Lahitok tonyio otul inyi ko lanyino lo deyo. Lakweny ko karwohitani Libirohi inyi katwa lo nam. ² Lahitok lara golun nei ko karicani nei Lobotu inyi ara livahuno nei. Inyi Lobanga nei manyu amaj cia nan inyi Lobanga lo apa nei nanyu, otikwat cia nan inyi. ³ Ara Lahitok Karemoni Lahitok karana nenge. ⁴ Gadigodihin kulo Parao ko karemok kunenge Libirohi inyi katwa lo nam Kulahitoha kulo Parao kuna lilany, Lokeroroti katwa lo nam na ido. ⁵ Lodile kifi kuna ilukoho ilieng, Odoyori katwa lo nam iya moru. ⁶ Kana nino iteten Lahitok Monye lo golun ko kwatun Kana nino iteten Lahitok ⁷ To bolorun lo Okabwe nino Iborihi isi kuna lohitipeha isi I cio isi awo nino nan inok Ocure icieng iya ingarum. ⁸ To ofu lo kume nino Ifuroro kifi Owoita kifi obir iya lohitir Ifuroro kifi kiji lo kiluko lonam. ⁹ Oteny meroni to pufa ojo, “Afuharu cia nan icieng, atihoru cia nan icieng. Akor cia nan sangite kuna laruju; Amonere cia nan icieng. Asutu cia nan ngalem latubot nei manyu Okeru cia kana nei icieng.” ¹⁰ Ati ikut isi to wirita nino Oto nam ko kimuhoro icieng Odiloroti nam katwa Iya iluk lolubang. ¹¹ Ngai to kiji lo lobangahin Lohiri ko isi Lahitok? Ngai Lohiri ko isi iyo deyo ko nyijoro? Ihihirita kenite kulo cio iyo tohi nan litiyo isi, Itiyo isi sangite kuna litirima. ¹² Ifete isi kana nino iteten, Kof ko diloro merok kunino. ¹³ To kimaruno nino na lida icieng irik Cia isi cio kuna lilwahu isi to golun nino ikenge cia isi icieng Iya lomanyare nino na inyu. ¹⁴ Oning cia misihi ihihiritati; Inief cia irode cio kulo Pilistia. ¹⁵ Ocolie cia taulo kulo kabuno kulo Edom Manyu inief cia kihihirita Kulahitoha Kulo Moab. Ocolaru cia cio kulo Kanaan olengi. ¹⁶ Inief cia bangun ko lokafikafi icieng. To golun lo kana nino ijiringa cia icieng iya morutok Many oring cio kunino Lahitok Many oring cio kuna Liyauno isi. ¹⁷ Iyauno cia isi icieng many itibulahi Donge lo lunyo nino. Faji na lingumu isi ara lomanyare nino Lahitok Lomanyare nino na inyu Lahitok na likukumahi kana nino. ¹⁸ Olanyu Lahitok karihin ko karihin.'' ¹⁹ Kaliculoro lakwengi, gadigadihin ko karemok to lokwenyi kulo Parao katwa lo nam, olahahi Lahitok kifi kulo nam oitu Odile icieng, ati ofwo Israel to katwa lo nam to kov na itou. ²⁰ Oto Miriam Kamocani, kanece lo Aaron, ko dumuno ojati to kana nege manyu ijifahi ngorwo fad inyi ko ojahin to kac okiati. ²¹ Owolohi Miriam icieng ene wole ojo, “Itowol diho Lahitok, Tonyio otul inyi ko lanyuno lo deyo. Lakweny ko karwohitani libirohi inyi katwa lo name.” ²² Tinyia Moses Korihoro cio kulo Israel to nam na ido ko fworoti katwa lo kuny lo Sur. Oto icieng katwa lo kuny to faritin uni ida Orumuni kifi. ²³ Kolofwonu icieng Mara, ida otumiti mata kifi kunenge tonyio orumu odwari inyi licio na faji obara Mara. ²⁴ Oto cio ko ngungunita ken lo Moses ojo, “Ojir ohoi kimat nyio?” ²⁵ Moses Ko kicira diho Lahitok, oto Lahitok itotorohi inyi ingutit lo kete, ibirohi inyi na kete katwa lo kifi kifi kojiran to mata. Tijia icio Lahitok icieng cik ko tinyi teny kuna ngijifi manyu ko filia icieng iyo tema. ²⁶ Ojo inyi, “Kalining ite otoc tenyia lo Lahitok Lobanga ningi many itii tohi na ibehi to ketem. Oni nenge, kaliric ite tenya nenge ko cihichi kunenge fad, ida ca nan ayouno diho ite kulafa jiohi jiohi layauno nan iyo cio kulo Ijipt, tonyio nan Lahitok na lahitifurio ite.” ²⁷ Tinyia ofwonu icieng Elim, faji na longoni ipulahi kulo kifi tomon ko are ko ogoroho keek mietare oto icieng ogil taban inyi kalele lo kifi.