¹ Tinyia ojo Lahitok diho Moses, ² "Torihohi Israel ingohi ibeloti iya kifwongi ofihi taban onyiha ko Pi Hahiros, kiji lo Migdol ko nam isiran ko Baal Zepon. ³ iiyo cia Parao ojo, 'ibunyita Israel katua lo mwang otimane ara na lolihi kuny.' ⁴ Manyu atigol cia nan tau lo Parao manyu otifuno cia inyi icieng. Ati arumu cia nan kwatun iyo ken nei to Parao ko karemok kunenge fad oto cia ko cio kulo Ijipt oyen jimitan nan Lahitok", manyu itii Israel iya na.'' ⁵ Kolorihohini kabu lo Ijipt jimitan lifiri cio, ibel Parao ko kunahitoha kunenge kweci to icieng many ojimi, "Nyio kitii ohoi? Lohicio ohoi Israel ofwo kingotohi kirwa neicieng." ⁶ Tinyia icio inyi ikukumahini gadigadi nenge ko kiyaru karemok kunenge ko inyi. ⁷ Iyaru inyi gadigadihin mia ile kuna lojiri ilany ara lobito ko gadigadihin kulakude kulo Ijipt fad, ko kabolohinok kuna lolanyu icieng. ⁸ Itigol Lahitok tau lo Parao kabu lo Ijipt icio inyi otiforo Israel kuna lolotita iya ketemoni to golun lo taulo. ⁹ Cio kulo Ijipt, lakwenyi kulo Parao fad ko gadigadihin, karemok to lakwenyi ko kuna lolot to kejuha ko kijifaru cio kulo Israel ofwo itihorori inyia logilahinore icieng taban neicieng kutuk lo nam onyiha ko Pi Hahiros na lisiran ko Baal Zepon. ¹⁰ Kolonyihu Parao, oting cio kulo Israel konyeha ko deunoti cio kulo Ijipt ofwonuno to omot neicieng. Obangi icieng ko kicirati iyo Lahitok. ¹¹ Ojo icieng diho Moses, "Ara orumu to jimitan oru kwecerehin to kof lo Ijipt iyaunore isi ohoi weihino ene katua lo kuny? Nyio itii isi iyo ohoi to kiyauno ohoi to kof lo Ijipt? ¹² Ida afa ohoi lohirihohi isi to kof lo Ijipt kijo, "Kingohi ohoi kiruhi cio kulo Ijipt? Orumu ngociam diho ohoi kirwa cio kulo Ijipt ilany wei kunyhatua." ¹³ Inyiahahi Moses cio ojo, "Kebang, itiwoitati igoli ito cia ideu lwahuno na liyauno Lahitok diho ite elefar. Kuno cio kulo Ijipt lideya ite jijia, ida cia ite irihe ideu ari. ¹⁴ Orem cia Lahitok to ite, owak ite iwoita igoli." ¹⁵ Tinyia ojo Lahitok diho Moses, "Nyio icira ite diho nan? Torihohi cio kulo Israel olot ketemoni. ¹⁶ Toting iluk nino manyu to fete kana nino kai lo nam lo kora kifi ojir cio kulo Israel ofwo to katua lo nam to kof na itou. ¹⁷ Atigol cia nan taulo kulo cio kulo Ijipt ojir ofwori ijifari icieng. Ato cia nan arumu kwatun to Parao ko karemok kunenge ko to gadigadihin kunenge ko karemok to lakwenyi. ¹⁸ Oyen cia cio kulo Ijipt jimitan nan Lahitok kalarumu nan kwatun to Parao, gadigadihin kunenge ko karemok to lakwenyi.'' ¹⁹ Oto Malaika lo Lobanga na lorumu olot ketemoni lo karemok kulo Israel ko iituno olo kifwongi neicieng. Oitu manyu wirita lo Idis to ketemoni iya kifwongi neicieng owoita, ²⁰ ara na lolotu kiji lo karemok kulo Ijipt ko cio kulo Israel. Tona karue fad icio na idis wangun angati, mutohun angati. Icio icieng ida onyihahi kenite, tona oru lobo lonyihahi kaletoni tona karue fad. ²¹ Oto Moses ko fetaru kana nenge kai lo nam, oto na karue fad okor Lahitok nam to kiyoma lo ngati lo okangere na igol ibele ara kof na itou. Okora kifi are ²² ofwo Israel to katua lo nam to kof na itou ko lohitir lo kifi owoita ngati lo iteten ko ngati lo ikajong neicieng. ²³ Ijifaru cio kulo Ijipt icieng manyu ijife gadigadihin, lakwenyi ko karemok to lakwenyi katua lo nam. ²⁴ To tomorong, odeya Lahitok to wiriti lo idis ko kima cio kulo Ijipt ko kitidaha icieng timan. ²⁵ Itigorohi inyi kejuha kulo gadigadihin kuneicieng ojir itirumu icieng golun lo lotita. Tinyia ojo cio kulo Ijipt, "Ingafi ten iyo cio kulo Israel! Ongon Lahitok rem to icieng iyo cio kulo Ijipt. ²⁶ Tinyia ojo Lahitok diho Moses, "Tofete kana nino kai lo nam ojir kifi oite ibule cio kulo Ijipt ko gadigadihin kuneicieng ko karemok to lakweny." ²⁷ Ofete Moses kana nenge kai lo nam manyu to kiwanyi oite nam faji nenge. Orumu cio kulo Ijipt ongon kifejaru iya tode ati inyiahahi Lahitok icieng katua lo nam. ²⁸ Oite kifi imuhe gadigadihin, karemok to lakwenyi ko karemok kulo Parao kuna lijifaru cio kulo Israel katua lo nam fad. Oru lobo bito lofur. ²⁹ Ati ofwo Israel ara katua lo nam to kof na itou, ko lohitir lo kifi ngati lo iteten ko ngati lo ikajong neicieng. ³⁰ La far, olwahu Lahitok Israel to kac kulo cio kulo Ijipt manyu odeu Israel karemok kulo Ijipt ogeto ibaloti loweiha kutuk lo nam. ³¹ Dong kolodeu Israel golun lo kana lo Lahitok na litii kenite kulo cio kulo Ijipt, oto obangiti Lahitok ko fiha kigeno neicieng diho Inyi ko diho karwaani Nenge Moses.