¹ Itira katetemak kulo Lobanga iya tee kuna limaru inyi ² manyu itimanyati manya lo kimaruno iya na lohimarunore Kristo ohoi ko kicwara ken nenge tohoi ara kicwara na iur ko na icam diho Lobanga. ³ Ati to kiji ningi keco oninguno kileng lobo tenya lo tic lo somun kode lobo tic lo kibot kode lo ngatun tonyio ida kuna ocam to cio kulo Lobanga kuna inyuji. ⁴ Ojir kileng lobo tenya lo riri, tenyi tenyi kulo dataru kode kiyada na lida ocam ida oninguno to kiji ningi ati ilany icwarata kwama diho Lobanga. ⁵ Tonyio iyo kuno fad ojir iyen: oru kasomoni, karohojani kode kangatani ara ngatun kiwora lo lopidinga lorumu lorumu lobo lunyio iyo okabwe lo Kristo ko lo Lobanga. ⁶ Keco lobo tungani kitinonong ite to tenyi tenyi kuna iwati tonyio to kuna ticitici olotuno kilongo lo Lobanga iyo cio kuna loberu ningo. ⁷ Tona ketongoti ira kangarak kocieng. ⁸ Tonyio ira afa ite lokimuyuk ati jijia lira ite tee kulo wangun iyo Lahitok. Itongoti ira tee kulo wangun. ⁹ Tonyio ongi ngak kulo wangun iyo jiran, nyujon ko tenya lo dede. ¹⁰ Manyu ititak tohi na litikwama Lobanga. ¹¹ Ketiyore sangite kuna irohori kulo lokimuyuk ati itilwehi icieng oleng ¹² tonyio itongo ara riri kileto tohi na litiyo cio kuna loberu ningo lolit. ¹³ Ati tohi na litibotu wangun fad olotu oboto ¹⁴ tonyio ara wangun litibotu sangite fad. Inyi licio ojimi, “Tokwenyu O kagetoni ibuhu to kiji lo kaweyak oto cia Kristo kinwak isi”. ¹⁵ Itigeny bo iyo koditi na liwarare ite- ida ara iya kadatarok ati iya kagenyak ¹⁶ lo rican kitiyore tihi fad tonyio orohori kuno faritin. ¹⁷ Tona kedataru ati iningata wahun lo Lobanga. ¹⁸ Keruma to mere na lotum kipalaru ken nino. Ilany ifuta to Okorif. ¹⁹ Ititenyati kiji ningi to zabur ko woleco kulo maja Lobanga. Itowoloti igugumo woleco kulo Lobanga to taulo. ²⁰ Icwara kwama diho Lobanga Apa tik tik to karana lo Lahitok niyang Yesu Kristo. ²¹ Icwarata kenite kimaruno kaletok to rima lo karana lo Kristo. ²² Ngorwo icwarata kenite kuningi iyo twero lo rei kuningi iya na licwarare iyo Lahitok. ²³ Tonyio ara retoni kwe lo ngorwani iya na larahare Kristo kwe lo kanisa na lara ken nenge na lara inyi kalwahani. ²⁴ Iya na licwarare kanisa ken diho Kristo, ojir manyu ngorwo icio kenite iyo rei kuneicieng iyo tenyi tenyi pili. ²⁵ Rei imaruti ngorwo kuningi iya na limarunore Kristo kanisa many icio ken nenge tonyi, ²⁶ lo kitiraha inyi ara na inyu, itinyu inyi to kilala to kifi ko tenya ²⁷ ko lokifotuno kanisa diho inyi ara kanidsa na ifarang na loru ko kaforoti kode lobo nyuri kode lobo rohojun ati ara na inyu oru rohojun. ²⁸ Tona kikoi bito ojir rei imaru ngorwo kuneicieng iya na limarunore icieng kenite kuneicieng . tungani na limaru ngorwani nenge imaru ken nenge . ²⁹ To kifwongi lo kuna fad oru lobo tungani loberu ken nenge ati ifita inyi orica manyu ken nenge iya na loricare Kristo Kanisa ³⁰ tonyio kira ohoi fajihit kulo ken nenge. ³¹ Tone tenya ongerihi retoni monye ko ngotenge ofwonu imoraroti ko ngorwani nenge ofwonu kuna are ara ken Lobito. ³² Ara ene ilitit na igol noo ati atenya nan to Kristo ko Kanisa. ³³ Ati ojir ite tolobito tungsni imaru ngorwani nenge iya na limarunore inyi ken nenge manyu ojir ngorwani orima retoni nenge.