¹ Tee itiningoti katomonok kuningi iyo Lahitok tonyio tohi na ibehi na ² “Torima Apa ko Iyang nino” inyi lara cik na losodohini ciha kai nenge ojo, ³ “Ojir sangite fad olot ara kuna ijiri dihosi manyu ojir isi imang manya na ikarit to kof”. ⁴ Apaico, ketilongojita tee kuningi ati itiyenati icieng lo kitiboloruno icieng iyo tenya lo Lobanga. ⁵ Opihin itiningoti kalanyunok kuningi to rima ko bangun ko to taulo fad iya na nginingore Kristo. ⁶ Itiningoti icieng ida ara to kitikwama icieng kolodeya icieng ite ati iya opihin kulo Kristo kitiyo wahun lo Lobanga to taulo kuningi fad. ⁷ Irwaati to taulo fad mejo irwaa Lobanga ida ara tungani ⁸ tonyio iyen ite ijo odum mute Lobanga tungani Lobito Lobito to tic na ijir na litii inyi kode opi kode na ilaha. ⁹ Kalanyunok itiyoti manyu ite opihin kuningi tona kikoi bito. Ketibanga icieng tonyio iyen ite jimitan inyi na lara kalanyunoni ningi fad ongon kai, manyu oru kisisio diho inyi. ¹⁰ Lohicungi, itigol iyo Lahitok ko iyo golun nenge nahitok. ¹¹ Iciefo kiremita kulo Lobanga fad ojir irumunore lowoitare nino ilanyunore kitigulunya lo sitan. ¹² Tonyio ida ohoi kirem ko ken ko okoto ati ko kalanyunok ko kabolorok ko golun lone kof imutok ko golun lo okorifi kuna longon kiyomare kai. ¹³ Tona iciefo sangite kulo rem kulo Lobanga fad ojir kolofwonu faritin kulo karohojani ojir itwerunore nyona lowoitare nino manyu langun litii isi sangite fad kulo woita. ¹⁴ Towoita bo otoc ko gas lo tenya lo dede otora komoc nino, ko kitihita lo locolo na lara biran ongon otoc. ¹⁵ Ko kamuha kulo tenya lo layomit lo kisiliban ¹⁶ tosodohi iyo kuna fad buhu lo kiruk na litidunyare isi ngoneco kulo kima kuna longoro sitan. ¹⁷ Ibura turubuc lo lwaharu ko ngalem latubot lo okorif na lara inyi tenya lo Lobanga. ¹⁸ Manyu ilifati to Okorif to tihi fad to kilifilifi fad. Kaliricahi kuna kwe, iririati manyu ilifati to cio kulo Lobanga fad. ¹⁹ Ilifati manyu to nan ojir kalanga nan kutuk, kiciori tenyi tenyi kulo genyun ojir atulo ida abang ilititi kulo layomit na ijir ²⁰ Na larahare nan kawoitahinoni na latora to nyororo. Ilifati jimitan ojir nan atenya to golun lo tau iya na lowaharihin. ²¹ Tisikas rece liyang na lohimaru ara manyu karwaani lo lahitok na loningoro kirihohi cia ite sangite fad, ojir manyu ite iyenare kitongo nei ko tohi na latiyo nan. ²² Aculuno nan inyi diho ite tone tenya ojir ite iyenare aja kingoni ohoi ojir manyu inyi itigol taulo kuningi. ²³ Kisiliban diho receera ko kimaruno ko kiruk diho Lobanga Apa ko Lahitok Yesu Kristo. ²⁴ Kisa diho cio pili kuna limaru Lahitok niyang Yesu Kristo to kimaruno na lida odunye.