¹ Iya mabusoni to Lahitok, alelia nan diho ite jimitan itiwar warun na locam to kilolongo lafa lohilolongorihin ite. ² Itira cio kariejak kuna ibayaha; itodik manyu idonyoto taulo iyo kaletok imanya ko kulakude ara Lobito to kimaruno. ³ Ititem bebe rica kimora lo Okorif to kimora lo kisiliban. ⁴ Ara ken Lobito ko Okorif Lobito iya ba afa lohilolongunorehin ite, ⁵ ara lahitok Lobito, kiruk Lobito, batisa Lobito, ⁶ Lobanga Lobito na lara Apa lo cio fad, na lolanyu cio fad, ara iyo cio fad ko iyo cio fad. ⁷ Iyo ohoi tolobito tolobito kiciori kisa iya na lokorare Kristo. ⁸ Inyi licio igero ojo; “Kalirwohe inyi kai noo, orihoro inyi mabusi omot nenge manyu icio kicioriti diho cio”. ⁹ “Irwohe kai” jimitan nyio? Jimitan iculuno manyu afa kof faji na iluko. ¹⁰ Inyi lafa liculuno inyi inyi manyu lirwohe kai ogal ko lomajun fad ojir ifutare kof fad. ¹¹ Ara inyi licio kude ara jayona, kude ara kamocak, kude ara katitimak kulo layomit na ijir, kude ara katibalak ko kude ara katiyenak ¹² lo kikukuma cio kulo Lobanga iyo tic lo kirwaa ojir ken lo Kristo oduhoro ¹³ manyu kigorunore ohoi fad iyo Kimora lokiruk ko iyo yenun lo kito lo Lobanga ko fwonuno kira cio kuna igoli many kigorunore kifut iyo Kristo. ¹⁴ Ito cia ida kirihe kira tee kuna lohibebelo kiyoma lo kitiyenita ene ko idi ko tenyi tenyi kulo cio katinonongak. ¹⁵ Ara faji lo na, ngatitenyati tenya lo dede to kimaruno kito ciao hoi fad kibolojohi iyo sangite fad iyo inyi na lara kwe inyi Kristo ¹⁶ Iyo inyi iniefahino ken fad ogorohi to fuihin manyu oduhoro to kimaruno iya na litiyore fajihit Lobito Lobito tic nenge. ¹⁷ Dong ahirihohi nan ite kuno manyu asodoro tenya diho ite to karana lo Lahitok ajo kerihe imanya iya misiok iyo rohojun lo kibuha neicieng. ¹⁸ Itimutohi kiniang neicieng manyu okoraroti to ngati lo warun lo Lobanga to dataru na longon iyo icieng na lolotu to kitigolo lo taulo kuneicieng. ¹⁹ Litiri icieng kibuha na ibehi iciori kenite iyo ticitici kulo kwerun lo konyeha na licio icieng orutohi iyo ticitici kuna iboti fad na losodoroti iya ketemoni. ²⁰ Ida hati afa ite ifwonu iyo yenun Kristo tona kikoi. ²¹ Dede lining afa ite to inyi kitiyeni iyo inyi na lilihita ko tenya lo dede na longon iyo Yesu. ²² Kitiyeni afa ite iyo koditi lo warun ningi lafa loring, lopucaru lafa ken nino ongore na lipalaru to wahun lo kitinononga nenge. ²³ Ojir itingejuk kibuha lo taulo kuningi ²⁴ ito icief kenite ngejuho kuna loduhi ori iya Lobanga iyo biran ko nyujon lo dede. ²⁵ Tona ojir ite tolobito tolobito ipuce warun lo kitinononga otenya tenya lodede iyo loriehat nenge tonyio kira ohoi fad fajihit kulo ken Lobito. ²⁶ Iyo kilongo nino, kepal! Keco kolong odoi orihe isi ilongo ²⁷ manyu kecio sitan lonyonare lo keju. ²⁸ Tungani langun lokokoita keco orihe okoko, oti ojir itiyo tohi na ijir to kac kunenge ojir orumunore tohi na ngongar inyi ko cio kuna ikidahi. ²⁹ Keco lobo tenya lida ocam olotu to kutuhe kuningi ati tenyi tenyi kuna lolwak kitigolo kula kude cio kuna lijifita tohi na lowak icieng ojir olwak kaningok. ³⁰ Manyu ketitoyo okorif na Inyu lo Lobanga na lohiterorihin isi to far lo lwaharu. ³¹ Ingohiti kilongo fad ko dwarun lo taulo ngolofa ko momorita ko rohojun lo taulo fad. ³² Itongoti to kibaya ko jiran lo taulo iyo kaletok ila manyu kaletok iya na lohilaunore Lobanga ite iyo Kristo.