¹ Tone tenya alifa nan Lobanga to ite nan Paul na lara mabusoni lo Kristo Yesu to ite misiok. ² Dede, ayen nan jimitan lining ite tic lo kisa lo Lobanga na lohiciori nan to ite. ³ Na lara ilitit na lohiciori nan to kitibotuno iya na afa lagerore nan lobo gaa. ⁴ To kikena ene, itum cia ite iniang kwenyun nei iyo ilitit lo Kristo ⁵ Na afa lida itotorohini cio kofiang kuna kude iya na litibotunorehin jijia iyo jayona ko kamocak kulo Lobanga kuna inyuji. ⁶ Ara ene ilitit na lojo, to layomit na ijir ara Misiok ko Israel fajihit kulo ken Lobito, kangarak ara Lobito ciha na longon iyo Kristo Yesu. ⁷ Alotu nan ara karwaani lo layomit na ijir to kicwara lo kisa lo Lobanga na lohicori nan to tic lo golun nenge. ⁸ Kokileng lara nan nasidi noo to kiji lo cio kulo Lobanga fad, kiciori nan ene kisa lo kititima diho misiok bara na lida itiririuno na longon iyo Kristo ⁹ manyu lo kitiyena cio fad tic lone ilitit afa liduha to karihin fad iyo Lobanga na loduk sangite pili. ¹⁰ Owak afa inyi ojo ojir atibotu jija to kanisa itotoro lo genyun lo Lobanga iyo kabolorok ko kalanyunok kuna longoni kai, ¹¹ Ijifita wahun nenge na losio na lokeru inyi kitiyo to Kristo Yesu Lahitok niyang. ¹² To inyi ko to kiruk iyo inyi kitum ohoi kifwonu diho Lobanga to laharu ko golun lo taulo. ¹³ Alelia dong nan diho ite jimitan kebuha to kidak na larumu nan tote, ara deyo ningi. ¹⁴ Tone tenya agung nan ketemoni lo Lobanga Apa ¹⁵ na licio karana nenge iyo tee kunenge fad kuna longoni kai ko kuna longoni kof. ¹⁶ Alifa nan jimitan iyo bara lo deyo nenge ingohi kitigol ite to golun lo okorif nenge iyo taulo kuningi. ¹⁷ ojir Kristo omanya taulo kuningi to kiruk. Manyu alifa jimitan itigoli kerda kuningi manyu kigurohini iyo kimaruno ¹⁸ irumunore golun, ara Lobito ko cio kulo Lobanga fad iyenare lalatun, karitan, lomajun ko kiluko lo kimaruno lo Kristo ¹⁹ ko yenun ene kimaruno logal genyun ojir kitifuti ite iyo kipimo lo kifut lo Lobanga. ²⁰ Dong diho inyi na litweru kitiyo ogal na lohitifia ohoi kode kibuha, iya na longonore golun nenge na litiyo to kenite kuniyang, ²¹ ingohi kwatun tongon diho inyi iyo kanisa ko iyo Kristo Yesu iyo kofiang fad karihin ko karihin! Amen.