¹ Afa berien iweiha afa ite to gila lo cik ko kipal ² lafa limanyare ite ijifita warun lone kof ko lo kalanyunoni lo okabwe lo kiyoma na lara okorif na longon kitiyo iyo cio kuna loberu ningo tenya lo Lobanga. ³ Kiri manyu afa ohoi fad jii berien kijifita koditi lafa lohitomonunorehin ohoi kijifita wahun ko kibuha lo kenite kuniyang na lohiyaru ohoi iyo kipal. Iya cio kuna kude kira afa ohoi kuna lohingoni iyo kilongo lo Lobanga. ⁴ Ati to kimaruno nenge nahitok na longonore inyi kenite kuniyang, Lobanga na lobara kibaya ⁵ Kicio ohoi warun iyo Kristo kileng lohira afa ohoi kaweyak to kipali pali kuniyang ara to kisa kilwahunorihin ite. ⁶ Oto Lobanga kitibuhu ohoi ara Lobito ko Kristo ko kititongohino ohoi konyi iyo okabwe lo kai iyo Kristo Yesu, ⁷ ojir iyo warun na lolotuno kitotorohi bara nenge na lida otumiti kitiririo ko lobo tohi na litibotu inyi diho ohoi to ken lo Kristo Yesu. ⁸ Tonyio kilwahuni ite to kisa lo Lobanga na lolotu to kiruk ida olotu to kenite kuningi, ara kicwara lo Lobanga ⁹ ida ara to tic ojir lobo tungani ida opufare. ¹⁰ Tonyio kira ohoi cio kuna lohiduk Lobanga kuna lohifihi iyo Kristo Yesu lo kitiyo ticitici kuna ijiri kulafa likukumahi inyi many berien ojo ojir ohoi kitii. ¹¹ Tona, ibuhati jimitan afa, ite kuna lira misiok to otomone ningi kuna lilolongo Judeahin ojo cio kuna lida iliraru, ofihi kenite ojo kiliraru icieng kilira na litii to kac kulo cio iyo tyang lo ken ¹² ibuhati jimitan kuna faritin ingoni afa ite oleng to ken lo Kristo, kigelari oleng to Israel ira cio kulo kalele iyo ciharu lo ciha, iru ko kigeno, iru ko Lobanga ten to kof. ¹³ Ati jija iyo Kristo Yesu, ite kulafa lilomaha lohiyauni inyiha to okoto lo Kristo. ¹⁴ Tonyio inyi to ken nenge lara kisiliban niyang na limorihi kuno are ofwonu ara Lobito kogilaru kiwata lo lohikori lo liwa ¹⁵ to kifufusoro cik ko itidwari fad to ken ko okoto nenge. Ara wahun nenge lo kimoruno kuna are ojir ofwonu ara Lobito tungani ngejuk to ken nenge na lara tic nenge lo kitiyomo, ¹⁶ manyu iyo ene ken bito lo kitiyomohino icieng ara fad ko Lobanga to kuruce na litiyore inyi lo kifadarore liwa to kiji neicieng. ¹⁷ Olotu inyi lititim tenya lo kisiliban diho ite kuna ilomaha ko kisiliban diho kuna lonyihaha. ¹⁸ Tonyio ara diho inyi kitum ohoi fad goruno diho Apa to okorif Lobito. ¹⁹ Iya na lida ite irihe ira misiok kode cio katimanyak ati cio kulo kof ara Lobito ko cio kulo Lobanga manyu tee kulo kolo Lobanga ²⁰ kuna lohiduhohini iyo guri kulo jayona ko kamocak na lara Kristo Yesu to ken nenge moru lo rukun. ²¹ Iyo inyi imora kaji owoju kaji ara Lobito lo rahun kaji na inyu lo Lobanga. ²² Manyu iyo inyi iduhohino kileng ite ara Lobito ara faji na litongore Lobanga to Okorif nenge.