¹ Ara ene kigata lo gum na li gatahinore Moses katiyoni lo Lobanga cio kulo Israel o rihe inyi ida lo wei; ² O joo inyi: O lotu Lahitok to donge lo Sinai o wangahi icieng to donge lo Seir; I farang inyi to donge lo Paran. O lotu Inyi ko ilulung lo kanyujok to ngati lo Orof, to ngati lo sirisirihin kulo dongecio kunenge. ³ Dede ara Isi li maru kuno cio; O ngoni kanyujok fad kana nino. To kejuha kunino o gung icieng fad kof, many diho isi o rumahita icieng icihiti ⁴ cik na lohi co Moses ohoi ara lolungat lo tuba lo Jakob. ⁵ Ara afa Inyi kabu lo Jesurun na lo tubare kabolorok kulo cio, ara lobito ko imaniti kulo Israel. ⁶ I ngohi Reuben to war ida o wei, ida manyu cio kunenge i kutingi. ⁷ O teny inyi ji to ngati lo Juda: Lahitok to ning kicira lo Juda; I yauno inyi diho cio kunenge. O rem inyi to kac kunenge lo ki tiho tohi na i rohoi to ken nenge, to lwak inyi iyo merok kunenge. ⁸ To ngati lo Levi o joo inyi: Ara Tumim ko Urim nino lo karwaani Nino na li genoro. I tem afa Isi inyi to Massa, i lotu afa isi i lof tau nenge to kutuk lo kifi kulo Meriba, ⁹ O joo inyi to apa nenge ko iyang nenge, “Ida nan a yio to icieng.” Ida afa inyi o heru recera kunenge kode o fik tau kileng iyo tee kunenge, ati i riria inyi tenya nino manyu o ric ciharu nino. ¹⁰ Iti yena inyi tenyitenyi kunino iyo Jakob ko cihicihi kunino iyo Israel. I fotohita inyi iheru ketemoni nino ko kiciorita locurat fad kai lo ciali nino. ¹¹ I gatahi kilefere nenge Lahitok manyu to kwama to tic lo kac kunenge. To bok kuna lo wojohino ki iti remo inyi, to keru merok kunenge many ida o wojuni ari. To ngati lo Benjamin o joo inyi, I ngohi kito na li maru Lahitok i yoma o ganga iyo inyi tonyio i maruk Inyi inyi far fad manyu i yoma na li maru Lahitok kiji lo okokoho kunenge. ¹³ To ngati lo Josep o joo inyi, I ngohi Lahitok i gatahi kof nenge gum to lokolukolu na lo lotu to kai tur ko to kifi kuna i lukoho kuna lo ngoni katua lo kof. ¹⁴ to kuna i jiri kuna li yauno kolong ko na i jir bebe na ngo tum ofa i yauno ¹⁵ to kiciorita kuna lo nyumuni to dongecio kulo lohitwaha, ko ngijan lo dongecio kuna sidiha kuna lo sio. ¹⁶ ko kiciorita kuna i jiri noo kulo kof ko kifut nenge ko kisisio lo la lomanya lafa tim lo cura. I ngohi kuno fad to ngon kue lo Josep komom lo kito lo okabwe to kiji lo recera kunenge. ¹⁷ Iyo obolore nenge o ri inyi ko mongo okang, ara muriaha kunenge murialia kulo mongo na i ngere. To icieng o gume cia inyi misihi kileng kuna lo ngoni many lohicungi lo kof; Icieng alifi tomon kulo Epraim, icieng alif kulo Manase. ¹⁸ To ngati lo Zebulun o joo inyi, “To kwama Zebulun to loro nino oleng manyu isi Isakar to katua lo kemahin kunino. ¹⁹ I lolongori mute cio iya dongecio o fwori i fotohini kiciorita kulo cio kabirak; o daha cia icieng iyo samata kulo nam, iyo ibariti kuna li duha katua lo singeti.” ²⁰ To ngati lo Gad o joo inyi, “O ngon ko gum tungani na li iti lalat lohitongore lo Gad o manya Gad ijia iya ngatuny na lo konya kana kode kue. ²¹ O nyumu inyi kof na i ji rara nenge ititongihin kicait lo kaboloroni ara nenge. Ka lo tuba kabolorok kulo cio, o tenya inyi wahun lo Lahitok na i nyu ko ngoto lo tenya nenge to ngati lo Israel.” ²² To ngati lo Dan o joo inyi, “Ara Dan kito lo ngatuny na li firunita to Basan.” ²³ To ngati lo Naptali o joo inyi, “O sam Naptali to kisisio lo Lahitok manyu i fut ko kigata lo gum Nenge, o luny cia inyi ngati lo Orof o loro iya nam.” ²⁴ To ngati lo Aser o joo inyi, “Na lo rumu gum iyo tee fad inyi Aser, I ngohi recera kunenge i sisi inyi manyu i ngohi inyi i lala kejuha kunenge to ngoroni. ²⁵ Ara cia kikolita kulo lokoli nino bilieta kode mwala manyu o ri cia golun nino ko faritin kulo warun nino. ²⁶ O ru lobo lo ri ko Lobanga lo Jesurun, na li feita o ngot kai o lotuno lwaha isi ko to idis lo obolore Nenge. ²⁷ Ara Lobanga na lo sio lotafare nino manyu ene kof o ngon kac lohiyomare, i fuhe cia Inyi merok kunino to ketemoni nino, o joo, “To keru icieng!” ²⁸ Tona o manya cia Israel to kisiliban; i tongo cia Jakob ara na i jir iyo kof lo ngamang ko vino ngejuk, faji na li iti yitare kai lokolukolu. ²⁹ I ngon isi ko gum Israel! Ngai lohi ri ko isi, cio kuna lo lwahu Lahitok? Ara Inyi buhu ko kalwahani nino manyu ngalem lo kwatun nino, ki bang cia merok kunino isi manyu i nyion cia isi kueci kulo dongecio kuneicieng.