¹ Oto Moses ko ki rwohoro donge lo Nebo to oleng lo kof lo Moab many kue lo Pisga na li siran ko Jeriko. To ijia i totorohi Lahitok inyi na kof fad many to Gilead many Dan. ² Faji lo Naptali fad ko kof lo Epraim ko Manase,kof lo Juda fad o goru many Nam lo Mediterranean, ³ Negev ko kof lo torit lo Jeriko kang lo otit o loo many Zoar. ⁴ Oto Lahitok o joo diho inyi, "Ara ene kof lafa la cik Nan to ki butia diho Abraham, Isako ko Jakob lafa la jimitare Nan 'A co mute Nan lotataha kuningi', lahi co Nan isi i deu to konyieha kunino ati ida cia Nan ahi co isi i range iya ijia." ⁵ Oto Moses karwaani lo Lahitok o weihi ijia ko lo Moab iya na lo tenyare Lahitok. ⁶ O nuhahi Lahitok inyi ijia kof lo Moab katua lo gura na li siran ko Bet Peor ati ko jijia o ru tungani lo yen faji lo kuecere nenge. ⁷ Orumu Moses lara karihin kunenge mia lobito ko keek are na lo weyarore inyi ati ida afa konyieha kunenge i fafari manyu i wasihi inyi o gol. ⁸ I toyo cio kulo Israel to Moses ijia oleng lo kof lo Moab to faritin keek uni many o ru faritin kulo ki toyo ko ki cira. ⁹ Jijia orumu Josua kito lo Nun i fut ko okorif lo genyun tonyio o fik afa Moses kac kunenge kue nenge. Dong o ning cio kulo Israel inyi manyu i tiyi tohi na lo cik Lahitok Moses. ¹⁰ Many to nu, o ru lobo kamocani lo woju to Israel na lo ri ko Moses na lo yen Lahitok manyu o tenya ko Inyi tarany komoma, ¹¹ na li tiyi kuno tanguhin ko kitotorita lo cule Lago inyi ki tiyo kof lo Ijipt diho Parao ko kulahitoha kunenge fad ko iyo kof neicieng fad. ¹² Tonyio o ru lobo tungani li tototor golun na hitok kode i tiyi kuna ticitici li tirima li tiyi Moses ketemoni lo cio kulo Israel fad.