¹ "To ning isi kai a tenya nan; to ning isi kof tenyitenyi kulo kutuk nei. ² I ngohi kitiyena nei to dou iya kuju, manyu i ngohi tenyitenyi kunei i culuno iya lokolukolu; Iya kuju na lo boho olemo na lo lituno, iya kuju na hitok iyo mana na lo buju. ³ A tul cia nan karana lo Lahitok. Olo iti maj bolorun lo Lobanga niyang! ⁴ Ara Inyi tabak niyang, o dwaru tic nenge, manyu o behi kikohin kunenge. Lobanga na li genoro, na lida i tiyo kipal; O bir Inyi manyu o behi. ⁵ I palaru icieng manyu ida ara tee kunenge; Iyo riri neicieng ara icieng cio kuna lo gere, kofiangiti na i kudo. ⁶ Koditi na ngi dumahinore ite Lahitok Inyi ene, ite cio kuna i dataruha lo ru genyun? Ida Inyi ara apa ningi, kaduhoni ningi na lohi kukum ite, ki duk ite. ⁷ I yiutu faritin kulo berien; I gigilo kofiang kulafa kulo berien lo ring. I tifia apa nino, ki rihohi cia inyi isi; Ngoroyok kuningi, ki titimahi cia icieng ite. ⁸ Ka li cwara Lobanga na lo ngon kai noo misiohoni lolunyoti kuneicieng, ka lo kora Inyi cio fad. O fik Inyi lohikorihin to cio i jifita wel lo tee kulo Israel. ⁹ Tonyio ara icait lo Lahitok cio kunenge, ara Jakob icait na lo koru inyi ara nenge. ¹⁰ To kof lo kuny o rumahi inyi inyi iyo kof na ikorifi na ikakole. I maruk inyi to okoko nenge o ric inyi, o ric inyi iya katarati lo konyiek nenge. ¹¹ iya logiga na li ropore kaji nenge, i lorita iti saha tee kunenge; o radahi fuho kunenge i tarunitare icieng, o tingorita icieng to kofir kunenge. ¹² Lahitok ake afa lo rihita inyi, o ru afa lobo lobanga misiohoni lo ngon ko inyi. ¹³ I co inyi i feita to kue lo kof na i todo, i fit inyi to ngak kulo manna, iti kul inyi to otoro lo borok lo moru ko ngoroni lo iyau na lo coluni iyo moru na i gol. ¹⁴ to opopo ko lei kulo kicu ko kulo kiri ko kera, i fit inyi to tyang lo tee kulo kera, ko kirieho kuna i fufuha, ko mongi kulo kera kuna i firi kulo Basan, ko to kofwo kulo geme kuna i nyuji. I mat isi vino lo mana na li furu o do iya okoto. ¹⁵ O fir Jesurun many i dyenga kof, o tum daha many o firi i riociho. I ngohi icieng Lobanga na lo duk icieng manyu o beruni moru tabak kalwahani neicieng. ¹⁶ Iti furu icieng okaine Nenge to lobangahin kuna lara misiok manyu i ciori awo i nief Inyi to kuna lopidingahin kuneicieng li siriaha. ¹⁷ I fotohi icieng kiciorita diho lobangahin kulo talerun kuna lida ara Lobanga; Lobangahin kuna lida icieng o yen, lobangahin kuna lo rihe o fwonu, lobangahin kulafa lida lohitwaha kuningi i wor. ¹⁸ I ngohi ite tabak na lara apa ningi, i luluhi Lobanga na lohi tomonu ite. ¹⁹ O deu Lahitok kuna fad ko beruno icieng tonyio iti longo tee rei ko kariok kunenge Inyi. ²⁰ O joo Inyi, "A duhe cia Nan komom Nei diho icieng, a deunore hati lohicungi neicieng tonyio ara icieng kofiangiti na i sile, tee kuna lida i genoro. ²¹ ki iti kaino icieng Nan ko tohi na lida ara Lobanga manyu ki iti longojitati Nan to kuna lopidingahin kuneicieng lo ru tic neicieng. A co cia Nan okaine i nief icieng to cio kuna lida ara cio Kunei, ati longo cia Nan icieng to misi na lida o ngon ko kiniang. ²² Tonyio i noharu cia kima to awo Nei, kima na lo curaru many kof lo kaweyak fotiri; O keru cia kof ko manatak kuna lo rihe ida lo denguni many i niem iyo fotiriciok kulo dongecio. ²³ A furohi cia Nan jiohijiohi kenite kuneicieng manyu a kirihi ngonecio kunei kenite kuneicieng. ²⁴ A culahi cia Nan kinga na i nok iyo icieng, jiohijiohi kakerunok ko mwaita kuna i rohori. A culahi cia Nan kala kulo tyangi kuna i ngereha, kiyeri lo muniok kuna lo yeta kenite iyo fur. ²⁵ To kikoihin kulo kang hatua i co cia ngalem tee o ru diho icieng, katua lo kajihit kuneicieng o lanyu cia bangun; O keroro cia tee kilahaji ko tee kariok, kileng idoleha ko ngoroyok kuna i kweri kueci. ²⁶ A joo Nan ati sara cia Nan icieng manyu a fufuse karana neicieng ida cio i yiu. ²⁷ Ati a bang Nan kufa lo meroni tonyio o joo cia merok to pufa, "Lo lanyu kac kuniyang icieng ida Lahitok li tiyi kuno fad." ²⁸ Ara icieng misi na lo ru kigigilo, o lanyu kiniang icieng; ²⁹ Ngara hati o genyi icieng i niangiti kuno tenyitenyi, o yeniti jimitan nyio cia lohicungi niyang! ³⁰ Aja lobito tungani o tum ki fuhita alif, kulo cio! Kode are i co cio alifi tomon i fe, ka lida ara tabak neicieng li iti lotohi, ka lida ara Lobanga li co icieng golun? ³¹ To nyio ida tabak neicieng o ri ko tabak niyang, kileng merok kuniyang o yeniti ji. ³² Ara kinyiemoti lo merok kuniyang lo Sodom na lara lo mana lo Gomora. O ri icieng ko vino na lo ngon ko kiyeri na lo dwari ngak kunenge. ³³ O ri vino neicieng iya kiyeri lo ibohoyo, kiyeri lo lokuruba na li fada. ³⁴ Ida re nan a duhahi ene tenya ara mokoje manyu a genihi iyo ogogor lo sang kunei? ³⁵ Ara duma Nitole, a lenu cia Nan. To kude faritin o sorotaru cia kejuha kuneicieng; lo nyiha far lo kidak neicieng, o runyuno cia lohicungi neicieng kenite kuneicieng. ³⁶ I co cia Lahitok cio kunenge o lanyu tenya, i nief cia kisa inyi to karwaak kunenge langun lo deu Inyi golun neicieng lo ru, manyu lo ru tungani lo tong opii kode ida. ³⁷ O joo cia Inyi, "Jijia aji o ngon lobangahin kuneicieng, tabak lafa lo fwo icieng ki duha ijia, ³⁸ lobangahin kuna lo nyia somiana kulo kiciorita kuneicieng, kuna lo mat vino lo kiciorita imatit kuneicieng. ³⁹ Ito de dong jimitan Nan token Nan Nan! O ru lobo lobanga lohi siran ko nan. A fada Nan ati wara manyu, lati korongan Nan ati furie manyu cia manyu o ru lobo tungani lo lwahu to kana Nei. ⁴⁰ A ting Nan kana Nei kai manyu a buti to dwarun iya na la warare Nan tur. ⁴¹ Ka la fwat Nan ngalem Nei na i medek, manyu a nief to kana a ngotore tenya. A fik cia Nan ilen iyo merok Kunei, manyu a dumahi kuna lohi beru Nan. ⁴² A co cia Nan ngonecio kunei o rumaha okoto, i rumu ngalem Nei o daha tyang ko okoto lo kuna li fadari ko kuna li niefuni, ko kueci kulo kulahitoha kulo merok. ⁴³ Ito maj Inyi ite misihi ara lobito ko cio kunenge, tonyio i lenu cia Inyi okoto kulo karwaak kunenge. I yaru cia Inyi ilen iyo merok kunenge manyu o pul kof nenge ko cio kunenge. ⁴⁴ O fwonu oho Moses ko Josua kito lo Nun i titimahi tenyitenyi kulo ene wole fad o ningo cio. ⁴⁵ Ka lo keru Moses ki titimahino kuno tenyitenyi fad diho cio kulo Israel. ⁴⁶ o joo diho icieng, "Ito fik taulo iyo kuno tenyitenyi fad lahi titimahi nan ite elefar, o jir ite i cihare tee kuningi lo ningo ko rica tenyitenyi kulo ene cik fad. ⁴⁷ Ida icieng ara tenyitenyi kuna li duha diho ite ara icieng warun ningi. To icieng i many cia ite karihin beciek nu kof li rangaru ite Jordan fworo ki taluno. ⁴⁸ Iyo na far bito o rihohi Lahitok Moses o joo, ⁴⁹ "I loo kai lo dongecio kulo Abarim iya donge lo Nebo to kof lo Moab na li siran ko Jeriko i loo to de kof lo Kanaan, kof na la cwara cio kulo Israel ara neicieng. ⁵⁰ Ijia donge na li rwok isi, i loo cia isi i weihi ijia i moraru ko cio kunino iya na lo weihinore rece nino Aron donge lo Hor i moraru ko cio kunenge. ⁵¹ Ara ene tonyio li gil afa ite kiruk diho Nan to ketemoni lo cio kulo Israel to faji lo kifi kulo Meriba Kades to kuny lo Zin tonyio ida ite i ting nyujon Nei kai to ketemoni lo cio kulo Israel. ⁵² Tona i deu cia isi kof lolomaje, ida cia isi i rute na kof la cwara Nan cio kulo Israel."