¹ Oto Moses o loo oleng o teny kuno tenyitenyi iyo cio kulo Israel fad o joo, ² "Lara jijia nan karihin mia lobito ko keek are manyu ida nan a rihe a tum rihita ite. Lo rihohi Lahitok nan o joo, 'Ida cia isi i rang Jordan.' ³ Lahitok Lobanga ningi to ken o rang cia ketemoni diho ite. O keru cia inyi kunu misihi to ketemoni ningi manyu i talu cia ite kof neicieng. ⁴ O rang manyu cia Josua ketemoni diho ite iya na lo tenyare Lahitok. Manyu i tiyi cia Lahitok diho icieng tohi na li tiyi diho Sihon ko Og kabuno kulo cio kulo Amor kuna lo keru inyi ara lobito ko kof neicieng. ⁵ I ciorihi cia Lahitok icieng diho ite manyu o jir ite i tiyi diho icieng sangite kuna la cik nan diho ite fad. ⁶ Ito gol manyu i fut ko ngere, ke bang kode ke ryenya to icieng to nyio o loro Lahitok Lobanga ningi ko ite, ida cia Inyi ki ngohi ite kode ki corihi ite." ⁷ Oto Moses i lolongu Josua ko jimitan diho inyi to ketemoni lo cio kulo Israel fad, "To gol manyu i futa ko ngere noo tonyio o jir isi i loo ko kuno cio kof lafa li buti Lahitok diho lohitwaha kuneicieng lo ki cwara icieng manyu o jir isi i korahi diho icieng ara lolunyot neicieng. ⁸ O loro Lahitok to ken ketemoni nino manyu ki ngon cia ko isi; ida cia Inyi ki ngohi isi kode ki corahi isi. Ke bang kode ke co tau o dou." ⁹ To na i ger Moses ene cik i cwarahi diho kadwarak kulo imanit lo Levi, kuna lo tingita sanduk lo Cik lo Lahitok ko diho lohitwaha kulo Israel fad. ¹⁰ Oto Moses o cik icieng o joo, "To lohicungi lo Karin mietare mietare na lara Kari lo kibalihino mongiyohin, to karama lo Tuguno, ¹¹ ka lo fwonu cio kulo Israel fad tuba ketemoni lo Lahitok Lobanga ningi to faji na mute lo nyumu Inyi, o jir ite i kenahi icieng ene Cik o ningo icieng. ¹² To tubahi cio fad; rei, ngorwo ko tee, ko misiok kuna lo manya kangite kuningi o jir icieng o ning o jir o yeniti rima Lahitok Lobanga ningi manyu o riciti ki jifita tenyitenyi kulo ene cik. ¹³ O jir tee kuneicieng kuna lida o yen ene cik o ning o jir o yeniti rima Lahitok Lobanga ningi to karihin pili kuna li manyare ite na kof li rangaru ite Nord lo fworo ki taluno." ¹⁴ O joo Lahitok diho Moses, "Jijia lo nyiha far lo wei nino, i lolongu Josua i fwonu ko isi kema lohiricore faji na la sonare Nan inyi." Tona o fwonu oho Moses ko Josua kema lohiricore. ¹⁵ Oto hati Lahitok ko boto to kema iyo wiriti lo idis, manyu o woita idis kue lo agwala lo kema. ¹⁶ Oto Lahitok o joo diho Moses, "I loro isi ki yoma ko lohitwaha kunino, manyu o fwo cia mute kuno cio ki wora kude lobangahin kulo na kof lo fworo icieng ki taluno. Ki ngohi cia icieng Nan manyu o gili ciharu na la tiyi nan ko icieng. ¹⁷ Manyu to lafar a lotu mute Nan a longo diho icieng ko ngerihino icieng, a duhe cia Nan komom Nei diho icieng manyu o keroro mute icieng. O fwonu mute mwaita ko johijohi kenite kuneicieng, manyu to kunu faritin i tifia mute icieng kenite o joo, 'Ida re kuno mwaita ko johijohi o fwonu kenite kuniyang tona lo rujore Lobanga niyang ko ohoi?' ¹⁸ Manyu a duhe bo mute Nan komom Nei lufar to rohojun neicieng na lo fwororehin iyo lobangahin kude ake. ¹⁹ Jijia i gero ene wole manyu iti yenahi iyo cio kulo Israel manyu i cwara icieng to wol, o jir mute i tongo ara saden Nitole diho icieng. ²⁰ Ka la yauno cia Nan icieng na kof li tihitare lei ko otoro, kof lafa la cik Nan to kibutia diho lohitwaha kuneicieng; langun lo nyia icieng li moneho manyu lo rabaniti, i belo mute icieng iyo lobangahin kulakude ki wora icieng, ki beruni Nan manyu o gili ciharu Nei. ²¹ Manyu ka lo fwonu mwaita ko johijohi kuna i borengi kenite kuneicieng, ara cia ene wole saden diho icieng, tonyio ida mute o luluoro (ene wole) diho lotataha kuneicieng. A yen Nan tohi na lo kodomo icieng ki tiyo, kileng o rihe Nan ida la yauno icieng kof na la cik Nan to kibutia." ²² To inyia i ger Moses na wole lafar manyu iti torahiti hi cio kulo Israel. ²³ I co Lahitok ene cik diho Josua kito lo Nun, "To gol manyu i fut ko ngere, tonyio i yauno cia isi cio kulo Israel na kof la cik Nan diho icieng to kibutia. Manyu a ngon cia Nan to ken Nei ko isi." ²⁴ Langun lo keru Moses ki gero tenyitenyi kulo cik iyo buk many to lohiciahi many lohicungi, ²⁵ I co inyi ene cik diho cio kulo imanit lo Levi katingitak kulo sanduk lo Cik lo Lahitok o joo, ²⁶ "I yaroti ene buk lo cik i fwo i fik kalele lo sanduk lo Cik lo Lahitok Lobanga ningi. O jir i wasihi ijia ara saden diho ite. ²⁷ tonyio a yen nan silan ko golun lo muruto kuningi; Ka li sil afa ite diho Lahitok o rihohi ko nan a war ki lihita ko ite, adi cia la wei nan o ri cia na silan ningi aja? ²⁸ Ito tubutu ketemoni Nei kabolorok kulo imaniti kuningi fad ko kulahitoha kuningi o jir nan a teny kuno tenyitenyi o ningo icieng manyu a lolongu kai ko kof ki saden diho icieng. ²⁹ Tonyio a yen nan jimitan to kifwongi lo wei nei i fwonu cia ite i palaru noo manyu i beloro to kikoi lafa la cik nan diho ite. Iyo faritin kuna lo fwonuno i rumu cia kidak diho diho ite tonyio i tiyi cia ite ticitici kuna i boti to ketemoni lo Lahitok iti furu kilongo Nenge to sangite kuna li tiyi ite to kac kuningi." ³⁰ Oto Moses ko ki kena tenyitenyi kulo ene wole fad many to lohiciahi many lohicungi na lo ningo lotubare lo cio kulo Israel fad.