¹ Ka lo fwonu kuno igatiti kulo gum ko ificiti la fik Nan ketemoni ningi kenite kuningi ito hati ite i fik taulo to fajihit kuna lohi iti sare Lahitok Lobanga ningi ite, kiji lo misihi, ² ito hati ite ko tee kuningi i beluno diho Lahitok Lobanga ningi manyu i ningo inyi to taulo kuningi fad ko to warita kuningi fad i jifita sangite fad kuna lahi cik Nan ite elefar, ³ oto cia Lahitok Lobanga ningi i nyiahu bara ningi manyu o ngon ko laa diho ite manyu ki tutubu ite ari to misihi kuna lohi iti sarahi Inyi ite. ⁴ Kileng ngohi birori ite many kof na i loma noo to fotiri lo kai, to ijia ki tutubu cia Lahitok Lobanga ningi ite ki nyiahu. ⁵ Ki yauno cia Inyi ite kof na lara lo lohitwaha kuningi i fwonu cia ite i luny ara ningi. Ki co cia Inyi ite i baraha noo manyu ki iti boreng ite i lany ko lohitwaha kuningi. ⁶ I lir cia Lahitok Lobanga ningi taulo kuningi ko kulo lotataha kuningi o jir ite i marunore Inyi to taulo kuningi fad ko to warita kuningi fad manyu i wari. ⁷ O fik cia Lahitok Lobanga ningi kuno ificiti fad kenite kulo merok kuningi kuna lohi beru manyu ki iti gema ite. ⁸ I fwonu cia ite i ningo Lahitok ari manyu i jif kuno cihicihi kunenge fad lahi cwara nan ite jijia. ⁹ Oto cia Lahitok Lobanga ningi ki co ite i tenu sangite kuna li tiyo ite to kac kuningi fad, ko ki iti pita ite ko sang kuningi ko ki iti dora kof ningi. O lotu cia Lahitok o kwama diho ite ari manyu ki co ite i baraha iya lafa lo kwamare inyi diho lohitwaha kuningi, ¹⁰ ka li ningo ite Lahitok Lobanga ningi manyu i ric cihicihi kunenge ko isingiti kuna li gero iyo ene buk lo Cik manyu i belo diho Lahitok Lobanga ningi to taulo kuningi fad ko warita kuningi fad. ¹¹ Jijia tohi na lahi ciha nan ite ida o gol iyo ite manyu ida o loma. ¹² Ida o ngon kai na ngi tifia isi i joo, "Ngai cia li rwok kai ki yauno inyi manyu ki furahi ohoi o jir ki ningore inyi?" ¹³ Ida manyu o ngon tode lo nam na ngi tifia isi i joo, "Ngai cia lo rang nam o jir o loo i yauno inyi manyu ki furahi ohoi o jir ki ningore inyi?" ¹⁴ Jijia o nyiha tenya tang ko ite; o ngon kutuhe kuningi ko taulo kuningi o jir ite i ningo inyi. ¹⁵ To de a fiha nan warun ko bara, wei ko kidak ketemoni ningi elefar. ¹⁶ Tonyio ahi ciha nan ite elefar lo ki maruno Lahitok Lobanga ningi, lo lotita ko Inyi to ningo manyu i jif cihicihi kunenge, isingiti ko Cik nenge ito cia ite i wari manyu i borengi oto cia Lahitok Lobanga ningi ki gatahi ite gum to kof na li fworo ite ki taluno. ¹⁷ Ati ka li beloro taulo kuningi i beru ningo manyu ka li labaru ite oleng i fwo i gung ketemoni lo lobangahin kude ake ki wora icieng, ¹⁸ ahi tulohi ite elefar jimitan i fwonu cia ite i keroro. Ida cia ite i rung na kof li rangaru ite Jordan fworo ki taluno. ¹⁹ Elefar a lolongu nan kai ko kof ara sadeni jimitan la fik nan warun ko wei ketemoni ningi. Igatiti ko ificiti. Jijia ito nyumu warun o jir ite ko tee kuningi i wari, ²⁰ manyu o jir i maru Lahitok Lobanga ningi, i ning ogoro nenge manyu i nief i goritare Inyi. Tonyio ara Lahitok warun ningi, manyu ki co cia ite karihin beciek iyo kof na li buti Inyi ki cwara diho lohitwaha kuningi; Abraham, Isako ko Jakob.