¹ O ru lobo tungani lo gelemi kode to tojoro kode to ngoto lo moroho lo rutohi iyo lotubare lo Lahitok. ² O ru lobo tungani lara kito lo apila kode lotataha kunenge lo rutohi lotubare lo Lahitok kileng iyo kofiang tomon. ³ O ru lobo tungani lo Amon kode lo Moab kode kude lotataha kuneicieng lo rutohi lotubare lo Lahitok kileng iyo kofiang tomon, ⁴ tonyio ida afa icieng ki iti ric ite to daha kode kifi lafa li fwonunore ite to kof lo Ijipt manyu o fwori o dumi Balaam kito lo Beor lo kang lo Pesor to kof lo Aram Naharim lo lotuno kificio ite. ⁵ Oto hati ida Lahitok Lobanga ningi o ning tenya lo Balaam ati i bel na kificio nenge ara kigata diho ite tonyio ki maru Lahitok Lobanga ningi ite. ⁶ Ke tahita yomo lo omorte ko icieng to faritin kulo warun ningi fad. ⁷ Ke iti kaj cio kulo Edom tonyio ara cio kulo Edom kajieba kuningi. Ke iti kaj Ijiptoni tonyio i manya afa ite ira misiok kof neicieng. ⁸ O tum kofiang kulo uni kulo tee kuneicieng rutohino lotubare lo Lahitok. ⁹ Ka li fwo ite i fik kem lo remun ko merok kuningi, ito ric kenite iyo sangite kuna lida o nyuji fad. ¹⁰ Ka lida lobo tungani ningi o nyu to lobo tohi li tiyihino iyo inyi karue, o jir inyi o loo oleng to kem o loo i tongo ijia. ¹¹ Ati langun lo lotuno kurou o jir inyi i lala ojo kolong o doi, o lotu katua lo kem. ¹² Ito dumu faji to oleng lo kem na ngi fworitare ite sitare. ¹³ Iyo sangite kuna li tehita ito tehitati kibohihin, ojo i fwo sitare, i bok kof i muhohi sitare nino. ¹⁴ Tonyio i lorita Lahitok Lobanga ningi kem ningi lo rica ite ko lo ki cwara merok kuningi kac kuningi. O jir kem ningi o nyu o jir inyi ida o deu lobo tohi i bot to ijia na ngi co inyi i bele komom nenge iyo ite. ¹⁵ Ka li feju opii lo lobo tungani tafa diho isi, ke ciorihi inyi kana lo Lahitok nenge. ¹⁶ I ngohi icieng koditi lo kuna cio i tongo kiji ningi lobo faji lo wak icieng kode lobo kang lo nyumu icieng. Ke iti gema icieng. ¹⁷ Ke co lobo tungani retoni kode ngorwani lo Israel ara mulayani lo tifine lo ki wora mininga ko okorifi kuna i boti. ¹⁸ Ke yauno kidumita kulo mulayani retoni kode ngorwani kaji lo Lahitok Lobanga ningi lo duma lobo kibutia tonyio o beru Lahitok Lobanga ningi icieng fad. ¹⁹ Ke fik magoba iyo robia kode daha kode lobo tohi lo tum rumuno magoba ka li kurohi isi diho Israelani kaletoni nino. ²⁰ I tum isi fiha magoba diho misiohoni ati ida ara Israelani kaletoni nino o jir Lahitok Lobanga nino ki gatahinore isi gum iyo sangite pili kuna li tir isi to kac kunino iyo nu kof li fworo ite ki taluno. ²¹ Ka li buti isi lo ki cwara lobo tohi diho Lahitok Lobanga nino, ke rungo dumahino tonyio o wak cia Lahitok Lobanga nino na tohi diho isi ito cia isi ira kapalani. ²² Ati ka li ricaru isi iyo kibutia ida isi ira kapalani. ²³ Tohi na lo teny kutuk nino o jir i de jimitan li tiyi isi, tonyio i buti afa isi to kisiliban iyo Lahitok Lobanga nino to kutuk nino na lida ki fudahini. ²⁴ Ka li loo isi vinore lo loryehat nino to nyia ngak iya na li wahare isi daha ati ke dyehi kude iyo aduhu. ²⁵ Ka li loo isi mana lo loryehat nino, to gilu ngamang to kana nino ati ke deng to ngalem.