¹ Ka lo yem lobo tungani ngorwani na lo lotu inyi o beru to kifwongi, tonyio o rumu inyi lobo tohi iyo inyi na lida iti kwama inyi, oto hati inyi i gerohi inyi waraga lo jaha i co kana nenge oto hati i fuhe inyi to kalenge. ² Oto hati langun li ngohi inyi kalenge o lotu ara ngorwani lo lobo tungani ake. ³ oto manyu retoni nenge lo are o beru inyi i gerohi inyi waraga lo jaha i ciorihi kana nenge i fuhe inyi to kalenge kode o wei na retoni nenge lo are. ⁴ To inyia ida lafa retoni nenge ketemoni lafa lo jak inyi o tum yema inyi ari langun li pale inyi, ida cik i ruk. I tongo na ara tohi na i rohoi to konyieha kulo Lahitok. Ke yauno kipal iyo kof na lohi cwara Lahitok Lobanga ningi ite ara ite ara lolunyot ningi. ⁵ Ka lo rihe tungani i teran ida o cam to inyi loro rem kode ki cwara inyi lobo tic. To kari lobito o jir inyi i yoma dee iti kwama ngorwani na lo yem inyi. ⁶ Ke nief kirie kode kibunge lo kirie lo tungani to mongiyo tonyio o ri na iya ki niefa warun lo tungani to mongiyo. ⁷ Ka lo rumuni tungani i niefe Israelani kaletoni iti rak kode iti lote ara opii, o jir na tungani kaniefani o wei. O jir ite i lale rohojun to kiji ningi. ⁸ Ka lara to mwai lo ken na litidiho, ito geny manyu i tiyoti iya na li singare kadwarak kulo imanit lo Levi ite token. I tiyoti otoc iya na la cihare Nan icieng, ⁹ i yiutu tohi na li tiyi Lahitok Lobanga ningi iyo Miriam kunu faritin to kikoi langun li fwonu ite to kof lo Ijipt. ¹⁰ Ka li iti kurohino isi robia kode lobo tohi diho loryehat nino, ke rutohi inyi to kaji ki lifuno nu tohi lohi cwarahi inyi isi ara ibar kitilita; ¹¹ to woita sita i tilu inyi ki co isi to sita. ¹² Ka li kilwaha loryehat nino, ke co na ibar kitilita nenge o get kana nino. ¹³ I nyiahahi kyela nenge langun lo doyoro kolong o jir loryehat nino i muhore karue, oto cia inyi ki kwama isi manyu oto cia na ara tic lo biran to ketemoni lo Lahitok Lobanga nino. ¹⁴ Ke kwama ki iti rungo kidumi lo tungani katiyoni na ikilwaha manyu o kodomo, kileng ngara na katiyoni Israelani kaletoni ningi kode misiohoni na lo manya katua lo lobo kang ningi. ¹⁵ To dumahi icieng kidumita kuneicieng to faritin o rihe kolong ida lo doi, tonyio ikilwaha icieng manyu o deya icieng na kidumi. Ka lida i cira cia icieng diho Lahitok to isi, ito cia isi ira kapalani. ¹⁶ O jir ida i fadari katomonok to kipal lo tee kuneicieng, kode tee to kipal lo katomonok; o wei cia lobito lobito to kipal nenge. ¹⁷ Ke iti mumun misiohoni kode okidak iyo ngoto lo tenya kode i dumu kyela lo ngorwani lafuserito ara ibar kitilita lo mongiyo. ¹⁸ I yiuti jimitan ira afa ite opiihin to kof lo Ijipt manyu ki lahunore Lahitok Lobanga ningi ite to ijia, inyi li co nan ahi cihare ite ki tiyo ji. ¹⁹ Ka li dengo isi katua lo mana nino ito hati i gal kitorit lo ngamang, ke yite ki numuno inyi. To ngerihi iyo misiohoni, okidak kode lafuserito o jir Lahitok Lobanga nino ki gatahi isi gum iyo ticitici kulo kac kunino fad. ²⁰ Ka li iti ruruo ite ngak kulo olif to cianitok kuningi, ke yite ki iti ruruo iyo tanitanihin kakeny are, i ngohi kuna lo tong iyo misiok, okidahi ko lafuseritohin. ²¹ Ka li dia ite ngak kulo vino to vinorehin kuningi, ke yite baba vinore ari. I ngohi kuna lo tong diho misiok, okidahi ko lafuseritohin. ²² I yiunitati jimitan ira afa ite opiihin to kof lo Ijipt, inyi li co nan ahi ciha ite ki tiyo ji.