¹ Ka li deu isi mongo kode ker lo Israelani kaletoni o rijoro, ke iti base ati to de jimitan i yaru isi inyi iyo monye. ² Ka lida icieng o manya ki nyiha ko isi kode ka lida isi i yen monye, yaru kang nino i loo to ric many o tahunoti. Ito hati i co diho monye. ³ I tiyo na tic bito ka li rumu isi sigiria neicieng kode kyela kode lobo tohi keken li iti ri tungani. Ke iti base inyi. ⁴ Ka li deu isi sigiria kode mongo lo Israelani kaletoni o urohino kof, ke iti base. To lwak monye ki iti wojuno inyi. ⁵ Ke co ngorwani i cief kyelani kulo rei kode retoni i cief kyelani kulo ngorwo tonyio i siria Lahitok Lobanga ningi tungani na li tiyo ji. ⁶ Ka li rumu isi kaji lo kwenyite kode kai lo ciani kode kof oto hati ngotenge i muk tee kunenge kode katara, ke yaru ngotenge ko tee. ⁷ I tum isi i yaru tee ati i ngohi ngotenge to loo, o jir manya o lot ara na i jir diho isi manyu o jir isi i war to karihin beciek. ⁸ Ka li fak isi kaji ngejuk, iti ritahi lohileleri kue nenge o jir isi ida i yauno kipal lo ki iti yija okoto ken lo kaji nino ka lo uroro lobo tungani lo kai nenge. ⁹ Ke iti bulahi koditi kulo kinyiemo are vinore nino tonyio ka li tiyi isi ji, ida cia ara kuna kinyiemo keken ati ko ngak kulo vino fad i palaru cia. ¹⁰ Ke torahi mongo ko sigiria ara lobito i remore. ¹¹ Ke cief kyela na li kaduni iyo fofi kulo ker ko iribi ara lobito. ¹² To fihahi katurahak rukuni ongon kulo na kyela li ciefita isi. ¹³ Ka li yaru tungani kito karioni ara ngorwani ojo langun lo getore inyi o beru inyi ¹⁴ i ciak monga inyi i papal karana nenge o joo, " A yem ngole afa nan ene ngorwani ati ojo nan a loo iyo inyi, ida nan a rumu tuba lo okarione nenge. ¹⁵ Oto cia monye lo kito ko ngoto kito i yauno tohi na li totoro tuba lo okarione lo kito neicieng diho lohitwaha kulo na kang to lokoli. ¹⁶ O joo cia apa nenge iyo lohitwaha, "A co nan kito nei lo yemaru ko ele tungani ati o beru inyi inyi. ¹⁷ Jijia li papal inyi karana lo kito nei o joo diho nan, ' Ida nan a rumu kito nino ara karioni.' Ati kitotorita lo tuba lo okarione lo kito nei ene." Oto cia katomonok kunenge o fetahi kyelani ketemoni lo lohitwaha kulo kang. ¹⁸ oto cia lohitwaha i yaru na tungani o fwori iti gemi inyi. ¹⁹ I cori cia inyi murucan lo sekeli mia lobito kulo rial i cori diho apa lo kito tonyio li pal ene tungani karana lo kito karioni lo Israel. O sodoro cia inyi ki tongo ara ngorwani nenge, o jir inyi ida o jak inyi ka lo rihe inyi o war. ²⁰ Ojo ka lara na tenya dede ida hati iti botuni tuba lo okarione lo na ngorwani, ²¹ i yauni cia inyi ketemoni lo agwala lo monye o jir cio kulo na kang o cak inyi to morutok i fadari. Li tiyi tohi na li iti longojita noo to Israel lo kirurumita o rihe o ngon kolo apa nenge. O jir ite i lale rohojun to kiji ningi. ²² Ka lo rumuni tungani o getore ngorwani lo tungani kaletoni, o jir na tungani ko na ngorwani i fadari. O jir ite i lale rohojun to kof lo Israel. ²³ Ka lo rumu tungani karioni na lo cihi ara lo yemaru to katua lo kang oto hati o geto ko inyi, ²⁴ o jir i yari icieng fad lokoli lo kang o fwori o cahi to morutok i fadari. Na ngorwani i fadari to jimitan o ngon inyi katua lo kang ida hati i lulu ji o luahuni, ko na tungani to jimitan i yau ngorwani lo kaletoni. O jir ite i lale rohojun to kiji ningi. ²⁵ Ati ka lara oleng i niefare tungani ngorwani na lo yemati o getore, ara na tungani retoni li tiyi ene tenya ake lo wei. ²⁶ Ke tiyi lobo tohi diho ngorwani ida inyi i pal lobo tohi lo cam inyi weyarore. O ri ene tenya ko tenya lo tungani na lo loo o lib loryehat nenge i fade, ²⁷ tonyio o rumu na tungani na ngorwani lo yemati oleng to kang kileng ngi luluo inyi o ru tungani lo ning na ngo lwak inyi. ²⁸ Ka lo rumu tungani karioni na i tuba na lida o teri ara lo yema oto hati i nief inyi o getore, o rumuni hati icieng, ²⁹ o jir na tungani o dumahi apa lo na karioni sekeli keek miet kulo rial. O jir inyi o yem na kito karioni tonyio li yau inyi inyi. Ida manyu inyi o tum jaha na ngorwani iyo warun nenge fad. ³⁰ O jir tungani ida i yau ngorwani lo apa nenge, o jir inyi ida iti kaj logetore lo monye.