¹ Ka lo rumahini tungani lobo o geto oleng ara na i wei iyo kof na lohi cwara Lahitok Lobanga ningi ite lo ki taluno, oto hati ida o yeniti kafadani, ² o fwo cia lohitwaha ko kangotok kulo tenya i pim lomajun to inyia iyo ken lo na tungani many iyo kangite kuna i nyihaha. ³ Oto hati lohitwaha kulo kang na lo nyiha ko na tungani i wei o dumu kace na lo rihe ida li tiyi lobo tic kode na lo rihe ida i kolahini oyok murut ⁴ i yari gura na lo rihe ida lo remi na lida iti bulahini lobo tohi manyu na li tihita kare katua. To ijia to katua lo gura o jir icieng o gil murut lo na kace. ⁵ O fwonu cia kadwarak kulo imanit lo Levi ketemoni, tonyio lo nyumu Lahitok Lobanga ningi icieng lo ki tiyo ko ki gata gum to karana lo Lahitok ko lo ngoto tenyitenyi kulo ngolofa ko ngirunita fad. ⁶ Oto hati lohitwaha kulo na kang lo nyiha ko na kaweyani i lalahi kac kuneicieng kai lo na kace lo gili murut to gura, ⁷ manyu o teny cia icieng o joo, "Ida kac kuniyang li iti yiju ene okoto, ida manyu konyieha kuniyang lo deu ka li iti yijunoti. ⁸ I ruho ene pulo to cio kunino kulo Israel kuna li lahu Isi Lahitok manyu ke nief cio kunino ara kapalak to okoto lo tungani na li fadari arus o ru ko kipal." Oto cia na okoto o puloro, ⁹ manyu i rumu ite li lale kipal lo ki iti yija okoto loyoyome to kenite kuningi iya na li tiyi ite tohi na i bir to ketemoni lo Lahitok. ¹⁰ Ka li rum ite rem ko merok kuningi i co hati Lahitok Lobanga ningi icieng kac kuningi, ito hati ite i niefu cio, ¹¹ ka li deu isi iyo kiji lo kuna cio li niefuni o ngon ngorwani na i dwaru manyu o dam tau nino inyi, i tum isi i yaru inyi ara ngorwani nino. ¹² I yauno inyi kalilo i co inyi o git kue, o ngad kafiela. ¹³ manyu iti ngade kuna kyelani lorumu inyi i ciefita lafar li niefunorehin. Langun li tong inyi kaji nino i cir apa nenge ko iyang nenge to ofa lobito, i tum dong isi loro diho inyi rahun retoni nenge inyi manyu ara ngorwani nino. ¹⁴ Ka lida inyi ki iti kwama isi, to lahahi inyi o loo faji na lo wak inyi. O jir isi ida iti lote inyi kode i tiyore inyi ara opii iya na li iti kaj isi inyi. ¹⁵ Ka lo ngon tungani ko ngorwo are, oto hati i maru lobito i lany nu bito oto hati icieng fad o tomonu tee rei ara hati kito ketemoni lo na ngorwani lida inyi i maru, ¹⁶ ka li cwara inyi sangite kunenge iyo tee kunenge o jir inyi ida i co sangite kulo kito okang iyo kito lo na ngorwani li maru inyi lo tobore okang nenge token kito lo nu ngorwani lida inyi i maru. ¹⁷ O jir inyi o yen kito lo na ngorwani lida inyi i maru ara okang lo tee kunenge to ki cwara inyi icait na li rwat iyo sangite kunenge fad. Ara na kito bito kitotori ketemoni lo golun lo apa nenge. Ara kicait lo okang nenge. ¹⁸ Ka lo ngon tungani ko kito retoni na karongoni, o sil na lida o ningo apa nenge ko iyang nenge manyu ida o wak ki jifita tenya neicieng ka li singa icieng inyi, ¹⁹ i nief cia apa nenge ko iyang nenge i yauno ketemoni lo lohitwaha kulo na kang lokoli. ²⁰ O joo cia icieng diho Lohi, "Ele kito niyang, i rongo manyu o sil. Ida inyi ki ningo ohoi. Ara inyi kangatani ko karumani." ²¹ O jir dong cio kulo na kang fad o cak inyi to morutok i fade. O jir ite i lale rohojun to kiji ningi. O ning cia cio kulo Israel fad na tenya oto o bangiti. ²² Ka li pal lobo tungani kipal na hitok oto hati i fadari o ihahini iyo kete, ²³ o jir ite ida i ngerihi ken nenge o get kai lo kete. Ito de jimitan o jir i nuk inyi na far bito, tonyio tungani na lo ihahini iyo kete ara na li fice Lobanga. Ke pale kof na lohi cwara Lahitok Lobanga ningi ite ara lolunyot ningi.