¹ Ka li rumoro ite jore kode rem ko merok kuningi ito hati i deu lakwenyi ko gadigadihin ko karemok kuna i borengi i lany kuningi, ke bang icieng tonyio ki ngon Lahitok Lobanga ningi lafa lohi yauno ite to kof lo Ijipt ko ite. ² Langun lo nyiha ite i fwo par lo rem, o jir kadwarani o lotu ketemoni i furahi cio. ³ O joo cia inyi diho icieng, “Ito ning cio kulo Israel; elefar i fworo ite par lo rem ko merok kuningi, ke co taulo o ryenya kode ke bang, ke hihirita kode ke ryenya to icieng. ⁴ Tonyio Lahitok Lobanga ningi lo loro ko ite remun to ite iyo merok kuningi ko ki cwara ite lanyuno.” ⁵ O joo cia kulahitoha diho karemok, “I fak lobo tungani kaji ngejuk na lo rihe ida lo manya katua? I ngohi inyi to loo kang kode ngo weihi cia inyi rem i co lobo tungani ake o manya katua nenge. ⁶ Iti bul lobo tungani vinore o rihe hati ida o mat vino nenge? I ngohi inyi to loo kang kode ngo weihi cia inyi rem i co lobo tungani ake o loo o mat vino nenge. ⁷ I suf lobo tungani karioni ida hati lo yem? I ngohi inyi to loo kang kode ngo weihi cia inyi rem i co lobo tungani ake o loo o yem inyi.” ⁸ Oto cia kulahitoha o sodohi o joo, “O bang lobo tungani kode o dou tau? I ngohi inyi to loo kang kode i co cia karemok kaletok manyu o dou taulo.” ⁹ Ka lo keru kulahitoha tenya ko karemok, o nyumu cia icieng karyengak kuna lo lanyu icieng. ¹⁰ Ka li dororo ite ki iti remo kang, i cwarata cio kunenge ifahit lo yomo. ¹¹ Ka li ruk icieng oto hati o ngaji lokoliho, cio fad kuna lo ngon na kang ara cia katiyok kulo tic lo imiri o fwonuni i tiyoti diho ite. ¹² Ka lo beruni yomo oto hati ki iti remote ite, i ritata na kang. ¹³ Ka lohi ciorihi Lahitok Lobanga ningi inyi kac kuningi, i fadeti rei fad to katua nenge. ¹⁴ Ka lara to ngorwo, tee, sang ko sangite kunakude fad to na kang, i tum ite ki yaru ara kuningi. Manyu i tum ite ki tiyore sang kuna lohi ciorihi Lahitok Lobanga ningi ite to kac kulo merok kuningi. ¹⁵ Koditi na ngi tiyore ite kangite kuna i lomaha diho ite na kuna lida o ngoni ko misihi kuna lo nyihaha. ¹⁶ Oto hati to kangite kulo misihi kuna lohi cwara Lahitok Lobanga ningi ite ara lolunyot, ke ngerihi lobo tohi i wirita o war. ¹⁷ Ito keru icieng tur; cio kulo Amor, Hitit, Kanaan, Perez, Hivi, ko Jebus iya na lohi cihare Lahitok Lobanga ningi ite. ¹⁸ Tonyio i co cia icieng ki iti yen ite ki jifita kuna kikoihin i rohori fad li worare icieng lobangahin kuneicieng, ito cia ite i pal diho Lahitok Lobanga ningi. ¹⁹ Ka li rit ite kang to faritin kuna i borengi, ki iti remo inyi lo ki niefuno inyi, ke keru cianitok kunenge to fihahino rafal iyo icieng tonyio i tum ite daha ngak kuneicieng. Ke ngode icieng. Ara cianitok cio kuna lo jir ite i rit icieng? ²⁰ Oto hati i tum ite ngoda cianitok kuna lida ara cianitok kuna lo ngi ngak, i tiyore icieng ki faha sangite kulo kirita many o uroro na kang lohi iti remo ite.