¹ Ka lo keru Lahitok Lobanga ningi misihi kuna li cwara Inyi kof neicieng diho ite, manyu ka li fuhe ite icieng oleng langun li tongohino ite kangite kuneicieng ko kajihit, ² to inyia iti ngadeti to kenite kuningi kangite uni iyo kof na lohi cwara Lahitok Lobanga ningi ite lo ki taluno. ³ Ito tem lomajun ko lalatun ito hati i kor na kof lohi cwara Lahitok Lobanga ningi ite ara lolunyot kakeny uni, o jir tungani na li fade kaletoni i fe o loo tafa iyo lobo iyo kuno kangite. ⁴ Ara ene cik na li jifita lobo tungani na li fade kaletoni oto hati i fe ijia tafa – tungani na li fade loryehat nenge ara na li riafu na lida orumu o ngonore lobo tenya keken ken nenge. ⁵ Iya jijia ngo loo tungani ko loryehat nenge tim ngoda keyek oto hati ka li wata rafal nenge ara na lo ngoda kete, i koluno kue lo rafal o loo o ngod loryehat nenge i fade inyi. O tum na tungani ki fejaru iyo lobo to kiji lo kuno kangite uni o lwahu ken nenge. ⁶ To lobo ngi iti rwangaru ha kalenoni lo okoto inyi to awo o loo iti horu inyi ka lo loma nu kang, i fade inyi kileng lida inyi o cam to wei iya na li tiyore inyi na tenya iyo loryehat nenge ara okiriafe ida o fi kara lo atii kode to lobo tenya orumu lo ngon tau nenge. ⁷ Inyi li co nan a cik a joo iti ngade to kenite kuningi kangite uni. ⁸ Ka li iti lalat Lahitok Lobanga ningi kof ningi iya lafa lo cihare Inyi to ki butia diho fafaicio kuningi oto hati ki co ite kof fad iya na afa lo cihare icieng, ⁹ tonyio i jifita ite to genyun kuno cihicihi fad lahi ciha nan ite elefar, lo ki maruno Lahitok Lobanga ningi ko lotita to ningo diho Inyi faritin fad tona o jir iti ngade kangite kunakude uni ari. ¹⁰ I tiyoti ji o jir ida iti yijati okoto na lida i pal to kof ningi na lohi cwara Lahitok Lobanga ningi ite ara lolunyot ningi manyu o jir ite ida i pal to ki iti yija okoto. ¹¹ Ati ka lo rau tungani kaletoni i fade inyi to oberue lo tau nenge oto hati i fe iyo lobo to kiji lo kuna kangite, ¹² i lolongu cia lohitwaha kulo nu kang kafadani to kang lotafare i ciorihini iyo kalenoni lo okoto o jir o wei. ¹³ Ke de to mehino, o ji rite i lale ki iti yija lo okoto na lida i pal to kof lo Israel, o jir manya o lot ara na i jir diho ite. ¹⁴ Ke iti sual moru lo lohikori lafa li cidohi lohitwaha katemok to kof lolunyot na li rumu isi to kof na lohi cwara Lahitok Lobanga ningi ite lo lunyo. ¹⁵ Ida saden lobito o tum ki iti tora tungani na li dori to lobo kipal kode lobo rohojun li tiyi inyi. O jir tenya iti goli ngoto nenge to ki iti golo lo sadeni are kode uni. ¹⁶ Ka lo woju saden kasusuani ki doro tungani to kipal. ¹⁷ o jir kuna cio are lo rijati tenya kiji neicieng o woita ketemoni lo Lahitok to komom lo kadwarani ko kangotoni lo tenya na lo ngon faji lo tic nenge to na far. ¹⁸ O jir kangotoni lo tenya i ngingiju otoc ka lo rumuno jimitan o tenya saden talerun, ki cwara saden to talerun iyo ken lo Israelani kaletoni, ¹⁹ o jir i tiyi iyo na saden kataleroni tohi lo adi lo wak inyi i tiyihini iyo nu tungani lo gulia inyi. O jir ite i lale kipal to kiji ningi. ²⁰ O ning cia cio kulakude na tenya oto o bangiti manyu ida cia na tohi i rohoi i nyiahat ki tiyihino kiji ningi. ²¹ Ke deya to mehino: Ito dum; warun to warun, konyiek to konyiek, kale to kale, kana to kana, keju to keju.